ന്യൂദല്‍ഹി : പാര്‍ലമെന്റ് ബജറ്റ് സമ്മേളനത്തില്‍ സാമ്പത്തിക വിഷയത്തിലാണ് ശ്രദ്ധ കേന്ദ്രീകരിക്കുന്നതെന്ന് പ്രധാനമന്ത്രി നരേന്ദ്രമോദി. സ്ത്രീശാക്തീകരണത്തിനും അടിച്ചമര്‍ത്തപ്പെട്ട വിഭാഗങ്ങള്‍ക്കുവേണ്ടി പ്രവര്‍ത്തിക്കുന്നതിനുമാണ് കേന്ദ്ര സര്‍ക്കാര്‍ കൂടുതല്‍ ശ്രദ്ധ പതിപ്പിക്കുന്നതെന്നും അദ്ദേഹം മാധ്യമ പ്രവര്‍ത്തകരെ അറിയിച്ചു.
2020ലെ ആദ്യ പാര്‍ലമെന്റ് സമ്മേളമാണിത്. ഈ ദശകത്തിലേതിനും ഇന്നാണ് തുടക്കമിടുന്നത്. അതുകൊണ്ടു തന്നെ ശോഭനമായ ഭാവി ഉറപ്പാക്കാന്‍ രാജ്യം ഒറ്റക്കെട്ടായി പരിശ്രമിക്കേണ്ടതാണ്. സാമ്പത്തിക കാര്യങ്ങളില്‍ ശക്തമായ അടിത്തറ സൃഷ്ടിക്കേണ്ടതുണ്ട്. ബജറ്റ് വിഷയത്തില്‍ ലോക്‌സഭയിലും പാര്‍ലമെന്റിലും വിശാലവും ഗുണപരവുമായ മികച്ച സംവാദങ്ങള്‍ നടക്കണമെന്നാണ് താന്‍ ആഗ്രഹിക്കുന്നത്.
സാമ്പത്തിക കാര്യങ്ങളില്‍ നിലവിലെ ആഗോള സാമ്പത്തിക സ്ഥിതിയെ ഇന്ത്യ ഏത് വിധത്തില്‍ പ്രയോജനപ്പെടുത്താമെന്നതില്‍ കേന്ദ്ര സര്‍ക്കാര്‍ ശ്രദ്ധ കേന്ദ്രീകരിക്കുമെന്നും മോദി കൂട്ടിച്ചേര്‍ത്തു.
അതേസമയം പൗരത്വ നിയമ ഭേദഗതി നടപ്പാക്കിയതിലൂടെ മഹാത്മാഗാന്ധിയുടെ സ്വപ്നം യാഥാര്‍ഥ്യമായതായി രാഷ്‌ട്രപതി രാംനാഥ് കോവിന്ദ് നയപ്രഖ്യാപന വേളയില്‍ അറിയിച്ചു. ബജറ്റ് സമ്മേളനത്തിനായി ചേര്‍ന്ന പാര്‍ലമെന്റിന്റെ ഇരുസഭകളെയും അഭിസംബോധന ചെയ്ത് സംസാരിക്കവേയാണ് ഇക്കാര്യം അറിയിച്ചത്.
ഭരണഘടനയാണ് രാജ്യത്തെ നയിക്കേണ്ടതെന്നും ഭരണഘടനയ്‌ക്ക് അനുസൃതമായാണ് കേന്ദ്രസര്‍ക്കാര്‍ പ്രവര്‍ത്തിക്കുന്നതെന്നും രാഷ്‌ട്രപതി വ്യക്തമാക്കി. കശ്മീരിന്റെ പ്രത്യേക പദവി റദ്ദാക്കിയ നടപടി ചരിത്രപരമാണെന്നും അയോധ്യാവിധി രാജ്യം ഏറെ പക്വതയോടെ സ്വീകരിച്ചെന്നും രാഷ്‌ട്രപതി അറിയിച്ചു.
