തിരുവനന്തപുരം: കൊറോണ വിലക്ക് ലംഘിച്ച് സിപിഎം, കോണ്ഗ്രസ് യുവജന സംഘടനകളുടെ സമരനാടകങ്ങള്. നാടുമുഴുവന് കൊറോണ പ്രതിരോധത്തിലേര്പ്പെട്ടിരിക്കുമ്പോള് സംഘം ചേര്ന്ന് സമരം നടത്തുകയാണ് കെഎസ്യുവും ഡിവൈഎഫ്ഐയും. പെട്രോള് വില വര്ധിച്ചുവെന്ന് നുണപ്രചരണം നടത്തി പൊതുജനത്തെപ്പറ്റിക്കുന്നതിന്റെ ഭാഗമായാണ് പ്രതിഷേധ സമരങ്ങള്.
വൈറസ്ബാധ പടരാതിരിക്കാന് വിവാഹ ചടങ്ങുകള്ക്കും മരണാനന്തര ചടങ്ങുകള്ക്കും കര്ശന നിയന്ത്രണമാണ് സര്ക്കാര് ഏര്പ്പെടുത്തിയിരിക്കുന്നത്. എത്രയും വേണ്ടപ്പെട്ടവരെയാണ് ചടങ്ങില് പങ്കെടുപ്പിക്കുന്നത്. മാളുകളിലും പൊതു ഇടങ്ങളിലുമുള്ള ജനക്കൂട്ടത്തെ ഒഴിവാക്കണമെന്ന് കര്ശന നിര്ദ്ദേശങ്ങളാണ് ആരോഗ്യവകുപ്പ് ദിവസവും നല്കിക്കൊണ്ടിരിക്കുന്നത്. കൂടാതെ ജനങ്ങള് കടുത്ത ജാഗ്രത പാലിക്കണമെന്നും പൊതു സ്ഥലങ്ങളില് അഞ്ചില് കൂടുതല് പേര് കൂടരുതെന്ന നിര്ദ്ദേശവും മുഖ്യമന്ത്രി നല്കുമ്പോഴാണ് ഡിവൈഎഫ്ഐയുടെ കൂട്ടം കൂടിയുള്ള സമരം. കൊറോണ വൈറസിനെ ചെറുക്കാന് യുവാക്കള് രംഗത്തിറങ്ങണം എന്ന് പ്രഖ്യാപിച്ച ഡിവൈഎഫ്ഐ സംസ്ഥാന പ്രസിഡന്റ് എ.എ. റഹിം പ്രതിഷേധ സമരത്തിന്റെ ഉദ്ഘാടനവും നിര്വഹിച്ചു.
കൊറോണ പ്രതിരോധ പ്രവര്ത്തനങ്ങള് നടത്തുന്നതില് സംസ്ഥാന സര്ക്കാരിന്റെ പ്രവര്ത്തനങ്ങള് പോരെന്നു പറഞ്ഞ് അതിലേക്കായി നിര്ദേശങ്ങള് മുന്നോട്ടു വച്ച പ്രതിപക്ഷ നേതാവ് രമേശ് ചെന്നിത്തലയുടെ യൂത്ത് കോണ്ഗ്രസുകാരും നടത്തിയത് കൂട്ടം കൂടിയുള്ള പ്രതിഷേധ സമരം. യൂത്ത് കോണ്ഗ്രസിന്റെ ചക്രസ്തംഭനം ഉദ്ഘാടനം ചെയ്തത് എംഎല്എ കൂടിയായ സംസ്ഥാന ഉപാധ്യക്ഷന് ശബരിനാഥാണ്. ഡിവൈഎഫ്ഐ പെട്രോള് പമ്പില് സമരം നടത്തിയപ്പോള് യൂത്ത് കോണ്ഗ്രസുകാര് സമരം നടത്തിയത് സെക്രട്ടേറിയറ്റിനു മുന്നിലും പ്രധാന ജങ്ഷനുകള് കേന്ദ്രീകരിച്ചുമാണ്.
ഒരു സ്വകാര്യ ചാനലിന്റെ റിയാലിറ്റി ഷോയില് നിന്ന് പുറത്തായ മത്സരാര്ത്ഥിക്ക് വിമാനത്താവളത്തില് സ്വീകരണം നല്കിയതിനെ എതിര്ത്ത മന്ത്രി കടകംപള്ളി സുരേന്ദ്രന് തന്റെ സ്വന്തം പാര്ട്ടിയുടെ യുവജന വിഭാഗം ആളെക്കൂട്ടി സമരനാടകം നടത്തുന്നത് കണ്ടില്ലെന്ന് നടിക്കുകയാണ്. മാസ്ക് പോലും ധരിക്കാതെ രോഗം പകരുന്നതിന് ഇടയാക്കുന്ന തരത്തില് അത്യുച്ചത്തില് മുദ്രാവാക്യം വിളിച്ചാണ് സര്ക്കാരിനു പിന്തുണയേകിയുള്ള ഇരു കൂട്ടരുടെയും സമരം.
