കൊച്ചി: സ്കൂള് കുട്ടികളുടെ ബാഗിന്റെ ഭാരം കുറക്കാന് സര്ക്കാറുകളും വിദ്യാഭ്യാസ ഏജന്സികളും പുറപ്പെടുവിച്ച ഉത്തരവുകള് സംസ്ഥാനത്തെ എല്ലാ സ്കൂളുകളിലും നടപ്പാക്കാന്ഹൈക്കോടതി ഉത്തരവിട്ടു. ബാഗിന്റെ അമിതഭാരം കുട്ടികളുടെ ആരോഗ്യത്തെ ബാധിക്കുമെന്നും ഇതു നിയന്ത്രിക്കണമെന്നുമാവശ്യപ്പെട്ട് എളംകുളം സ്വദേശി ഡോ. ജോണി സിറിയക് നല്കിയ ഹര്ജിയിലാണ് ഹൈക്കോടതിയുടെ തീരുമാനം.
കേന്ദ്ര, സംസ്ഥാന സര്ക്കാറുകള്, സിബിഎസ്ഇ, വിദ്യാഭ്യാസ അധികൃതര് എന്നിവര് പുറപ്പെടുവിച്ച ഉത്തരവുകള് ശരിയായ അര്ഥത്തില് നടപ്പാക്കുന്നുണ്ടെന്ന് അധികൃതര് ഉറപ്പുവരുത്തണം. ഉത്തരവ് നടപ്പാകുന്നുണ്ടോയെന്ന് ഇടക്കിടെ പരിശോധിക്കണം. കുട്ടികള്ക്ക് ശാരീരിക, മാനസിക ബുദ്ധിമുട്ടുകളുണ്ടാകാതിരിക്കാനുള്ള നടപടികളുടെ ഭാഗമായാണ് ബാഗിന്റെ ഭാരം കുറക്കാന് സര്ക്കുലറുകള് പുറപ്പെടുവിച്ചതെങ്കിലും ഇവ നടപ്പാക്കുന്നില്ലെന്ന് വിലയിരുത്തിയാണ് ചീഫ് ജസ്റ്റീസ് എസ്. മണികുമാര്, ജസ്റ്റീസ് ഷാജി പി. ചാലി എന്നിവരടങ്ങുന്ന ഡിവിഷന്ബെഞ്ചിന്റെ തീരുമാനം. ഒന്ന് മുതല് എട്ട് വരെ ക്ലാസുകളിലുള്ളവര്ക്ക് കനം കുറഞ്ഞ പുസ്തകങ്ങള് നടപ്പാക്കണം,നിര്ദേശങ്ങള് തെലുങ്കാന, മഹാരാഷ്ട്ര സംസ്ഥാനങ്ങളില് ഫലപ്രദമായി നടപ്പാക്കിയതായി കോടതി ചൂണ്ടിക്കാട്ടി.
മികച്ച വിദ്യാഭ്യാസം അടക്കം കുട്ടികളുടെ അവകാശങ്ങള് സംരക്ഷിക്കപ്പെടുന്നുണ്ടെന്ന് ഉറപ്പാക്കണം. അനാവശ്യ ഭാരം ചുമക്കേണ്ടി വരുന്നത് വ്യക്തി സ്വാതന്ത്ര്യത്തേയും ജീവിതത്തേയും ബാധിക്കും. 14 വയസ് വരെയുള്ള കുട്ടികള്ക്ക് സ്വാതന്ത്ര്യത്തോടും സന്തോഷത്തോടും വിദ്യാഭ്യാസം ഉറപ്പാക്കലാണ് വിദ്യാഭ്യാസ അവകാശ നിയമത്തിന്റെ ലക്ഷ്യം.
പ്രായത്തിന് നിരക്കാത്ത ഭാരം അവര്ക്ക് മേല് ചുമത്തരുതെന്ന് ഭരണഘടനയില് വ്യക്തമാക്കിയിട്ടുണ്ട്. ബാല്യവും കൗമാരവും ചൂഷണത്തിന് വിധേയമാകരുത്. അതിനാല്, പരമാവധി ഭാരം കുറക്കാനുള്ള ഉത്തരവാദിത്തം സര്ക്കാറിനും വിദ്യാഭ്യാസ ഏജന്സികള്ക്കുമുണ്ടെന്നും കോടതി പറഞ്ഞൂ.
കുട്ടികളുടെ താല്പര്യം സംരക്ഷിക്കാന് അധികൃതര്ക്ക് ഭരണഘടനാ ബാധ്യതയുണ്ട്. ഉത്തരവുകള് നടപ്പാക്കുന്നുണ്ടെന്ന് അധ്യാപകരും രക്ഷിതാക്കളും പ്രധാനാധ്യാപകരും മറ്റ് ബന്ധപ്പെട്ടവരും ഉറപ്പാക്കണം. സര്ക്കാര് പാഠപുസ്തകങ്ങള് മൂന്നു ഭാഗമാക്കി. ഓരോ ഭാഗവും 60 പേജുകളില് കൂടരുതെന്ന് നിഷ്കര്ഷിച്ചു.
സ്കുളില് കൊണ്ടുവരേണ്ട പാഠപുസ്തകങ്ങളുേടയും വര്ക്ബുക്കുകളുടേയും എണ്ണം പരമാവധി കുറക്കുന്ന വിധം ടൈംടേബിള് തയാറാക്കണമെന്നതടക്കം നിര്ദേശങ്ങളാണ് സിബിഎസ്ഇ നല്കിയിട്ടുള്ളത്. ഒന്ന്, രണ്ട് ക്ലാസുകാര്ക്ക് ബാഗ് ചുമക്കാതിരിക്കാന് ഹോംവര്ക്ക് കൊടുക്കരുത് എന്നും നിര്ദേശമുണ്ട്.
