ന്യൂദല്‍ഹി: നിര്‍ഭയ കേസില്‍ പ്രതികളുടെ മരണവാറണ്ട് സ്‌റ്റേ ചെയ്തിനു കാരണം ദല്‍ഹി മുഖ്യമന്ത്രി അരവിന്ദ് കേജരിവാള്‍ ആണെന്ന് ആരോപണവുമായി നിര്‍ഭയയുടെ മാതാപിതാക്കള്‍. കേജരിവാള്‍ സര്‍ക്കാര്‍ കേസ് രാഷ്‌ട്രീയ ലാഭത്തിനായി ഉപയോഗിക്കുകയാണെന്ന് നേരത്തേ തന്നെ നിര്‍ഭയയുടെ അമ്മ ആരോപിച്ചിരുന്നു. ഇതിനായി വിധി നടപ്പിലാക്കാന്‍ കാലതാമസം വരുത്തുകയാണെന്നും അവര്‍ പറഞ്ഞു.
മരണ വാറന്റിന് സ്‌റ്റേ പുറപ്പെടുവിച്ച ശേഷം നാടകീയ രംഗങ്ങളാണ് ദല്‍ഹി പട്യാല ഹൗസ് കോടതി പരിസരത്ത് അരങ്ങേറിയത് . കോടതിയില്‍വെച്ച് പ്രതികളുടെ അഭിഭാഷകന്‍ എ.പി സിങ് തന്നെ വെല്ലുവിളിച്ചതായി നിര്‍ഭയയുടെ അമ്മ വെളിപ്പെടുത്തി. വധശിക്ഷ ഒരിക്കലും നടപ്പാക്കില്ലായെന്ന് അയാള്‍ പറഞ്ഞതായും ആശാദേവി ആരോപിച്ചു.
ഇന്നു വൈകിട്ടാണ് പട്യാല കോടതി ജഡ്ജി ധര്‍മേന്ദര്‍ റാണ ഹര്‍ജിയില്‍ ഉത്തരവ് പറഞ്ഞത്. ഇനി ഒരു ഉത്തരവ് ഉണ്ടാകുന്നതെ വരെ വധശിക്ഷയ്‌ക്കു സ്‌റ്റേ നല്‍കുന്നു എന്നു മാത്രമാണ് ജഡ്ജി പറഞ്ഞത്. സംഭവം നടക്കുമ്പോള്‍ തനിക്ക് പ്രായപൂര്‍ത്തിയായില്ലെന്നും വിധി പുനഃപരിശോധിക്കണമെന്നും ആവശ്യപ്പെട്ടായിരുന്നു പവന്‍ ഗുപ്ത ഹര്‍ജി നല്‍കിയത്. ഈ ഹര്‍ജി തള്ളിയതോടെ നാളെ രാവിലെ ആറു മണിക്കാണ് പ്രതികളെ തൂക്കിലേറ്റാനുള്ള ഒരുക്കങ്ങള്‍ നടന്നിരുന്നു. ഇതിനു പിന്നാലെയാണ് സ്‌റ്റേ നല്‍കി പട്യാല കോടതി ഉത്തരവിട്ടത്.
