ബെംഗളൂരു: ജോലി നല്‍കാമെന്ന വാഗ്ദാനത്തോടെ ബംഗ്ലാദേശി പെണ്‍കുട്ടിയെ ബെംഗളൂരുവിലെത്തിച്ച് ലൈംഗികവൃത്തിക്ക് ഉപയോഗിച്ച അഞ്ച് ബംഗ്ലാദേശികളെ പോലീസ് അറസ്റ്റ് ചെയ്തു. പോലീസ് പിടിയിലായവരില്‍ ഒരു സ്ത്രീയും ഉള്‍പ്പെടുന്നു.
ശരീരത്തില്‍ മുറിവുകളോടെ നടപാതയില്‍ ഉറങ്ങുന്നത് കണ്ടെത്തിയതിനെ തുടര്‍ന്നാണ് 17 വയസുകാരിയെ പോലീസ് ബെംഗളൂരുലിലെ മജസ്റ്റിക്ക് നഗരത്തില്‍ നിന്ന് രക്ഷപ്പെടുത്തി കുട്ടികളെ സംരക്ഷിക്കുന്ന വസതിയിലാക്കിയത്. അന്വേഷണത്തില്‍, ജോലി നല്‍കാമെന്ന വ്യാജേന പെണ്‍കുട്ടിയെ നഗരത്തിലേക്ക് കൊണ്ടുവന്നതായും വേശ്യാവൃത്തിക്ക് നിര്‍ബന്ധിച്ചതായും കണ്ടെത്തുകയായിരുന്നു.
സംഭവവമായി ബന്ധപ്പെട്ട് മുഹമ്മദാ മദീസ, കിസലുമുള്ള(37), ഇമ്രാന്‍ മുള്ള(30), ഇയാളുടെ ഭാര്യ സതി(25), ബജിദ(30) എന്നിവരെയാണ് സിദ്ധപുര പോലീസ് അറസ്റ്റ് ചെയ്തത്. പിടിയിലായവരെല്ലാം ബംഗ്ലാദേശികളാണെന്നും ഇവര്‍ക്കെതിരെ പോക്‌സോ നിയമ പ്രകാരം കേസെടുത്തിട്ടുണ്ടെന്നും പോലീസ് വ്യക്തമാക്കി. കൂടാതെ 363(തട്ടികൊണ്ട് പോകല്‍) 370(മനുഷ്യക്കടത്ത്) എന്നീ സെഷനുകളും പ്രതികള്‍ക്കെതിരെ ചുമത്തിയിട്ടുണ്ട്.
രണ്ട് മാസങ്ങള്‍ക്ക് മുമ്പാണ് പെണ്‍കുട്ടിയെ പ്രതി നഗരത്തിലെത്തിച്ചത്. പെണ്‍കുട്ടിയെ കൊടുഗോഡിയിലെ വീട്ടിലെത്തിച്ചാണ് പ്രതികള്‍ പീഡിപ്പിച്ചത്. ഇവരില്‍ നിന്ന് എങ്ങനെയോ രക്ഷപ്പെട്ട പെണ്കുട്ടി മജസ്റ്റിക്കില്‍ എത്തുകയായിരുന്നെന്നാണ് റിപ്പോര്‍ട്ട്.
പ്രതികരിക്കാൻ ഇവിടെ എഴുതുക: