കൊച്ചി: രോഗികള്ക്കായി അതിര്ത്തി തുറന്നു നല്കാമെന്ന് നിലപാടില് അയവ് വരുത്തി കര്ണ്ണാടകം. അതിര്ത്തി തുറക്കണമെന്ന കേരള ഹൈക്കോടതി ഉത്തരവിടുകയും സം്സ്ഥാനത്തെ രൂക്ഷമായി വിമര്ശിക്കുകയും ചെയ്്ത സാഹചര്യത്തിലാണ് കര്ണ്ണാടകം തീരുമാനത്തില് മാറ്റം വരുത്തിയത്.
ഗുരുതരാവസഥയിലുള്ള രോഗികള്ക്കായി അതിര്ത്തി തുറന്ന് കൊടുക്കാനാണ് പുതിയ തീരുമാനം. ഇതിനായി അതിര്ത്തിയില് ഒരു ഡോക്ടറേയും നിയമിച്ചു. മംഗലാപുരത്തയ്ക്ക് ചികിത്സിയ്ക്കായി അതിര്ത്തിയില് എത്തുന്നവരെ പരിശോധിച്ചശേഷം ആരോഗ്യ നില അതീവ ഗുരുതരമാണെങ്കില് മാത്രമേ കടത്തിവിടൂ. ഇതിന് ഡോക്ടറുടെ അനുമതി കൂടിയേ തീരൂ. രോഗികള്ക്കായി അതിര്ത്തി തുറന്നുകൊടുക്കണമെന്ന് കേരള ഹൈക്കോടതി ബുധനാഴ്ച ഇടക്കാല ഉത്തരവ് പുറത്തിറക്കിയിരുന്നു.
അതേസമയം ദേശീയ പാതകളുടെ ഉടമസ്ഥാവകാശം കേന്ദ്ര സര്ക്കാരിനാണ്. ഈ പാതകള് തടസപ്പെടുത്തിയാല് നിയമ നടപടി വരെ എടുക്കാം. ഇന്ത്യന് യൂണിയന്റെ ഭാഗമായിരിക്കുന്നിടത്തോളം കാലം കര്ണാടക സര്ക്കാര് രാജ്യത്തെ ഓരോ പൗരന്റെയും മൗലിക അവകാശങ്ങള് സംരക്ഷിക്കാന് ബാധ്യസ്ഥരാണ്. ഇത് കര്ണാടകം മനസിലാക്കണം. കര്ണാടക സര്ക്കാരിനെതിരെ ഇപ്പോള് ഉത്തരവ് പാസാക്കുന്നില്ലെന്നും റോഡ് തുറക്കാന് കേന്ദ്ര സര്ക്കാരിന് നിര്ദ്ദേശം നല്കുകയാണെന്നുമാണ് കോടതി പറഞ്ഞത്.
ഡിസാസ്റ്റര് മാനേജ്മെന്റ് നിയമ പ്രകാരം ദേശീയ പാത തുറന്നുകൊടുക്കാനാണ് ആവശ്യപ്പെട്ടത്. കേന്ദ്ര സര്ക്കാര് അടിയന്തരമായി ഇടപെടണമെന്ന് ഹൈക്കോടതി ആവശ്യപ്പെട്ടു. തടസപ്പെട്ട റോഡുകള് തുറക്കാന് അടിയന്തര നടപടിയെടുക്കണം. കേന്ദ്ര സര്ക്കാരിനാണ് ഇതിന്റെ ഉത്തരവാദിത്വം. എതിര് കക്ഷികള് മൂന്ന് ആഴ്ച്ചയ്ക്കുള്ളില് എതിര് സത്യവാങ്മൂലം നല്കണം. ഹര്ജിയില് മറ്റ് ആവശ്യങ്ങള് ഉണ്ട്. പക്ഷേ അത് ഇപ്പോള് പരിഗണിക്കുന്നില്ലെന്നും കോടതി വ്യക്തമാക്കി. മൂന്നാഴ്ചയ്ക്ക് ശേഷം ഹര്ജി വീണ്ടും പരിഗണിക്കും. ചരക്ക് ഗതാഗതവും ജനങ്ങള്ക്ക് ബുദ്ധിമുട്ടും ഇല്ലാതെ വേണം നടപടി സ്വീകരിക്കാനെന്നും അതിര്ത്തി തുറന്ന് കൊടുക്കണമെന്നും കേന്ദ്ര സര്ക്കാരും കര്ണ്ണാടകത്തോട് ആവശ്യപ്പെട്ടിരുന്നു.
ഹൈക്കോടതി ഇടപെടലിനെ തുടര്ന്ന് കര്ണ്ണാടകത്തില് നിന്നുള്ള ചില ചരക്ക് വാഹനങ്ങളെ ഇന്ന് തലപ്പാടി അതിര്ത്തി വഴി കേരളത്തിലേക്ക് കടത്തിവിട്ടു. എന്നാല് കേരളത്തില് നിന്നുള്ള ആംബുലന്സുകള് അതിര്ത്തിയില് തടഞ്ഞു. ഇതിനെ തുടര്ന്ന് കര്ണ്ണാടകത്തിനെതിരെ രാജ്മോഹന് ഉണ്ണിത്താന് സുപ്രീംകോടതിയില് ഹര്ജി നല്കി. ഇത് വെള്ളിയാഴ്ച കോടതി പരിഗണിക്കും.
