നെടുങ്കണ്ടം: എഎസ്ഐയുടെ നേതൃത്വത്തില് റിസോര്ട്ടില് നിന്ന് ചാരായം കടത്തിയെന്ന് ആരോപണം. നെടുങ്കണ്ടം സ്റ്റേഷനിലെ അഡീ. എസ്ഐ റോയിമോനെ സസ്പെന്ഡ് ചെയ്തു. പോലീസ് നടത്തിയ റെയ്ഡില് റിസോര്ട്ടില് നിന്ന് ചാരായം പിടികൂടിയിരുന്നു. തുടര്ന്ന് എക്സൈസ് നടത്തിയ പരിശോധനയില് കോടയും കണ്ടെത്തി. ഈ കേസുമായി ബന്ധപ്പെട്ട് നടന്ന അന്വേഷണത്തിനിടെയാണ് ഉദ്യോഗസ്ഥന് ഇവിടെ നിന്ന് ചാരായം വാങ്ങിയെന്ന് കണ്ടെത്തിയത്.
ഏതാനും ദിവസം മുന്പാണ് സംഭവം. രാമക്കല്മേട് റിസോര്ട്ടില് വാറ്റ് നടക്കുന്നതായി പോലീസിനും എക്സൈസിനും ഒരേ സമയം വിവരം ലഭിച്ചിരുന്നു. ആദ്യമെത്തിയ പോലീസ് ചാരായവും പിന്നാലെയെത്തിയ എക്സൈസ് കോടയും പിടികൂടി.
തുടര്ന്ന് നടന്ന അന്വേഷണത്തിലാണ് ഒന്നിലധികം പോലീസ് ഉദ്യോഗസ്ഥര് റിസോര്ട്ടില് എത്തി ചാരായം വാങ്ങിയെന്ന് കണ്ടെത്തിയത്. ഇതിന് പുറമെ പോലീസ് ജീപ്പില് ചാരായം കടത്തിയ ശേഷം മറ്റ് ചില പോലീസ് ഉദ്യോഗസ്ഥര്ക്ക് വിതരണവും നടത്തിയെന്നും കണ്ടെത്തലുണ്ട്.
