മുംബൈ: പാകിസ്ഥാനില്‍ നിന്നും ബംഗ്ലാദേശില്‍ നിന്നും നുഴഞ്ഞുകയറി താമസിക്കുന്ന മുസ്ലീംങ്ങളെ ഇന്ത്യയില്‍ നിന്നും പുറത്താക്കണമെന്ന ആവശ്യവുമായി ശിവസേന. പാര്‍ട്ടി മുഖപത്രമായ സാമ്‌നയിലൂടെയാണ് ശിവസേന നിലപാട് വ്യക്തമാക്കിയത്.
മറാത്താവാദ രാഷ്‌ട്രീയത്തില്‍ തങ്ങള്‍ക്ക് ബദലാകാന്‍ എംഎന്‍എസ് ശ്രമിക്കുന്നു എന്ന് വ്യക്തമായതോടെയാണ് ശിവസേനയുടെ നിലപാട് മാറ്റം. രാജ് താക്കറയുടെ മഹാരാഷ്‌ട്ര നവനിര്‍മ്മാണ്‍ സേന പൗരത്വ നിയമത്തെ അനുകൂലിച്ച് പ്രസ്താവന നടത്തിയിരുന്നു. കൂടാതെ മൂവര്‍ണത്തിന് പകരം കാവി നിറത്തിലുള്ള പതാകയെ പാര്‍ട്ടിയുടെ ഔദ്യോഗിക പതാകയാക്കി പ്രഖ്യാപിക്കുകയും ചെയ്തു. ഇതിനെയും സാമ്‌നയിലെ ലേഖനത്തില്‍ വിമര്‍ശിക്കുന്നുണ്ട് പൗരത്വ നിയമത്തില്‍ ശിവസേന ആദ്യം അനുകൂലിക്കുകയും കോണ്‍ഗ്രസ്സ് ചേരിയില്‍ ചേക്കേറിയശേഷം നിയമത്തെ എതിര്‍ക്കുകയും ചെയ്തിരുന്നു.
പൗരത്വ നിയമത്തിനെ എതിര്‍ത്ത പാര്‍ട്ടി തീരുമാനം അണികളുടെ കൊഴിഞ്ഞുപോക്ക് വര്‍ധിപ്പിച്ചു എന്ന് റിപ്പോര്‍ട്ടുകള്‍ ശിവസേന നേതൃത്വത്തെ പ്രതിരോധത്തിലാക്കിയിരുന്നു. ഈ അവസരം മുതലെടുത്തുള്ള നവനിര്‍മാണ്‍ സേനയുടെ കടന്നുവരവ് ശിവസേനയെ കൂടുതല്‍ പ്രതിരോധത്തിലാക്കിയിരുന്നു. ബദ്ധവൈരികളായ എംഎന്‍എസിനെ പ്രതിരോധിക്കാന്‍ ശിവസേന അനധികൃത മുസ്ലീം കുടിയേറ്റക്കാര്‍ക്കെതിരെ തിരിഞ്ഞത് വരും ദിവസങ്ങളില്‍ മഹാ വികാസ് അഖാഡിയില്‍ കൂടുതല്‍ പ്രശ്‌നങ്ങള്‍ രൂപപ്പെടുന്നതിന് വഴിവെക്കും.
