ആത്മബോധോദയ സംഘ സ്ഥാപകനും ആത്മജ്ഞാനത്തിന്റെ ആദിത്യതേജസ്സുമായിരുന്നു ശ്രീശുഭാനന്ദ ഗുരുദേവന്.
ഇട്ട്യാതി- കൊച്ചുനീലി ദമ്പതികളുടെ മകനായി 1057-ാമാണ്ട് മേടം 17 ന് പൂരം നക്ഷത്രത്തിലായിരുന്നു ശുഭാനന്ദ ഗുരുദേവന്റെ ജനനം. മാതാപിതാക്കള് കുഞ്ഞിന് നാരായണന് എന്ന് നാമകരണം ചെയ്തു. ഏകാന്തത വളരെയധികം ഇഷ്ടപ്പെട്ടിരുന്ന ഈ അത്ഭുത ബാലന് ഏഴാമത്തെ വയസ്സില് ഒരു ദിവ്യദര്ശനമുണ്ടായി. അതിന്റെ യാഥാര്ത്ഥ്യം എന്തെന്നറിയുവാനുള്ള ആകാംക്ഷ അനുദിനം ഉള്ളില് വളര്ന്നു കൊണ്ടിരുന്നു.
അക്കാലത്ത് ഏറ്റവും ഹീനജാതിയെന്നു കരുതിയിരുന്ന സാംബവ കുലത്തിലാണ് ശുഭാനന്ദ ഗുരുദേവന് പിറന്നത്. ജാതി സ്പര്ദ്ധയും മതവിദ്വേഷവും സാധുക്കളുടെ അടിമത്തവും കണ്ട് മനം നൊന്ത് നാടുവിട്ട് ഏകാന്ത തപസ്സിനായി പുറപ്പെട്ടു. കൊടും കാനനമദ്ധ്യത്തില് കാട്ടു മൃഗങ്ങള് നിറഞ്ഞ ചീന്തലാര് പ്രദേശത്താണ് എത്തിച്ചേര്ന്നത്. ഇന്നത്തെ ഇടുക്കി ജില്ലയില് പീരുമേട്-ചീന്തലാര് തോട്ടത്തിനു കിഴക്കുള്ള പര്വതനിരകളില് മലമ്പുന്ന വൃക്ഷത്തിന്റെ ചുവട്ടില് 2 വര്ഷം 11 മാസം 22 ദിവസം ആഹാര നീഹാരാദികള് വെടിഞ്ഞ് കൊടുംതപം ചെയ്തു.
തപസ്സിന്റെ അന്ത്യത്തില് ഈശ്വരദര്ശനമുണ്ടാവുകയും തന്റെ ഹൃദയത്തെ ഞെരുക്കിക്കൊണ്ടിരുന്ന സകല സംശയങ്ങള്ക്കും മറുപടി ലഭിക്കുകയും ചെയ്തു. അതോടുകൂടി നാരായണന് ശുഭാനന്ദ ഗുരുദേവനായി. ആത്മജ്ഞാനമാര്ജ്ജിച്ച് ബോധം ലഭിച്ച ബുദ്ധനെപ്പോലെ നാട്ടിലിറങ്ങി തന്റെ ആദര്ശം സ്ഥാപിച്ച് അവശരേയും ആര്ത്തരേയും ആലംബഹീനരേയും നരകദുരിതത്തില് നിന്ന് വീണ്ടെടുത്ത് ശുഭാനന്ദഗുരു അവരെ ആത്മജ്ഞാനത്തിനവകാശികളാക്കിത്തീര്ത്തു.
തനിക്കു ലഭിച്ച ദിവ്യവെളിച്ചത്തെപ്പറ്റിയും എപ്രകാരം തന്റെ ആശയഗതികള് ലോകര്ക്ക് വിതരണംചെയ്യാമെന്ന് ചിന്തിച്ചും ദക്ഷിണേന്ത്യ മുഴുവന് കാല്നടയായി സഞ്ചരിച്ച് പല മഹാത്മാക്കളേയും ദര്ശിച്ചു.
അവസാനം തന്റെ ആദര്ശമായ ആത്മബോധം ആത്മലോകത്തിനു പ്രദാനം ചെയ്യാന് അക്ഷീണപരിശ്രമം ആരംഭിച്ചു. നാട്ടിലിറങ്ങി പാവപ്പെട്ടവരുടെ ഭവനങ്ങള് സന്ദര്ശിച്ചും അവരെ ശുചിത്വം പാലിക്കുവാന് പഠിപ്പിച്ചും ഈശ്വരചിന്ത അവരില് ഉളവാക്കുവാന് തക്കവിധത്തിലുള്ള കീര്ത്തനങ്ങള് പാടിക്കേള്പ്പിച്ചും അവരിലൊരാളെപ്പോലെ മാടങ്ങളില് കഴിഞ്ഞു. അത്ഭുത പ്രവര്ത്തനങ്ങള് കണ്ട് രോഗികളും മാനസികാസ്വാസ്ഥ്യമുള്ള വരും ജാതിമതഭേദമെന്യേ ശുഭാനന്ദ ഗുരുദേവനെ സമീപിച്ചു. സമീപിച്ചവര്ക്കെല്ലാം സമ്പൂര്ണ്ണ ശാന്തിയും ലഭിച്ചു. മനുഷ്യരേവരുമൊന്നാണെന്നും ഏകപിതാവിന്റെ സന്താനങ്ങളാണെന്നും ജാതിമതഭേദങ്ങള് മനുഷ്യര് തമ്മിലുണ്ടാകാന് പാടില്ലെന്നും ശുഭാനന്ദ ഗുരുദേവന് ഉപദേശിച്ചു.
ആത്മീയത്തില്ക്കൂടി സാമൂഹ്യവിപ്ലവത്തിന് തിരിയിട്ട സമൂഹ പരിഷ്കര്ത്താവു കൂടിയായ ശുഭാനന്ദ ഗുരുദേവന് 1125 കര്ക്കടകം 13-ാം തീയതി ഭഗവാന് സമാധിയായി.
സ്വാമി ധര്മ്മതീര്ത്ഥര്
