തിരുവനന്തപുരം: മാധ്യമപ്രവര്‍ത്തകനെ അപമാനിച്ചെന്ന ആരോപണത്തില്‍ ഹൈക്കോടതിയെ സമീപിക്കുമെന്ന് ടി.പി. സെന്‍കുമാര്‍. തിരുവനന്തപുരം പ്രസ് ക്ലബ്ബില്‍ എന്തു നടന്നു എന്നു കാണിക്കുന്ന മുഴുവന്‍ വീഡിയോയും കൈയിലുണ്ട്. ഇതും ആരോപണം ഉന്നയിച്ച പത്രപ്രവര്‍ത്തകന്‍ വ്യാജ രേഖ ചേര്‍ത്ത് ഉപരാഷ്‌ട്രപതിയുടെ പരിപാടിക്ക് പോയതുമടക്കം ചൂണ്ടിക്കാട്ടി ഹൈക്കോടതിയെ സമീപിക്കുമെന്നും സെന്‍കുമാര്‍ പറഞ്ഞു. പത്രസമ്മേളനത്തിനിടയില്‍ എല്ലാ രീതികളും ലംഘിച്ചു പത്രസമ്മേളനം അലങ്കോലമാക്കാന്‍ ഒരാള്‍ പിന്നില്‍ നിന്ന് ശ്രമിച്ചു. അയാള്‍ പേര് പറയാന്‍ വിസമ്മതിച്ചു.
പത്രപ്രവര്‍ത്തകനാണോയെന്ന് ചോദിച്ചപ്പോള്‍ അതിനും ഉത്തരം പറഞ്ഞില്ല. പത്രപ്രവര്‍ത്തകരുടെ ഇടയില്‍ വന്നു ചോദ്യം ചോദിക്കാന്‍ ഞാന്‍ പറഞ്ഞു. അയാള്‍ പുറകുവാതില്‍ വഴി പുറത്തുകടന്നു. ഇതിനിടെ, മദ്യപിച്ചിട്ടുണ്ടെന്നു പിന്നില്‍ നിന്ന് ആരോ വിളിച്ചു പറഞ്ഞു. ഇയാള്‍ വേദിയില്‍ ചാടിക്കയറി. തന്റെ മേലേക്കു വീഴാന്‍ പോകുന്നതു കണ്ടു നിങ്ങള്‍ മദ്യപിച്ചിട്ടുണ്ടോ എന്നു ചോദിച്ചു. ഒന്നു രണ്ടു പേര് ഇയാളെ പുറത്തേക്ക് മാറ്റാന്‍ ശ്രമിക്കുന്നതു കണ്ട് അത് തടഞ്ഞു, സെന്‍കുമാര്‍ പറഞ്ഞു.
അതിനിടെ, ഒരാള്‍ വന്ന് അയാള്‍ക്ക് കാന്‍സര്‍ ആണെന്നും അതിന്റെ മരുന്നു കാരണമാണ് ആടി പോകുന്നതെന്നും പറഞ്ഞു. പത്രസമ്മേളനത്തിന് ശേഷം താന്‍ അയാളെ കണ്ടു സംസാരിച്ചശേഷമാണ് പോയതെന്നും സെന്‍കുമാര്‍ കൂട്ടിച്ചേര്‍ത്തു. സംഘം ചേര്‍ന്ന ആക്രമിക്കാന്‍ ഗൂഢാലോചന നടത്തിയതിന് സെന്‍കുമാറും പോലീസിന് പരാതി നല്‍കിയിട്ടുണ്ട്.
