അടിമാലി: അടിമാലിയില് വീണ്ടും ചാരായ വേട്ട. കൊന്നത്തടി മാങ്ങാപ്പാറയിലെ രണ്ട് വീടുകളില് നിന്നുമായി 5 ലിറ്റര് ചാരായവും 50 ലിറ്റര് കോടയും അടിമാലി നര്ക്കോട്ടിക് എന്ഫോഴ്സ്മെന്റ് സംഘം പിടിച്ചെടുത്തു.
മാങ്ങാപ്പാറ സ്വദേശിയായ നടുവിലേക്കുറ്റ് ഫ്രാന്സീസ് മാത്യുവിന്റെ വീട്ടിലായിരുന്നു സംഘം ആദ്യം പരിശോധന നടത്തിയത്. ഇയാളുടെ വീടിനോട് ചേര്ന്ന ബാത്ത് റൂമില് നിന്നും 50 ലിറ്റര് കോട കണ്ടെടുത്തു. ഫ്രാന്സീസ് മാത്യുവിന്റെ വീടിന് സമീപത്തായുള്ള ചെറുനിലത്ത് പുത്തന്പുരക്കല് ടോമി അഗസ്റ്റിന്റെ വീട്ടില് നിന്നുമാണ് 5 ലിറ്റര് ചാരായം കണ്ടെടുത്തത്. ടോമിയുടെ വീടിന്റെ ഹാളിലായിരുന്നു ചാരായം സൂക്ഷിച്ചിരുന്നത്.
ഫ്രാന്സീസും ടോമിയും സംഭവസ്ഥലത്ത് നിന്ന് രക്ഷപ്പെട്ടതായി എക്സൈസ് സര്ക്കിള് ഇന്സ്പെക്ടര് എം.കെ. പ്രസാദ് പറഞ്ഞു. ലോക്ക് ഡൗണ്കാലയളവ് മുതല് പ്രതികള് ചാരായ നിര്മ്മാണം നടത്തി ലിറ്ററൊന്നിന് 1500 രൂപ നിരക്കില് വില്പ്പന നടത്തി വരികയായിരുന്നുവെന്നാണ് നര്ക്കോട്ടിക് എന്ഫോഴ്സ്മെന്റ് സംഘം നല്കുന്ന വിവരം.
ഇതിനെ തുടര്ന്ന് ലഭിച്ച പരാതിയുടെ അടിസ്ഥാനത്തില് ഒരു മാസത്തിലധികമായി പ്രതികള് ഇരുവരും ഷാഡോ സംഘത്തിന്റെ നിരീക്ഷണത്തിലായിരുന്നു. രക്ഷപ്പെട്ട ഫ്രാന്സീസിനും ടോമിക്കുമായി എക്സൈസ് സംഘം അന്വേഷണം ആരംഭിച്ചു.
പരിശോധനയില് സര്ക്കിള് ഇന്സ്പെക്ടറെ കൂടാതെ ഓഫീസര്മാരായ കെ.വി. സുകു, സാന്റി തോമസ്, കെ.എസ്. മീരാന്, ഹാരിഷ് മൈതീന്, രഞ്ജിത്ത് കവിദാസ്, ശരത് എസ്.പി. എന്നിവര് പങ്കെടുത്തു.
