അജാനൂര്‍: കാലവര്‍ഷത്തിന് മുന്‍പുണ്ടായ കാറ്റില്‍ തകര്‍ന്ന ഷെഡ് പകരം അടച്ചുറപ്പുള്ള വീട് നിര്‍മ്മിച്ചു നല്‍കി ബി ജെ പി പ്രവര്‍ത്തകര്‍. അജാനൂര്‍ പഞ്ചായത്തിലെ പൊയ്യക്കര കല്ലിങ്കലിലെ സരോജനിയുടെ ഓലകൊണ്ട് ഉണ്ടാക്കിയ കൊച്ചു വീട് രണ്ടാഴ്ച മുമ്പുണ്ടായി കാറ്റില്‍ തകര്‍ന്നിരുന്നു. വിവരമറിഞ്ഞെത്തിയ പൊയ്യക്കര വിവേകാനന്ദ കായിക കേന്ദ്രവും ബിജെപി ബൂത്ത് കമ്മറ്റി പ്രവര്‍ത്തകരും വീട് നിര്‍മ്മാണമേറ്റെടുത്ത് പൂര്‍ത്തീകരിക്കുകയായിരുന്നു.
വീടിന്റെ താക്കോല്‍ദാനം ഇന്നലെ ബിജെപി ജില്ലാ. ജനറല്‍ സെക്രട്ടറി എ.വേലായുധന്‍ നിര്‍വ്വഹിച്ചു. മനഷ്യകാരുണ്യ പ്രവര്‍ത്തനത്തിന്റെ മറ്റൊരു മുഖമാണ് ഇവിടത്തെ ബിജെപി പ്രവര്‍ത്തകര്‍ കാണിച്ചിരിക്കുന്നതെന്നും ഇവരുടെ മാതൃകപരമായ പ്രവര്‍ത്തനം സമൂഹത്തിന് വഴികാട്ടിയാണെന്നും അദ്ദേഹം പറഞ്ഞു.
ബിജെപി അജാനൂര്‍ പഞ്ചായത്ത് ജനറല്‍ സെക്രട്ടറി വി.സുധാകരന്‍ അധ്യക്ഷത വഹിച്ചു. വീട് നിര്‍മ്മാണത്തിന് വിവോകനന്ദ കായിക കേന്ദ്രം പ്രസിഡണ്ട് പി.പി സുധാകരന്‍, രക്ഷാധികാരി എം.വി ശ്രീധരന്‍, സെക്രട്ടറി കെ.വി ദിവാകരന്‍, ചെയര്‍മാന്‍ രൂപേഷ് കല്ലിങ്കാല്‍, ജനറല്‍ കണ്‍വീനര്‍ ലിപേഷ്, ബൂത്ത് പ്രസിഡണ്ട് കുഞ്ഞിരാമന്‍, വൈസ്പ്രസിഡണ്ട് സത്യന്‍ തുടങ്ങിയവര്‍ നേതൃത്വം നല്‍കി.
പ്രതികരിക്കാൻ ഇവിടെ എഴുതുക: