തിരുവനന്തപുരം: മറ്റ് സംസ്ഥാനങ്ങളിലെ റെഡ്‌സോണില്‍ നിന്നും സംസ്ഥാനത്തേക്ക് വന്ന 5696 പേരെ ഇനിയും സര്‍ക്കാരിന് കണ്ടെത്തനായില്ല. 86,679 പേരാണ് പാസിനായി നോര്‍ക്കയില്‍ രജിസ്റ്റര്‍ ചെയ്തത്. ഇതില്‍ 37,801 പേര്‍ റെഡ് സോണില്‍പെട്ടവര്‍. 45,814 പേര്‍ക്ക് ഇതുവരെ പാസ് അനുവദിച്ചു. ഇതില്‍ 19,476 പേര്‍ റെഡ് സോണില്‍ ഉള്ളവര്‍. 16,385 പേര്‍ സംസ്ഥാനത്ത് എത്തിച്ചേര്‍ന്നു. ഇതില്‍ 8912 പേര്‍ റെഡ് സോണില്‍ ഉള്‍പ്പെട്ടവര്‍. വന്നവരില്‍ 3216 പേരെ കണ്ടെത്തി നിരീക്ഷണ കേന്ദ്രത്തിലേക്ക് മാറ്റി.
ബാക്കിയുള്ളവരെ കണ്ടെത്താന്‍ ശ്രമിക്കുകയാണെന്നാണ് സര്‍ക്കാര്‍ വിശദീകരണം. അതിര്‍ത്തിയില്‍ മൂന്ന് പരിശോധന കഴിഞ്ഞാണ് ഇവരെ കടത്തി വിടുന്നത്. വീട്ടില്‍ ക്വാറന്റീന്‍ ആകണമെന്ന സമ്മപത്രത്തോടെ. ഇതോടൊപ്പം ഇവര്‍ ഏത് തദ്ദേശ സ്ഥാപനത്തില്‍ നിന്നുള്ളവരാണോ അവിടത്തെ ആശാ വര്‍ക്കര്‍മാര്‍ക്കും ആരോഗ്യ വിഭാഗത്തിനും വിവരങ്ങള്‍ കൈമാറുന്നുണ്ട്. ഇത്രയൊക്കെ സംവിധാനങ്ങള്‍ ഉണ്ടായിരുന്നിട്ടും അയ്യായിരത്തോളം പേരെ കണ്ടെത്താനായില്ല.
സര്‍ക്കാര്‍ സംവിധാനത്തിന്റെ അലംഭാവമാണ് ഇതിലൂടെ വ്യക്തമാകുന്നത്. കോട്ടയത്ത് ക്വാറന്റീനിലുള്ള പതിനൊന്നു പേരെ നഗരത്തിലെ ഒരു ഹോട്ടലില്‍ പാര്‍പ്പിച്ചു. എന്നാല്‍ അവര്‍ എവിടെയാണെന്ന് ഇപ്പോള്‍ അറിയില്ല. ബന്ധപ്പട്ടെ ആരോഗ്യ പ്രവര്‍ത്തകര്‍ക്കും ഇത് സംബന്ധിച്ച് വ്യക്തതയില്ല. സംസ്ഥാനത്ത് എത്തിയ തബ് ലീഗുകാരെയെല്ലാം കണ്ടെത്തി എന്നാണ് സര്‍ക്കാര്‍ വ്യക്തമാക്കിയിരുന്നത്. എന്നാല്‍ എല്ലാ രേഖകളുമായി വന്നവരെ പോലും രണ്ട് ദിവസമായി കണ്ടെത്താന്‍ സര്‍ക്കാരിന് സാധിച്ചിട്ടില്ല.
