ആലപ്പുഴ: അനധികൃത ഹൗസ് ബോട്ടുകള്ക്കെതിരെ നടപടിയെടുക്കണമെന്ന ഹൈക്കോടതി ഉത്തരവ് രണ്ടു വര്ഷം പിന്നിട്ടിട്ടും നടപ്പായില്ല. 2018ലാണ് കോടതി തുറമുഖ വകുപ്പിന് നിര്ദേശം നല്കിയത്. എന്നാല്, ആലപ്പുഴ ജില്ലയില് സര്വീസ് നടത്തുന്ന മിക്ക ഹൗസ്ബോട്ടുകളും അനധികൃതമാണെന്നതാണ് വസ്തുത.
കഴിഞ്ഞ ദിവസം പാതിരാമണലില് ഹൗസ്ബോട്ടിന് തീപിടിച്ചതിനെ തുടര്ന്ന് പോലീസ് വ്യാപകമായി പരിശോധന നടത്തിയെങ്കിലും അനധികൃത ബോട്ടുകള് ഒന്നു പോലും പിടിച്ചെടുക്കാനായില്ല. റെയ്ഡ് വിവരം ചോര്ന്നതിനാല് ഹൗസ്ബോട്ടുകള് മറ്റു സ്ഥലങ്ങളിലേക്ക് മാറ്റി. കെഐവി 2010 നിയമം നിലവില് വന്ന ശേഷം, ആലപ്പുഴയില് 2013 മുതല് ഹൗസ്ബോട്ടുകളുടെ നിര്മാണം നിയന്ത്രിക്കാന് തുറമുഖ വകുപ്പ് തീരുമാനിച്ചിരുന്നു. ബോട്ടുകളുടെ എണ്ണം അനിയന്ത്രിതമായി വര്ധിച്ചതിനാലായിരുന്നു തീരുമാനം. ഇതോടെ മറ്റു ജില്ലകളില് നിന്ന് നിര്മാണ അനുമതി മാത്രം എടുത്തു നിര്മിച്ച ആഡംബര ഹൗസ്ബോട്ടുകള് യാതൊരു രേഖകളുമില്ലാതെ ആലപ്പുഴയില് പ്രവര്ത്തിച്ചു തുടങ്ങി. നിര്മാണ അനുമതി എടുക്കുന്ന ജില്ലയില് മാത്രമെ പ്രവര്ത്തിപ്പിക്കാവൂയെന്ന ചട്ടം ഉന്നത സ്വാധീനം കാരണം ലംഘിക്കപ്പെടുന്നു.
ഏതെങ്കിലും അപകടമുണ്ടാകുമ്പോള് അനധികൃത ബോട്ടുകള് കുറച്ചു സമയത്തേക്ക് മാറ്റും. വീണ്ടും കണക്കില് കവിഞ്ഞ സഞ്ചാരികളുമായി ട്രിപ്പ് പോകും. രജിസ്ട്രേഷന്, ഇന്ഷ്വറന്സ് തുടങ്ങിയവയില്ലാതെ പ്രവര്ത്തിക്കുന്ന ബോട്ടുകള്ക്കെതിരെ ശക്തമായ നടപടിയുണ്ടാകാത്തതാണ് അപകടങ്ങള് തുടര്ക്കഥയാകാന് കാരണം.
