റിയാദ്: കോവിഡ് 19 പ്രചരിക്കാന് തുടങ്ങിയതോടെ ഇന്ത്യയിലേക്കുള്ള വിമാന സര്വ്വീസ് സൗദി അറേബ്യ നിര്ത്തിവെച്ചു. കൊറോണ ഭീതിയുടെ പശ്ചാത്തലത്തില് മുന് കരുതല് എന്ന നിലയ്ക്കാണ് വിമാന സര്വ്വീസ് താത്കാലികമായി നിര്ത്തിവെച്ചിരിക്കുന്നത്.
ഇന്ത്യക്ക് പുറമേ പാക്കിസ്ഥാന്, ശ്രീലങ്ക, ഫിലിപ്പൈന്സ്, യൂറോപ്യന് യൂണിയന്, സ്വിറ്റ്സര്ലാന്ഡ്, സുഡാന്, എത്യോപ്യ, എറിത്രിയ, കെനിയ, ജിബൂട്ടി, സൊമാലിയ എന്നീ രാജ്യങ്ങളിലെ യാത്രകള്ക്കും താത്കാലികമായി വിലക്ക് ഏര്പ്പെടുത്തിയിട്ടുണ്ട്. ഈരാജ്യങ്ങളില് നിന്നുള്ള യാത്രക്കാരെ ഇനി ഒരു അറിയിപ്പ് ഉണ്ടാകുന്നത് വരെ രാജ്യത്തിനകത്തേയ്ക്ക് പ്രവേശിപ്പിക്കില്ലെന്ന് സൗദി സര്ക്കാര് അറിയിച്ചിട്ടുണ്ട്. ഇന്ത്യയില് നിന്നുള്ള ആരോഗ്യ രംഗത്ത് പ്രവര്ത്തിക്കുന്നവര്ക്ക് ഈ വിലക്ക് ബാധകമല്ല.
നിലവില് 45 കൊറോണ കേസുകളാണ് സൗദിയില് റിപ്പോര്ട്ട് ചെയ്തിട്ടുള്ളത്. അതേസമയം സൗദി താത്കാലികമായി വിലക്ക് ഏര്പ്പെടുത്തിയത് മലയാളികള് അടക്കമുള്ളവരെ പ്രതികൂലമായി ബാധിക്കും. എന്നാല് നിലവില് സൗദിയില് നിന്ന് നാട്ടില് പോകാന് റീഎന്ട്രിയോ എക്സിറ്റ്് വിസ നേടി കാത്തിരിക്കുന്നവര്ക്ക് രാജ്യം വിടാനും, വിവിധ രാജ്യങ്ങളില് അവധിയില് കഴിയുന്നവര്ക്ക് സൗദിയിലേക്ക് മടങ്ങി വരാനും സൗദി 72 മണിക്കൂര് സമയം നല്കിയിട്ടുണ്ട്. ഇഖാമയുള്ളവര്ക്കാണ് ഈ സമയം അനുവദിച്ചിരിക്കുന്നത്.
അതിനിടെ അമേരിക്കയില് നിന്ന് യൂറോപ്യന് രാജ്യങ്ങളിലേക്കുള്ള എല്ലാ യാത്രകള്ക്കും പ്രസിഡന്റ് ഡൊണാള്ഡ് ട്രംപ് നിരോധനം ഏര്പ്പെടുത്തി. ഇതോടെ യൂറോപ്യന് രാജ്യങ്ങളില് നിന്ന് അമേരിക്കയിലേക്കുള്ള വിസകളും വ്യാപാരങ്ങളുമെല്ലാം റദ്ദാക്കപ്പെടും.യുഎസില് കൊവിഡ് കേസുകളുടെ എണ്ണം കൂടിയതിനെ തുടര്ന്നാണ് ഈ പ്രസ്താവന. എന്നാല് ബ്രിട്ടന് ചെറിയ ഇളവുകള് നല്കിയിട്ടുണ്ട്.
