ലോകം മുഴുവനുമുള്ള കുഞ്ഞുങ്ങള്ക്കായി സമര്പ്പിക്കുന്ന മാതൃ വാത്സല്യത്തിന്റെ സന്ദേശവുമായി ഒരു ലോക്ഡൗണ് മ്യുസിക് വീഡിയോ ജ്വാലാമുഖി ജൂണ് 21ന് ലോക സംഗീത ദിനത്തില് പുറത്തിറങ്ങുന്നു. മെഗാസ്റ്റാര് മമ്മൂട്ടിയുടെ ഫേസ്ബുക് പേജിലൂടെയാണ് ജ്വാലാമുഖി പുറത്തിറങ്ങുന്നത്.
ഒരുപാട് പ്രത്യേകതകളുള്ള ഈ താരാട്ട് വീഡിയോ ഒരുക്കിയിരിക്കുന്നത് ഏഴ് അമ്മമാര് ചേര്ന്നാണ്. സ്മിത നമ്പ്യാര് വരികള് എഴുതി സംവിധാനം ചെയ്ത ജ്വാലാമുഖിയുടെ സംഗീത സംവിധാനം നിര്വഹിച്ചു ആലപിച്ചിരിക്കുന്നത് സജ്ന വിനീഷ്. സീതാലക്ഷ്മി, അനുശ്രീ എസ് നായര്, പൂര്ണിമ, സുസ്മിത തുടങ്ങിയവര് ചെന്നെ, കൊച്ചി, തിരുവനന്തപുരം എന്നിവിടങ്ങളില് നിന്ന് മൊബൈലില് പകര്ത്തിയ നൃത്താവിഷ്കാരമാണ് ജ്വാലാമുഖി.
പരസ്പരം ആരും നേരില് കാണാതെ പലയിടങ്ങളില് നിന്ന് ചിത്രീകരിച്ച വീഡിയോയില് അമ്മയ്ക്കു മകളോടുള്ള അളവറ്റ സ്നേഹവും പ്രതീക്ഷകളുമാണ് ആശയം. ഒരു കുഞ്ഞു ആദ്യമായ് കേള്ക്കുന്ന സംഗീതം അമ്മയുടെ പാട്ടാണ്, താരാട്ട്.
നീലാംബരി രാഗത്തില് ചിട്ടപ്പെടുത്തിയ വാദ്യോപകരണങ്ങള് ഉപയോഗിക്കാതെ റെക്കോര്ഡ് ചെയ്ത പാട്ട് അമ്മമാര്ക്കു പാടാനുള്ള ഒരു പുതിയ താരാട്ടായാണ് അണിയറ പ്രവര്ത്തകര് കരുതുന്നത്. പെണ്കുഞ്ഞു വളരുമ്പോള് അവളുടെ പാല് പുഞ്ചിരിയും കുറു മൊഴി കൊഞ്ചലുകളും പിച്ചവയ്പും അമ്മയ്ക്കു പ്രത്യേക അനുഭൂതി സമ്മാനിക്കുന്നു. മകള് ഭാവിയില് തികഞ്ഞ ആത്മവിശ്വാസമുള്ള ധീരയായ വനിതയാകണമെന്നു അമ്മ ആഗ്രഹിക്കുന്നു. അവളുടെ വളര്ച്ച അമ്മയുടെ ഭാവനയിലൂടെ കാണുന്നതാണ് വരികള്.
ഓം പ്രൊഡക്ഷന്സ് പുറത്തിറക്കുന്ന വീഡിയോ എഡിറ്റ് ചെയ്തിരിക്കുന്നത് സൗമ്യ സാഗര് ആണ്. 7 അമ്മമാരും ജ്വാലാമുഖിയില് മുഖം കാണിക്കുന്നു എന്നതാണ് മറ്റൊരു പ്രത്യേകത. ദുബായ്, ചെന്നൈ കൊച്ചി തിരുവനന്തപുരം എന്നിവിടങ്ങളില് നിന്നും പരിമിതമായ സൗകര്യങ്ങള്ക്കകത്തു നിന്ന് കൊണ്ടു സാങ്കേതിക വിദ്യ ഉപയോഗിച്ച് മാത്രം പൂര്ത്തീകരിച്ചു എന്നതും ജ്വാലാമുഖിയുടെ പ്രത്യേകതയാണ്.
