ആര്‍പ്പൂക്കര: കോട്ടയം മെഡിക്കല്‍ കോളേജിലെ യുവ ഡോക്ടര്‍ ദമ്പതികളുടെ കിടപ്പറ രംഗങ്ങള്‍ മൊബൈലില്‍ പകര്‍ത്തിയ പ്രധാന പ്രതികളെ റിമാന്റ് ചെയ്തു. ആര്‍പ്പൂക്കര മുതിരക്കാലായില്‍ എം.ആര്‍ രോഹിത്, ആര്‍പ്പൂക്കര സ്വദേശി അന്‍സില്‍ (26) എന്നിവരെയാണ് ഗാന്ധിനഗര്‍ സ്റ്റേഷന്‍ ഹൗസ് ഓഫീസര്‍ ക്ലീറ്റസ് കെ ജോസഫിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.
ഫെബ്രുവരി 20ന് രാത്രിയിലാണ് സംഭവം. പ്രതികള്‍ ഡോക്ടര്‍ ദമ്പതികള്‍ താമസിക്കുന്ന വീടിന്റെ പാരപ്പറ്റില്‍ കയറിക്കൂടി എയര്‍ഹോള്‍ വഴി മൊബൈല്‍ ഫോണും ക്യാമറയും മുറിയ്‌ക്കുള്ളില്‍ കടത്തുകയായിരുന്നു. മൊബൈല്‍ ഫോണ്‍ ശ്രദ്ധയില്‍പ്പെട്ട യുവതി ഭയന്നു ബഹളം വച്ചതോടെ പ്രതികള്‍ ഓടിയൊളിച്ചു. കുറച്ചു കഴിഞ്ഞ് പ്രതികള്‍ ഇതേ വീട്ടില്‍ തിരിച്ചെത്തി ഇവിടെ വലിയ ബഹളം കേട്ടത് എന്തായിരുന്നു എന്നു തിരക്കി. ഇതിനിടയില്‍ യുവാക്കളുടെ കൈയിലിരുന്ന മൊബൈല്‍ ഫോണ്‍ കണ്ട യുവതി ഗാന്ധിനഗര്‍ പോലീസില്‍ വിവരം അറിയിച്ചു. പോലീസ് എത്തിയപ്പോഴേക്കും പ്രതികള്‍ മുങ്ങിയിരുന്നു.
അഞ്ചു ദിവസങ്ങള്‍ക്ക് ശേഷം പ്രതികളില്‍ ഒരാളായ അന്‍സലിനെ പോലീസ് പിടികൂടിയിരുന്നു. കഴിഞ്ഞ ദിവസം പ്രധാന പ്രതി രോഹിത്തിനെയും പോലീസ് മെഡിക്കല്‍ കോളേജ് ആശുപത്രി പരിസരത്തു നിന്നും പിടികൂടി. പ്രതികളുടെ ഫോണില്‍ നിന്നും ആയിരത്തിലധികം അശ്ലീല വീഡിയോ ദൃശ്യങ്ങളും കണ്ടെടുത്തു. ഗാന്ധിനഗര്‍ എസ്.ഐ കെ. ദീപക്, പ്രൊബേഷന്‍ എസ്.ഐ.പി.എസ് പ്രദീപ്, എസ്.ഐമാരായ സജി എം.പി, സജിമോന്‍, തോമസ് എന്നിവരാണ് പ്രതികളെ അറസ്റ്റ് ചെയ്തത്.
പ്രതികരിക്കാൻ ഇവിടെ എഴുതുക: