തിരുവനന്തപുരം: കേരളത്തിന് കേന്ദ്രസര്ക്കാര് നല്കിയ കോടികള് ചെലവാക്കിയതിന്റെ കണക്ക് ചോദിച്ച് പ്രളയദുരിതാശ്വാസ സഹായം നിഷേധിക്കുന്നത് അന്യായമാണെന്ന് ധനമന്ത്രി ടി എം തോമസ് ഐസക്. തുടര്ച്ചയായി രണ്ടുവര്ഷങ്ങളില് സംഭവിച്ച മഹാപ്രളയത്തിന്റെ ദുരിതമനുഭവിക്കുകയാണ് കേരളം.
2018ലെ മഹാപ്രളയത്തെതുടര്ന്ന് അനുവദിച്ച തുക ചെലവഴിച്ചിട്ടില്ലെന്ന ആക്ഷേപമാണ് കേന്ദ്രം ഉന്നയിക്കുന്നത്. തലയെണ്ണി പണം വിതരണം ചെയ്യുന്നതല്ല രീതി. വീടുകളുടെ പുനര്നിര്മാണമാണ് പ്രധാന പദ്ധതികളിലൊന്ന്. ഇതില് ആദ്യരണ്ടുഗഡു വിതരണംചെയ്തു. ബാക്കി രണ്ടുഘട്ടം പൂര്ത്തിയാക്കുമ്പോഴാണ് ശേഷിക്കുന്ന തുക ചെലവാകുയെന്നും അദേഹം പറഞ്ഞു.
റോഡുകള് അടക്കമുള്ളവയുടെ പുനര്നിര്മാണം പുരോഗമിക്കുകയാണ്. ഇവ പൂര്ത്തീകരിച്ച് ബില് ലഭ്യമാകുന്ന മുറയ്ക്കാണ് തുക ചെലവാകുന്നത് രേഖകളില് വരുന്നത്. തുക മറ്റ് ആവശ്യങ്ങള്ക്ക് വകമാറ്റി ചെലവഴിക്കാറുമില്ല. കേന്ദ്രമാനദണ്ഡങ്ങളും സംസ്ഥാനത്തിന് അനുയോജ്യമല്ലെന്നും അദേഹം ന്യായീകരിച്ചു.
തുക അനുവദിച്ചശേഷം ചെലവ് കണക്ക് ലഭ്യമാക്കുന്നതിനനുസരിച്ച് പണം അനുവദിക്കുന്ന നിലപാടും കേന്ദ്രത്തിന് സ്വീകരിക്കാമായിരുന്നു. ആദ്യപ്രളയത്തിന് ലഭിച്ച തുക ഉപയോഗിച്ച് ഭരണാനുമതി നല്കിയവയുടെ നിര്വഹണം പുരോഗമിക്കുകയാണെന്നും അദേഹം പറഞ്ഞു.
