തിരുവനന്തപുരം: പ്രകൃതിക്കും സമൂഹത്തിനുമായി ജീവിതം സമര്‍പ്പിച്ച വ്യക്തിത്വമായിരുന്നു വീരേന്ദ്രകുമാര്‍ എന്ന് ബിജെപി സംസ്ഥാന അധ്യക്ഷന്‍ കെ.സുരേന്ദ്രന്‍ പറഞ്ഞു. മികച്ച ചിന്തകനെയും സാമൂഹ്യപ്രവര്‍ത്തകനെയും ആണ് നഷ്ടമായത്. രാഷ്‌ട്രീയത്തിനതീതമായി വ്യക്തി ബന്ധം സൂക്ഷിക്കുന്നതില്‍ അദ്ദേഹം കാട്ടിയ നിഷ്‌കര്‍ഷ മറക്കാവുന്നതല്ല. അതനുഭവിച്ചിട്ടുള്ള ആളെന്ന നിലയില്‍ അദ്ദേഹത്തിന്റെ വിയോഗം വലിയ ദു:ഖമാണ് തനിക്കുണ്ടാക്കിയതെന്ന് സുരേന്ദ്രന്‍ അനുശോചന സന്ദേശത്തില്‍ പറഞ്ഞു.
പ്രകൃതിക്കും പരിസ്ഥിതിക്കുമായി എന്നും സംസാരിക്കുകയും എഴുതുകയും ചെയ്തു അദ്ദേഹം. സമൂഹത്തിലെ താഴെ തട്ടിലുള്ള ദരിദ്ര ജനവിഭാഗങ്ങളെ, പാര്‍ശ്വവത്കരിക്കപ്പെട്ടവരെ, ആദിവാസികളെ എന്നിവരെയെല്ലാം ബാധിക്കുന്ന പ്രശ്നങ്ങള്‍ അധികാരികളുടെ മുന്നിലെത്തിക്കാന്‍ അദ്ദേഹത്തിന്റെ നാവും തൂലികയും എന്നും ചിലച്ചു കൊണ്ടിരുന്നു. പ്ലാച്ചിമട സമരത്തിലടക്കം അദ്ദേഹത്തിന്റെ സജീവ സാന്നിധ്യം കേരളം കണ്ടതാണ്.
പ്രായോഗിക രാഷ്‌ട്രീയത്തില്‍ വ്യത്യസ്ത നിലപാടുകള്‍ സ്വീകരിക്കുമ്പോഴും തന്റെ സോഷ്യലിസ്റ്റ് ചിന്താഗതിയില്‍ തരിമ്പും മാറ്റം വരുത്താന്‍ അദ്ദേഹം തയ്യാനായിട്ടില്ല. എഴുത്തുകാരനെന്ന നിലയില്‍ അദ്ദേഹം വൈജ്ഞാനിക സാഹിത്യത്തിന് നല്‍കിയ സംഭാവനയും വിലപ്പെട്ടതാണ്. എല്ലാ മേഖലയിലും അറിവുണ്ടാകുകയും ഇടപെടലുകള്‍ നടത്തുകയും ചെയ്ത രാഷ്‌ട്രീയ പ്രവര്‍ത്തകനുമാണദ്ദേഹം. ഭാവി തലമുറയ്‌ക്ക് പഠിക്കാനും സൂക്ഷിച്ചു വയ്‌ക്കാനുള്ള സംഭാവനകള്‍ എല്ലാ രംഗത്തും നല്‍കിയാണ് അദ്ദേഹം വിട വാങ്ങിയത്. അദ്ദേഹത്തിന്റെ അപ്രതീക്ഷിത വേര്‍പാടില്‍ അശോചനവും ദു:ഖവും രേഖപ്പെടുത്തുന്നു എന്ന് സുരേന്ദ്രന്‍ പറഞ്ഞു
അധികാര മോഹങ്ങള്‍ക്ക് അടിമപ്പെടാതെ താന്‍ ഉയര്‍ത്തിപ്പിടിച്ച ആശയാദര്ശങ്ങള്‍ക്ക് വേണ്ടി ജീവിതം ഉഴിഞ്ഞു വെച്ച രാഷ്‌ട്രീയ നേതാവിനെയാണ് എംപി വീരേന്ദ്രകുമാറിന്റെ നിര്യാണത്തോടുകൂടി നഷ്ടമായതെന്ന് ബിജെപി മുന്‍ അധ്യക്ഷന്‍ കുമ്മനം രാജശേഖരന്‍.
പരിസ്ഥിതി വിഷയങ്ങളില്‍ അഗാധമായ അറിവ് നേടുകയും , നേടിയ അറിവുകള്‍ സ്വജീവിതത്തില്‍ ഫലപ്രദമായി പ്രയോഗവല്‍ക്കരിക്കുകയും ചെയ്തു.വനം വകുപ്പ് മന്ത്രി സ്ഥാനം വലിച്ചെറിഞ്ഞത് പ്രകൃതിയോടുള്ള അദ്ദേഹത്തിന്റെ പ്രതിബദ്ധതയെയാണ് വ്യക്തമാക്കുന്നത്. കേരള രാഷ്‌ട്രീയ മണ്ഡലത്തില്‍ എന്നെന്നും മിന്നിത്തിളങ്ങിയ ഉജ്വല വ്യക്തിത്വമായിരുന്നു. പത്ര പ്രവര്‍ത്തക രംഗത്തും സാഹിത്യ രചനയിലും ഉള്ള തന്റെ കഴിവുകള്‍ വിജയകരമായി പ്രകടിപ്പിക്കാന്‍ അദ്ദേഹത്തിന് സാധിച്ചു. അദ്ദേഹത്തിന്റെ ജീവിതം ഒരു നീണ്ട കാലഘട്ടത്തിലെ ചരിത്രം കൂടിയാണ്.പ്രതിബന്ധങ്ങളെയും പ്രതിസന്ധികളെയും ഉറച്ച മനസ്സോടെ നേരിടുവാന്‍ അദ്ദേഹം ആര്‍ജവം കാട്ടി.സാമൂഹ്യ രാഷ്‌ട്രീയ സാംസ്‌കാരിക മണ്ഡലങ്ങളില്‍ നിറ സാന്നിധ്യമായി പ്രശോഭിച്ചു. ആ ദീപ്ത സ്മരണയ്‌ക്ക് മുന്‍പില്‍ ആദരാഞ്ജലികള്‍ അര്‍പ്പിക്കുന്നതായി കുമ്മനം രാജശേഖരന്‍ പറഞ്ഞു.
