ന്യൂദല്‍ഹി: കൊറോണ വ്യാപനം തടയാന്‍ മിന്നല്‍ വേഗത്തില്‍ തയാറെടുപ്പുകള്‍ പൂര്‍ത്തിയാക്കി നരേന്ദ്ര മോദി സര്‍ക്കാര്‍. കൊറോണ രോഗവ്യാപനം ഉണ്ടായാല്‍ രാജ്യത്തെ ഏറ്റവും വലിയ ആശുപത്രി ശൃംഖലയാകാന്‍ ഇന്ത്യന്‍ റെയില്‍വേ തയാറായി. കൊറോണ രോഗികളെ കൊണ്ട് ആശുപത്രികളെ നിറഞ്ഞാല്‍ രണ്ടാംഘട്ടമായി റെയില്‍വേയുടെ കീഴിലുള്ള ട്രെയിനുകള്‍ ആശുപത്രികളാക്കാന്‍ ആലോചനയുണ്ടായിരുന്നു.
എന്നാല്‍, രോഗം വ്യാപിക്കുന്നത് വരെ കാത്തിരിക്കേണ്ട കാര്യമില്ലെന്നും തെരഞ്ഞെടുത്ത സ്ഥലങ്ങളില്‍ ട്രെയ്‌നുകളെ കൊറോണ വാര്‍ഡുകളാക്കാന്‍ പ്രധാനമന്ത്രി കേന്ദ്ര റെയില്‍വേ മന്ത്രി പിയൂഷ് ഗോയലിനു നിര്‍ദേശം നല്‍കുകയായിരുന്നു. ഇതേത്തുടര്‍ന്നാണ് ഇതിനായി റെയില്‍വേ മന്ത്രാലയം വിദഗ്‌ദ്ധരുമായി ചേര്‍ന്ന് കൊറോണ വാര്‍ഡുകള്‍ ട്രെയ്‌നുകളില്‍ തയാറാക്കിയത്. ട്രെയ്‌നുകളിലെ കൊറോണ വാര്‍ഡുകളുടെ ചിത്രങ്ങള്‍ വാര്‍ത്താ ഏജന്‍സിയായ എഎന്‍ഐ പുറത്തുവിട്ടു. ആഭ്യന്തരമന്ത്രാലയത്തിന്റെയും ആരോഗ്യമന്ത്രാലയത്തിന്റെ നിര്‍ദേശത്തിന്റെ പശ്ചാത്തലത്തിലാണ് എല്ലാ നടപടികളും.
എല്ലാ സംസ്ഥാനങ്ങളും തമ്മില്‍ റെയില്‍ ബന്ധമുള്ളതും രോഗികളെ രാജ്യത്തിന്റെ ഏതു ഭാഗത്തേക്കും എത്തിക്കാനും ട്രെയിന്‍ ആശുപത്രികളിലൂടെ കഴിയും. കൂടാതെ റെയില്‍വേയുടെ ട്രെയിനുകളില്‍ 30 ശതമാനവും ഇപ്പോള്‍ എസി കോച്ചുകള്‍ ഉള്ളവയാണ്. കൊറോണ പടരുകയാണെങ്കില്‍ എസി ട്രെയിനുകളെല്ലാം സഞ്ചരിക്കുന്ന ആശുപത്രികളായി മാറും. ഇതിനായുള്ള മുന്നൊരുക്കമാണ് റെയില്‍വേയിലെ ഇപ്പോഴത്തെ കൊറോണ വാര്‍ഡുകള്‍. ഇന്ത്യന്‍ റെയില്‍വേയ്‌ക്ക് 18 സോണുകളിലായി 20000 ട്രെയിനുകളാണ് ഉള്ളത്. 28 കോച്ചുകള്‍ വരെയുള്ള ദീര്‍ഘദൂര ട്രെയിനുകള്‍ നിലവിലുണ്ട്. ഇവയില്‍ മാറ്റം വരുത്തിയാല്‍ തന്നെ മികച്ച ആശുപത്രി സംവിധാനം ഉണ്ടാക്കാം. ബെര്‍ത്തും ടോയ്‌ലൈറ്റും സീറ്റും പാന്‍ട്രിയും ഉള്ളതിനാല്‍ രോഗികള്‍ക്ക് മറ്റ് ആവശ്യങ്ങള്‍ക്ക് ബുദ്ധിമുട്ടുകള്‍ ഉണ്ടാകില്ല. വൈറസ് ബാധ ഉണ്ടാകുന്ന സ്ഥലങ്ങളിലെ സ്‌റ്റേഷനുകളില്‍ ട്രെയിന്‍ എത്തിച്ച് ആശുപത്രികള്‍ ആക്കാനും. ഒരോ സ്‌റ്റേഷനുകളില്‍ നിന്നും രോഗികളെ നേരിട്ടെത്തി എടുക്കാനും ട്രെയിന്‍ ആശുപത്രികള്‍ക്കാവും. ഇതു മുന്‍കൂട്ടിക്കണ്ടാണ് കേന്ദ്ര ആഭ്യന്തരമന്ത്രാലയവും ആരോഗ്യമന്ത്രാലയവും റെയില്‍വേ മന്ത്രാലയവുമായി സംയുക്ത നീക്കം നടത്തിയത്. കേന്ദ്ര സര്‍ക്കാരിന്റെ ഈ നീക്കം മുന്‍കൂട്ടികണ്ട് എല്ലാ റെയില്‍വേ ഡിവിഷനുകളും തങ്ങളുടെ കീഴിലുള്ള ട്രെയിനുകള്‍ നേരത്തേ തന്നെ ശുചീകരിച്ചിരുന്നു.
