ന്യൂദല്ഹി: ഭാരതത്തിന്റെ ഭാവി പ്രധാനമന്ത്രി നരേന്ദ്രമോദിയുടെ കൈകളില് സുരക്ഷിതമാണെന്നും ദീര്ഘ വീക്ഷണത്തോടെയാണ് മോദിജി പ്രവര്ത്തിക്കുന്നതെന്നും വ്യക്തമാക്കി ജ്യോതിരാദിത്യ സിന്ധ്യ. ബിജെപിയില് അംഗമായതോടെ രാജ്യത്തെ ജനങ്ങളെ സേവിക്കാന് അവസരം ലഭിച്ചിരിക്കുകയാണ്.
മോദിയേയും അമിത് ഷായേയും മാതൃകയാക്കി പ്രവര്ത്തിക്കുമെന്നും സിന്ധ്യ പറഞ്ഞു. ബിജെപി ആസ്ഥാനത്ത് നടന്ന ചടങ്ങില് പാര്ട്ടി അംഗത്വം സ്വീകരിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
ഒരു തവണയല്ല, മറിച്ച് രണ്ട് തവണയാണ് മോദിജിയില് ജനങ്ങള് വിശ്വാസമര്പ്പിച്ചത്. മറ്റാര്ക്കും ലഭിക്കാത്ത ജനവിധിയാണ് നരേന്ദ്ര മോദിക്ക് ലഭിച്ചതെന്നും സിന്ധ്യ ചൂണ്ടിക്കാട്ടി. കോണ്ഗ്രസ് അഴിമതി മാത്രം നടത്തുന്ന പാര്ട്ടിയാണെന്ന് വിമര്ശിച്ച സിന്ധ്യ പാര്ട്ടിയുടെ ഇന്നത്തെ അവസ്ഥ വളരെ ദയനീയമാണെന്നും കൂട്ടിച്ചേര്ത്തു.
അതേസമയം, തന്റെ ജീവിതത്തില് പ്രധാനപ്പെട്ട രണ്ട് ദിവസങ്ങളാണ് ഉള്ളതെന്ന് സിന്ധ്യ പറഞ്ഞു. ഒന്ന് അച്ഛനെ നഷ്ടമായ 2001 സപ്തംംബര് 30. അന്ന് മുതലാണ് തന്റെ ജീവിതത്തില് വലിയ മാറ്റങ്ങള് സംഭവിച്ചതെന്നും രണ്ടാമത്തെ ദിവസം 2020 മാര്ച്ച് 10 ആണെന്നും സിന്ധ്യ വ്യക്തമാക്കി.
