കോട്ടയം: ഗോമാതാവെന്ന നിലയില് പശുക്കളെ കണ്ടറിഞ്ഞ് സംരക്ഷിക്കപ്പെടുന്ന ആശ്രമ സങ്കേതമാണ് വാഴൂര് തീര്ഥപാദാശ്രമം. പശുക്കള്ക്ക് അമ്മയുടെ സ്ഥാനം നല്കി ആദരിക്കണമെന്നാണ് പൗരാണിക ഗ്രന്ഥങ്ങളിലെല്ലാം പരാമര്ശിക്കുന്നത്. രണ്ട് പതിറ്റാണ്ട് മുമ്പ് സ്ഥാപിച്ച ഗോശാലയിലൂടെ വാഴൂര് ആശ്രമം ഇത് നടപ്പിലാക്കിയിരിക്കുന്നു.
പാല് തരുവോളം മാത്രം പശുവിനെ സ്നേഹിക്കുവാന് ശീലിച്ചിട്ടുള്ളവരാണ് മലയാളികളില് ബഹുഭൂരിപക്ഷവും. ഈ ചിന്താഗതികളില് നിന്ന് വഴിമാറി ഏറെ പ്രത്യേകതകളുള്ള തീര്ഥപാദാശ്രമം കറവ വറ്റിയ പശുവിനും സ്നേഹം ചുരത്തി കരുണയുടെ കാവലാളാകുന്നു. പശുക്കള് ഇവിടെ ശരിക്കും ഗോമാതാക്കളാണ്. അവരുടെ പരിപാലകരോ അദ്ധ്യാത്മിക ആചാര്യന്മാരും. പാല്വറ്റിയ കാലികള് ഇവിടെ നിന്ന് അറവുശാലയിലേക്ക് നാളിതുവരെ പോയിട്ടില്ല. പകരം കരുതലിന്റെ വാര്ധക്യം അവരെ കാത്തിരിക്കുന്നു.
ചട്ടമ്പി സ്വാമികളുടെ ശിഷ്യപരമ്പരയില്പ്പെട്ട സംന്യാസിമാരാണ് വാഴൂര് തീര്ഥപാദാശ്രമത്തിലുള്ളത്. അദ്ദേഹത്തിന്റെ ആദര്ശങ്ങളും വേദങ്ങളിലെ നിര്ദേശങ്ങളും പാലിച്ചുകൊണ്ടാണ് ഗോശാലയുടെ പ്രവര്ത്തനം. ‘ഗാവോ വിശ്വസ്യമാതരം’എന്ന വേദ സങ്കല്പ്പപ്രകാരം പശുക്കള്ക്ക് അമ്മയുടെ സ്ഥാനമാണുള്ളതെന്ന് ആശ്രമ കാര്യദര്ശി സ്വാമി ഗരുഡധ്വജാനന്ദ തീര്ഥപാദര് പറയുന്നു. ഗോവധം പാടില്ലന്ന ആശയമാണ് യഥാര്ഥത്തില് ആശ്രമം നടപ്പാക്കിയിരിക്കുന്നത്. ഗവേഷക വിദ്യാര്ഥികള്ക്ക് ഈ ഗോശാലയും ഗോക്കളുടെ പരിപാലനവും പഠന വിഷയം കൂടിയാണ്.
1999ല് തുടങ്ങിയ ഗോശാലയില് ഇപ്പോള് 65 പശുക്കളുണ്ട്. കറവവറ്റിയ പത്ത് പശുക്കള് പ്രത്യേക സംരക്ഷണയിലാണ്. പാലും തൈരും നെയ്യും വിറ്റാണ് ഗോശാല നടത്താനുള്ള വരുമാനം കണ്ടെത്തുന്നത്. ഗ്യാസ് പ്ലാന്റും ചാണകം ഉപയോഗപ്പെടുത്തുന്ന കൃഷിയിടവുമൊക്കെ ഗോശാലയുടെ നന്മകളാണ്. ആശ്രമ മഠാധിപതി സ്വാമി പ്രജ്ഞാനാനന്ദ തീര്ഥപാദര്, കാര്യദര്ശി സ്വാമി ഗരുഡധ്വജാനന്ദ തീര്ഥപാദര് എന്നിവര്ക്കൊപ്പം ആശ്രമ അന്തേവാസികളും സഹായികളുമൊക്കെ ചേര്ന്ന സംഘമാണ് ഗോക്കളെ പരിപാലിക്കുന്നത്.
ജന്മഭൂമി ഓണ്ലൈന്