തിരുവനന്തപുരം: ബജറ്റ് സമ്മേളനത്തിന്റെ ആദ്യ ദിനം നയപ്രഖ്യാപനത്തിന് സഭയിലെത്തിയ ഗവര്ണറെ തടഞ്ഞ് പ്രതിപക്ഷം. തന്നെ തടഞ്ഞ പ്രതിപക്ഷ അംഗങ്ങളെ നോക്കി പുഞ്ചിരിച്ച ഗവര്ണര് പത്ത് മിനിറ്റുകള്ക്ക് ശേഷം വാച്ച് ആന്ഡ് വാര്ഡുകളുടെ സുരക്ഷാ അകമ്പടിയോടെ ഡയസിലേക്ക് നടന്നു നീങ്ങി. ഗവര്ണര് സഭയിലേക്ക് കടക്കുന്നതിന് മുമ്പ് തന്നെ കാള് ബാക്ക് വിളികളുമായി പ്രതിപക്ഷം സഭയിലെ നടുത്തളത്തില് നിലയുറപ്പിച്ചിരുന്നു.
സഭയിലെത്തിയ ഗവര്ണറെ നാടകീയ രംഗങ്ങള് ഒരുക്കിയാണ് പ്രതിപക്ഷം സ്വീകരിച്ചത്. പ്ലഗ് കാര്ഡുകള് ഉയര്ത്തി വഴി തടസ്സപ്പെടുത്തിയ പ്രതിപക്ഷ അംഗങ്ങള് പത്തുമിനിട്ടോളം ഗവര്ണറെ തടഞ്ഞുവെച്ചു. വാച്ച് ആന്ഡ് വാര്ഡുകള് എത്തി പ്രതിഷേധക്കാരെ മാറ്റി. ഇതിനിടെ ആലുവ എംഎല്എ അന്വര് സാദത്ത് ഗവര്ണറെ തടയാനായി നിലത്ത് കിടന്നു. നിലത്തുകിടന്ന അന്വര് സാദത്തിനെ വാച്ച് ആന്ഡ് വാര്ഡുകള് ബലം പ്രയോഗിച്ച് നീക്കം ചെയ്യുകയായിരുന്നു.
നയപ്രഖ്യാപന പ്രസംഗത്തില് സിഎഎ വിഷയത്തിലെ സര്ക്കാര് നിലപാടിനോട് വിയോജിപ്പ് ഗവര്ണര് രേഖപ്പെടുത്തി. പൗരത്വ വിരുദ്ധ പരാമര്ശമുള്ള നയപ്രഖ്യാപനത്തിലെ 18-ാം പാരഗ്രാഫ് വായിക്കില്ലെന്നായിരുന്നു ആദ്യ നിലപാടെങ്കിലും വിയോജിപ്പ് പ്രകടിപ്പിച്ച് ഗവര്ണര് നയപ്രഖ്യാപനം പൂര്ണമായി വായിക്കുകയായിരുന്നു.
മലയാളത്തില് ആമുഖ സംഭാഷണം നടത്തിയ ഗവര്ണര് പ്ലാസ്റ്റിക് മുക്ത നിയമസഭ നടപ്പാക്കിയതിനെ സ്പീക്കറെയും എംഎല്എമാരെയും അഭിനന്ദിച്ചു. തുടര്ന്ന് നയപ്രഖ്യാപന പ്രസംഗം ആരംഭിച്ചു.
