ന്യൂദല്ഹി: കൊറോണ വൈറസ് ബാധയെത്തുടര്ന്ന് ചൈനയിലെ വുഹാനില് നിന്ന് ഇന്ത്യക്കാരായ വിദ്യാര്ഥികളെ തിരികെ കൊണ്ടുവരാന് കേന്ദ്ര സര്ക്കാര് നടപടികള് തുടങ്ങി. ബീജിങ്ങിലെ ഇന്ത്യന് എംബസി ഇവരില് നിന്ന് സമ്മതപത്രം വാങ്ങി. രണ്ടു വിമാനങ്ങളില് ഇന്ത്യക്കാരെ നാട്ടിലേക്ക് മടക്കി കൊണ്ടുപോകാന് ചൈന അനുമതി നല്കിയതായും വിദേശകാര്യ വക്താവ് ട്വീറ്റ് ചെയ്തു.
വൈറസ് ബാധയെത്തുടര്ന്ന് ചൈനയില് മരിച്ചവരുടെ എണ്ണം 132 ആയി. വൈറസ് ബാധിതരുടെ എണ്ണം ആറായിരമായി. വൈറസ് ബാധയുടെ പ്രധാന ലക്ഷണമായ ന്യൂമോണിയ അയ്യായിരത്തിലേറെപ്പേര്ക്ക് സ്ഥിരീകരിച്ചതായാണ് റിപ്പോര്ട്ട്. 1200 പേരുടെ നില ഗുരുതരം. മരണം ഇനിയും ഉയര്ന്നേക്കാമെന്നാണ് ലോകാരോഗ്യ സംഘടന നല്കുന്ന സൂചന. ചൈനയുടെ വിവിധ ഭാഗങ്ങളിലായി പതിനായിരത്തോളം പേര് നിരീക്ഷണത്തിലാണ്.
അമേരിക്കയും ജപ്പാനും വുഹാനില് നിന്ന് അവരുടെ പൗരന്മാരെ ഒഴിപ്പിക്കാനുള്ള നടപടി ആരംഭിച്ചു. ബ്രിട്ടനില് മടങ്ങിയെത്തിയവരെ പതിനാലു ദിവസം ഐസൊലേഷന് വാര്ഡുകളില് നിരീക്ഷിക്കാനുമുള്ള സംവിധാനം ഏര്പ്പെടുത്തിയിട്ടുണ്ടെന്ന് ബ്രിട്ടിഷ് ആരോഗ്യ വകുപ്പ് അറിയിച്ചു.
തായ്ലന്ഡ് 14, ഹോങ്കോങ്ങ് എട്ട്, അമേരിക്ക, തായ്വാന്, ഓസ്ട്രേലിയ, മകാവു എന്നിവിടങ്ങളില് അഞ്ച്, ദക്ഷിണ കൊറിയയിലും മലേഷ്യയിലും നാല്, ജപ്പാന് ഏഴ്, കാനഡ മൂന്ന്, വിയറ്റ്നാം രണ്ട്, നേപ്പാള്, കമ്പോഡിയ, ജര്മനി ഒന്ന് വീതം വൈറസ് ബാധകളാണ് ഇതുവരെ ഔദ്യോഗികമായി സ്ഥിരീകരിച്ചത്.
യുഎഇയിലും ആദ്യ വൈറസ് ബാധ സംബന്ധിച്ച റിപ്പോര്ട്ട് വന്നു. വുഹാനില് നിന്നെത്തിയ ഒരു കുടുംബത്തിലെ അംഗങ്ങള്ക്കാണ് രോഗബാധ. ഇവരുടെ ആരോഗ്യനില തൃപ്തികരമാണെന്നും നിരീക്ഷണത്തിലാണെന്നും യുഎഇ ആരോഗ്യമന്ത്രാലയം അറിയിച്ചു.
