മലപ്പുറം: പൗരത്വ നിയമത്തിനെതിരായ സമരത്തിലെ സ്ത്രീ പങ്കാളിത്തത്തെ വിമര്ശിച്ച് കാന്തപുരം എപി അബൂബക്കര് മുസ്ലിയാര്. സ്ത്രീകള് പുരുഷന്മാരെപ്പോലെ തെരുവില് സമരത്തിന് ഇറങ്ങാന് പാടില്ലെന്ന് കാന്തപുരം പറഞ്ഞു. പൗരത്വനിയമത്തിനെതിരെ രാജ്യത്താകമാനം സ്ത്രീപുരുഷഭേദമന്യേ വലിയ തോതില് പ്രക്ഷോഭം നടക്കുന്ന സാഹചര്യത്തിലാണ് സ്ത്രീകള് സമരത്തിലിറങ്ങരുതെന്ന കാന്തപുരത്തിന്റെ പ്രതികരണം.
പുരുഷന്മാരെ പോലെ മുഷ്ടി ചുരുട്ടാനും മുദ്രാവാക്യം വിളിക്കാനും പാടില്ല. എന്നാല് പൗരത്വനിയമത്തിനെതിരായ പ്രക്ഷോഭത്തിന് സമസ്തയുടെ ഇരുവിഭാഗങ്ങളും യോജിക്കണമെന്ന് പറഞ്ഞ കാന്തപുരം കേരളത്തില് ലൗ ജിഹാദുണ്ടെന്ന് സിറോ മലബാര് സഭ പറയുന്നത് തെറ്റാണെന്നും വാദിച്ചു. ഐക്യം തകര്ക്കാന് ഉദ്ദേശിക്കുന്നവര് പലതും കൊണ്ടുവരും. അതില് വീഴരുതെന്നും കാന്തപുരം കോഴിക്കോട് പറഞ്ഞു.
പൗരത്വനിയമത്തിനെതിരെ സംസ്ഥാനത്ത് നടന്ന സംയുക്ത പ്രതിഷേധത്തില് കാന്തപുരം പങ്കെടുത്തിരുന്നു. സിപിഎം സംഘടിപ്പിച്ച മനുഷ്യശ്യംഖലയിലും മുസ്ലീം സമുദായത്തിലെ വിവിധ വിഭാഗങ്ങള്ക്കൊപ്പം ഇടതുപക്ഷത്തോട് ആഭിമുഖ്യം പുലര്ത്തുന്ന കാന്തപുരം എപി വിഭാഗം സുന്നികള് ഭാഗമായിരുന്നു.
നേരത്തെ പൗരത്വ നിയമത്തിനെതിരേ മുസ്ലിം സ്ത്രീകള് നടത്തുന്ന പ്രകടനങ്ങളെ വിമര്ശിച്ച് കേരള സുന്നി യുവജന സംഘം സെക്രട്ടറി അബ്ദുള് ഹമീദ് ഫൈസി അമ്പലക്കടവും രംഗത്ത് വന്നിരുന്നു. ഖുറാനിെല വാചകങ്ങളും മറ്റും ഉയര്ത്തിക്കാട്ടി ഫേസ്ബുക്ക് പോസ്റ്റിലൂടെയായിരുന്നു ഫൈസിയുടെ വിമര്ശനം.
