റായ്പൂര്: ലോകം നേരിടുന്ന പ്രതിസന്ധികളും ലോകത്തിന്റെ നേട്ടങ്ങളുമെല്ലാം അതാത് കാലത്ത് ജനിക്കുന്ന കുട്ടികള്ക്ക് പേരാകുന്ന കാഴ്ച നമുക്ക് പരിചിതമാണ്. അവരുടെ പേരുകള് പിന്നീട് ആ കാലത്തിന്റെ അടയാളമാവുകയും ചെയ്യുന്നു. ഈ മഹാമാരിക്കാലത്തും ഇതാവര്ത്തിച്ചിരിക്കുകയാണ്.
ഛത്തീസ്ഗഡിലെ റായ്പൂരില് മാര്ച്ച് 26ന് കൊറോണയും കോവിഡും പിറന്നു. ഇരട്ടക്കുട്ടികള്. ഇതില് കൊറോണ മകളും കോവിഡ് മകനും. ലോകത്തിന്റെ അതിജീവനമാണോ പേടി സ്വപ്നമാണോ ഇവരില് ജനം കാണുന്നതെന്ന് അറിയാന് ഇനിയും കാത്തിരിക്കേണ്ടി വരും. എന്തായാലും അതിജീവനത്തിന്റെ അടയാളമാകാന് വേണ്ടിയാണ് അച്ഛനമ്മമാര് ഇവര്ക്ക് ഇങ്ങനെ പേരിട്ടത്.
ലോക്ഡൗണിലായതിനാല് ഏറെ വിഷമങ്ങള് അനുഭവിച്ചാണ് പ്രസവത്തിന് ആശുപത്രിയില് പോലും എത്തിയതെന്ന് കുട്ടികളുടെ അച്ഛനമ്മമാര് പറയുന്നു. പല കാര്യങ്ങള്ക്കും ബുദ്ധിമുട്ടുകള് ഏറെ അനുഭവിച്ചു. ഈ ബുദ്ധിമുട്ടുകളാണ് ഈ പേരുകളിലേക്ക് നയിച്ചത്. ഈ ദിവസം എന്നും ഓര്മിക്കപ്പെടണം, അവര് പറഞ്ഞു.
സമൂഹത്തെയാകെ വലച്ച ഈ പേരുകള് എന്തിന് മക്കള്ക്കിട്ടെന്ന ചോദ്യത്തിന് കഷ്ടപ്പാടുകളും വേദനയും അതിജീവിക്കാനുള്ള കരുത്ത് ഈ പേരിനുണ്ടെന്നാണ് മറുപടി. ആദ്യം കേട്ടാല് പേടിയുണ്ടാകുന്ന ഈ പേരുകള് പിന്നീട് കൗതുകമാകുമെന്നും ഇവര് പറയുന്നു. കൊറോണ ജനങ്ങളെ കൂടുതല് വൃത്തിയുള്ളവരും അച്ചടക്കമുള്ളവരുമാക്കി. എന്തിന് ഞങ്ങള്ക്ക് ഈ പേരിട്ടെന്ന് മക്കള് ചോദിച്ചാല് ജനങ്ങളില് വലിയ മാറ്റം വരുത്തിയ പേരാണിതെന്ന് പറയാമെന്നും ഇവര് വ്യക്തമാക്കി.
ഇപ്പോള് റായ്പൂരിലെ ഡോ. ബി.ആര്. അംബേദ്കര് ആശുപത്രിയുടെ ആകര്ഷക കേന്ദ്രമായിരിക്കുകയാണ് കൊറോണയും കോവിഡും. ഇവര്ക്ക് രണ്ട് വയസ്സുള്ള ഒരു സഹോദരിയുണ്ട്. ഉത്തര്പ്രദേശ് സ്വദേശികളായ കുട്ടികളുടെ അച്ഛനമ്മമാര് റായ്പൂരിലെ പുരാനി ബാസ്തിയില് വാടകയ്ക്ക് താമസിക്കുകയാണ്.
