തിരുവനന്തപുരം: രമേശ് ചെന്നിത്തല ഇത്രയും തരംതാണ ഒരു പ്രതിപക്ഷനേതാവാണെന്ന് കേരളത്തിനു ബോധ്യമായെന്ന് ബിജെപി ജനറല് സെക്രട്ടറി കെ. സുരേന്ദ്രന്. ഗവര്ണ്ണറെ നിയമസഭയില് തടയുകയും അപമാനിക്കുകയും ചെയ്യുകവഴി ഇവിടുത്തെ പ്രതിപക്ഷം തികച്ചും ജനാധിപത്യവിരുദ്ധരും സാമൂഹ്യവിരുദ്ധരുമാണെന്ന് തെളിയിച്ചിരിക്കുകയാണ്. നടപടി എടുക്കാന് സ്പീക്കര്ക്ക് ബാധ്യതയുണ്ടെന്നും അദേഹം വ്യക്തമാക്കി.
കേരള നിയമസഭ ബജറ്റ് സമ്മേളനത്തിന് മുന്നോടിയായുള്ള നയപ്രഖ്യാപന പ്രസംഗത്തിനെത്തിയ ഗവര്ണര് ആരിഫ് മുഹമ്മദ് ഖാനെ പ്രതിപക്ഷം സഭയുടെ കവാടത്തില് വെച്ചു തന്നെ തടഞ്ഞിരുന്നു. പ്രതിപക്ഷത്തിന്റെ ഗോ ബാക്ക് വിളികളെ ചിരിച്ചു കൊണ്ടാണ് ഗവര്ണര് നേരിട്ടത്. ഗവര്ണറെ തടയാന് ശ്രമിച്ച പ്രതിപക്ഷം ഗോബാക്ക് വിളികളുമായി നടുത്തളത്തിലിറങ്ങി. പിന്നീട് വാച്ച് ആന്റ് വാര്ഡുകള് ഇടപെട്ട് ഗവര്ണറെ ഡയസില് എത്തിച്ചു.
പ്രതിപക്ഷം നിയമസഭയില് എത്തിയത് പ്ലക്കാഡുകളുമായിട്ടാണ്. സിഎഎ വിരുദ്ധ പ്ലക്കാര്ഡുകളായിരുന്നു അംഗങ്ങളുടെ പക്കലുണ്ടായിരുന്നത്. അനുനയവുമായി മുഖ്യമന്ത്രി പിണറായി വിജയനും എകെ ബാലനും രംഗത്തെത്തിയെങ്കിലും അനുനയത്തിന് വഴങ്ങിയില്ല. നയപ്രഖ്യാപന പ്രസംഗം തുടങ്ങിയതോടെ സഭ വിട്ട പ്രതിപക്ഷം രമേശ് ചെന്നിത്തലയുടെ നേതൃത്വത്തില് നിയമസഭ മന്ദിരത്തിന് മുന്നില് കുത്തിയിരുപ്പ് സമരം നടത്തിയിരുന്നു.
