ടോക്കിയോ: ഒളിമ്പിക്‌സിന് മുന്നോടിയായി ഗ്രീസില്‍ തെളിഞ്ഞ ദീപശിഖ ആളും ആരവവുമില്ലാതെ നാളെ ഒളിമ്പിക്‌സ് നഗരമായ ടോക്കിയോയിലെത്തും. ഗ്രീസിലെ ജാപ്പനീസ് അംബാസിഡര്‍ ഏറ്റവാങ്ങുന്ന ദീപശിഖ വിമാനത്തിലാണ് ടോക്കിയോയിലെത്തിക്കുക. ദീപശിഖ ടോക്കിയോയിലെത്തിയാലും ആഘോഷങ്ങള്‍ വേണ്ടന്നാണ് തീരുമാനം. ലോകത്തെയാകെ ഭീതിയിലാഴ്‌ത്തി കൊറോണ വൈറസ് പടരുന്ന സാഹചര്യത്തില്‍ ഫുട്‌ബോള്‍, ബാസ്‌ക്കറ്റ്‌ബോള്‍, ടെന്നീസ് തുടങ്ങിയ മത്സരങ്ങളെല്ലാം മാറ്റിവച്ചിരുന്നു. എന്നാല്‍ ഒളിമ്പിക്‌സ് മത്സരങ്ങള്‍ ജൂലൈ 24ന് ആരംഭിക്കുമെന്ന പ്രതീക്ഷയിലാണ് ഒളിമ്പിക്‌സ് സംഘാടകര്‍.
ഒളിമ്പിക്‌സ് മാറ്റുന്നതുമായി സംബന്ധിച്ച തീരുമാനങ്ങള്‍ ഇപ്പോഴില്ലെന്നും കൃത്യസമയത്തുതന്നെ തുടങ്ങുമെന്നും അന്താരാഷ്‌ട്ര ഒളിമ്പിക് കമ്മിറ്റി അധികൃതര്‍ നേരത്തെ വ്യക്തമാക്കിയിരുന്നു. ഒളിമ്പിക്‌സ് മത്സരങ്ങള്‍ തുടങ്ങാന്‍ നാല് മാസം ഇനിയുമുള്ള സാഹചര്യത്തില്‍ കൊറോണ പ്രശ്‌നം ബാധിക്കില്ലെന്ന പ്രതീക്ഷയും അവര്‍ പങ്കുവച്ചിരുന്നു. എന്നാല്‍ പല രാജ്യങ്ങളിലും കൊറോണ വ്യാപകമായി പടരുന്ന സാഹചര്യത്തില്‍ താരങ്ങളുടെ പരിശീലനം നിലച്ചിരിക്കുകയാണ്. പലര്‍ക്കും പുറത്തിറങ്ങി വ്യായാമം ചെയ്യാനാവാത്ത അവസ്ഥയാണിപ്പോള്‍. അന്താരാഷ്‌ട്ര മത്സരങ്ങള്‍ ഉപേക്ഷിച്ച സാഹചര്യത്തില്‍ മികച്ച തയാറെടുപ്പുകളും ഇവര്‍ക്ക് നഷ്ടപ്പെട്ടു.
തട്ടിക്കൂട്ടിയുള്ള ഒളിമ്പിക്‌സ് നടത്തേണ്ടെന്ന വാദം പല കോണില്‍നിന്നും ഉയരുന്നുണ്ട്. ജപ്പാനില്‍ കൊറോണ വരും ആഴ്ചകളില്‍ എത്രത്തോളം വ്യാപിക്കുമെന്ന ആശങ്കയിലാണ് കായിക ലോകം. ജപ്പാനില്‍ വ്യാപകമായി പടര്‍ന്നാല്‍ അത് ഒളിമ്പിക്‌സ് മത്സരങ്ങളെ ബാധിക്കുമെന്നുറപ്പ്. ലോകത്തെ ഏറ്റവും വലിയ കായിക മാമാങ്കമായ ഒളിമ്പിക്‌സില്‍ 200ല്‍ അധികം രാജ്യങ്ങളാണ് പങ്കെടുക്കുക. ഈ രാജ്യങ്ങളെല്ലാം വൈറസ് വിമുക്തമാണെന്ന് ഉറപ്പുവരുത്തേണ്ടതുണ്ട്. പല രാജ്യങ്ങളിലേക്കും വൈറസ് പടരുന്നതിനാല്‍ ഇപ്പോള്‍ സുരക്ഷിതരായ രാജ്യങ്ങളും ഭീതിയിലാണ്. നാല് മാസത്തിനിപ്പുറം കൊറോണ പൂര്‍ണമായി വിട്ടൊഴിയുമോയെന്ന ആശങ്ക ജപ്പാനിലെ ഒളിമ്പിക്‌സ് സംഘാടകര്‍ പ്രകടിപ്പിച്ചിരുന്നു.
മികച്ച പ്രകടനം നടത്തേണ്ട ഒളിമ്പിക്‌സ് വേദിയില്‍ താരങ്ങളുടെ പരിതാപകരമായ പ്രകടനം കാണേണ്ടിവരുമോയെന്ന ആശങ്കയും പ്രമുഖ കായിക നിരീക്ഷകര്‍ക്കുണ്ട്. താരങ്ങളില്‍ പലരും നിരീക്ഷണത്തിലാണ്. ഇവര്‍ക്ക് എത്രത്തോളം മികവ് ഒളിമ്പിക്‌സില്‍ നടത്താനാകുമെന്ന് കണ്ടറിയണം. കൊറോണ ബാധയുള്ള രാജ്യങ്ങളെയും താരങ്ങളെയും ഉപേക്ഷിച്ചുള്ള ഒളിമ്പിക്‌സിനെ കായിക ലോകം പിന്തുണയ്‌ക്കില്ലെന്ന് ഉറപ്പ്.
