ഏതന്സ്: ടോക്കിയോ ഒളിമ്പിക്സ് സംഘാടര് ഇന്നലെ ഒളിമ്പിക്സ് ദീപം ഏറ്റുവാങ്ങി. ഗ്രീക്കിന്റെ തലസ്ഥാനമായ ഏതന്സിലെ പനാതെനയ്ക്ക് സ്റ്റേഡിയത്തിലാണ് കൈമാറ്റ ചടങ്ങ് നടന്നത്. കൊറോണ വ്യാപനത്തിന്റെ പശ്ചാത്തലത്തില് കാണികളെ ഒഴിവാക്കിയാണ് ചടങ്ങ് നടത്തിയത്.
ഗ്രീസ് ഒളിമ്പിക് കമ്മിറ്റി തലവന് സ്പൈറോസ്, ഒളിമ്പിക്സ് ദീപം ജപ്പനീസ് മുന് ഒളിമ്പിക്സ് നീന്തല് താരം നവോകോ ഇമോട്ടയക്ക് കൈമാറി. ഏതന്സില് നിന്നുള്ള പ്രത്യേക വിമാനത്തില് ഒളിമ്പിക്സ് ദീപം ഇന്ന് ജപ്പാനില് എത്തിച്ചേരും. ഈ മാസം 26 മുതല് ഒളിമ്പിക്സ് ദീപം ജപ്പാനില് പ്രയാണം നടത്തും. ജൂലൈ 24 മുതല് ആഗസ്റ്റ് ഒമ്പത് വരെയാണ് ഒളിമ്പിക്സ്.
ഒളിമ്പിക്സ് ദീപത്തിന്റെ വരവോടെ ലോകത്തെ പൊതിഞ്ഞിരിക്കുന്ന കാര്മേഘങ്ങള് വഴിമാറിപ്പോകുമെന്ന് ടോക്കിയോ ഒളിമ്പിക്സ് തലവന് യോഷിറോ മോറി ഒരു വീഡിയോ സന്ദേശത്തില് പ്രത്യാശ പ്രകടിപ്പിച്ചു.
കൊറോണ വ്യാപിക്കുന്ന സാഹചര്യത്തിലും ഒളിമ്പിക്സ് മുന് നിശ്ചയിച്ച പ്രകാരം നടത്താനുള്ള തയ്യാറെടുപ്പിലാണ് ഇന്റര്നാഷണല് ഒളിമ്പിക്സ് കമ്മിറ്റിയും ടോക്കിയോ ഒളിമ്പിക്സ് സംഘാടകരും.
ഐഒസിയെ പിന്തുണച്ച് ഐഒഎ
ന്യൂദല്ഹി: നേരത്തെ നിശ്ചയിച്ച പ്രകാരം ഒളിമ്പിക്സ് നടത്താനുള്ള ഇന്റര് നാഷണല് ഒളിമ്പിക് കമ്മിറ്റി (ഐഒസി)യുടെ തീരുമാനത്തിന് ഇന്ത്യന് ഒളിമ്പിക് അസോസിയേഷന്റെ (ഐഒഎ) പിന്തുണ. കൊറോണ വ്യാപനത്തിന്റെ പേരില് നിലവില് ഒളിമ്പിക്സ് മാറ്റിവയ്ക്കേണ്ടെ സാഹചര്യമില്ലെന്നും നിശ്ചയിച്ച സമയത്ത് തന്നെ ടോക്കിയോ ഒളിമ്പിക്സ് നടത്തുമെന്നും ഐഒസി കഴിഞ്ഞ ദിവസം പ്രഖ്യാപിച്ചിരുന്നു. കൊറോണ പടരുന്ന സാഹചര്യത്തില് ഒളിമ്പിക്സുമായി മുന്നോട്ടുപോകാനുളള ഐഒസി തീരുമാനത്തിനെതിരെ പ്രതിഷേധമുയരുന്നതിനിടെയാണ് ഇന്ത്യ ഐഒസിക്ക് പിന്തുണ അറിയിച്ചത്. എതുതരത്തിലുള്ള ഭീഷണിയുണ്ടായാലും ടോക്കിയോ ഒളിമ്പിക് നടക്കുകയാണെങ്കില് ഇന്ത്യ പങ്കെടുക്കുമെന്ന് ഐഒഎ വ്യക്തമാക്കി. ജൂലൈ 24 നാണ് ഒളിമ്പിക്സ് ആരംഭിക്കുക.
കൊറോണ വൈറസ് ലോകത്ത് നാശം വിതയ്ക്കുകയാണ്. ഒന്ന് രണ്ട് മാസത്തിനുള്ളില് ഈ വൈറസ് ബാധ നിയന്ത്രണ വിധേയമാകുമെന്നാണ് പ്രതീക്ഷ. വൈറസിന്റെ പ്രഭവകേന്ദ്രമായ ചൈനയില് ഇത് നിയന്ത്രണ വിധേയമായിക്കഴിഞ്ഞു. ഒളിമ്പിക്സ് യാതൊരു തടസവും കൂടാതെ നിശ്ചയിച്ച സമയത്ത് നടക്കുമെന്ന് ഒരു സീനിയര് ഐഒഎ ഉദ്യോഗസ്ഥന് പറഞ്ഞു.
ഐഒസിക്ക് കീഴിലാണ് നമ്മള്. അതിനാല് അവരുടെ തീരുമാനങ്ങള് അനുസരിക്കണം. ഐഒസി ഒളിമ്പിക്സുമായി മുന്നോട്ടുപോകാന് തീരുമാനിച്ചാല് നമ്മള് അതില് പങ്കെടുക്കണം, അദ്ദേഹം കൂട്ടിച്ചേര്ത്തു. ഒളിമ്പിക്സുമായി മുന്നോട്ടുപോകാനുള്ള ഐഒസി തീരുമാനത്തിനെതിരെ ചില കായിക താരങ്ങളും ഓഫീഷ്യല്സും പ്രതിഷേധവുമായി രംഗത്തെത്തിയിട്ടുണ്ട്.
ഒളിമ്പിക്സിനുള്ള തയ്യാറെടുപ്പുകള് കൊറോണ മൂലം തടസ്സപ്പെട്ടിട്ടുണ്ട്. കായിക താരങ്ങളുടെ പരിശീലന ക്യാമ്പുകളും യോഗ്യതാ മത്സരങ്ങളും നിര്ത്തിവച്ചിരിക്കുകയാണ്. എല്ലാ രാജ്യങ്ങളിലും ഇന്ത്യയിലേതുപോലുള്ള സാചര്യമാണ് നിലവിലുള്ളത്. അതിനാല് ടോക്കിയോയില് പത്തോ അതില് കൂടുതലോ മെഡലുകള് ഇന്ത്യക്ക് കിട്ടിയേക്കുമെന്ന് അദ്ദേഹം വെളിപ്പെടുത്തി.
കൊറോണ വൈറസ് ബാധിച്ച് ലോകത്ത് ഒമ്പതിനായിരത്തിലേറെ മരിച്ചു. ലോകത്ത് ആകെ രണ്ട് ലക്ഷത്തിലേറെപ്പേര്ക്ക് കൊറോണ ബാധിച്ചിട്ടുണ്ട്. ഇന്ത്യയില് ഇതുവരെ 160 പേര്ക്ക് അസുഖം ബാധിച്ചിട്ടുണ്ട്. മൂന്ന് പേര് മരണ മടഞ്ഞു.
