ഓക്‌ലന്‍ഡ്: പേസിനെ തുണയ്‌ക്കുന്ന പിച്ചില്‍ കോഹ്‌ലിപ്പടയ്‌ക്ക് പിടിച്ചുനില്‍ക്കാനാകുമോയെന്ന് ഇന്ന് അറിയാം. ഓസ്‌ട്രേലിയയിലെ ടി 20 ലോകകപ്പിനായി തയ്യാറെടുക്കുന്ന ഇന്ത്യ അഞ്ചു മത്സരങ്ങളുടെ പരമ്പരയിലെ ആദ്യ മത്സരത്തില്‍ ന്യൂസിലന്‍ഡിനെ നേരിടും. ഓക്‌ലന്‍ഡിലെ ഈഡന്‍ പാര്‍ക്കില്‍ 12.20 ന് കളി തുടങ്ങും.
ഓക്‌ലന്‍ഡിലെ വേഗമാര്‍ന്ന പിച്ചിലാണ് മത്സരം. പിടിച്ചുനിന്നാല്‍ കോഹ്‌ലിക്കും കൂട്ടര്‍ക്കും മറ്റൊരു വിജയം കൂടി പോക്കറ്റിലാക്കാം. കരുത്തരായ ഓസ്‌ട്രേലിയക്കെതിരെ സ്വന്തം മണ്ണില്‍ 2-1 ന് ഏകദിന പരമ്പര സ്വന്തമാക്കിയതിന്റെ ആവേശത്തിലാണ് ഇന്ത്യ. കഴിഞ്ഞ ഞായറാഴ്ചയാണ് ഓസീസിനെതിരായ അവസാന മത്സരം കളിച്ചത്. ചൊവ്വാഴ്ച ഇന്ത്യന്‍ ടീം ഓക്‌ലന്‍ഡില്‍ എത്തി. ബുധാഴ്ചത്തെ വിശ്രമത്തിനുശേഷം ഇന്നലെ പരിശീലനം നടത്തി.
പരിക്കേറ്റ ഓപ്പണര്‍ ശിഖര്‍ ധവാന്, ഹാര്‍ദിക് പാണ്ഡെ, ദീപക് ചഹര്‍, ഭുവനേശ്വര്‍ കുമാര്‍ എന്നിവരെ കൂടാതെയാണ് ഇന്ത്യന്‍ ടീം ന്യൂസിലന്‍ഡില്‍ മത്സരിക്കുന്നത്. ധവാന് പകരം മലയാളി താരം സഞ്ജു സാംസണ്‍ ടീമിലെത്തി. സഞ്ജു ഇന്ന് കളിക്കുമോയെന്ന് കണ്ടറിയണം.
ധവാന്റെ അസാന്നിദ്ധ്യത്തില്‍ സ്ഥാനക്കയറ്റം കിട്ടിയ കെ.എല്‍. രാഹുല്‍ വിന്‍ഡീസിനെതിരായ പരമ്പരയില്‍ തകര്‍ത്തു കളിച്ചു. ഓസ്‌ട്രേലിയക്കെതിരായ ഏകദിന പരമ്പരയിലും മോശമായില്ല. ഋഷഭ് പന്തിന് പരിക്കേറ്റതിനെ തുടര്‍ന്ന് ഓസ്‌ട്രേലിയക്കെതിരായ അവസാന രണ്ട് ഏകദിനങ്ങളിലും രാഹുലാണ് വിക്കറ്റ് കാത്തത്. തകര്‍പ്പന്‍ പ്രകടനം കാഴ്ചവയ്‌ക്കുകയും ചെയ്തു.
ടി 20 യിലും ഏകദിനത്തിലും രാഹുല്‍ കീപ്പറായി തുടരുമെന്ന് നായകന്‍ കോഹ്‌ലി വ്യക്തമാക്കി. ഇന്ന് രാഹുലും രോഹിത് ശര്‍മയും ഇന്ത്യന്‍ ഇന്നിങ്‌സ് ഓപ്പണ്‍ ചെയ്യും. കോഹ് ലി മൂന്നാം നമ്പറില്‍ തന്നെ ഇറങ്ങും. മനീഷ് പാണ്ഡെ സ്‌പെഷ്യലിസ്റ്റ ബാറ്റ്‌സ്മാനായി അഞ്ചാം സ്ഥാനത്ത് കളിക്കാനിറങ്ങും. ശ്രേയസ് അയ്യര്‍ തന്നെയായിരിക്കും നാലാമന്‍.പേസര്‍മാരായി മുഹമ്മദ് ഷമിയും ജസ്പ്രീത് ബുംറയും പ്ലേയിങ് ഇലവനില്‍ ഉണ്ടാകും. മൂന്നാം പേസറായി ഷാര്‍ദുല്‍ താക്കുറിനോ നവ്ദീപ് സെയ്‌നിക്കോ അവസരം ലഭിക്കും.
കഴിഞ്ഞവര്‍ഷത്തെ ടി 20 പരമ്പരയില്‍ ന്യൂസിലന്‍ഡ് ഇന്ത്യയെ 2-1 ന് തോല്‍പ്പിച്ചു. അതിനുശേഷം നടന്ന ശ്രീലങ്കന്‍ പര്യടനത്തിലും ന്യൂസിലന്‍ഡ് 2-1 ന്റെ വിജയം സ്വന്തമാക്കി. പിന്നീട് ഇംഗ്ലണ്ടിനെതിരെ സ്വന്തം മണ്ണില്‍ നടന്ന പരമ്പര സമനിലയായി 2-2.പ്രധാന കളിക്കാരുടെ പരിക്ക് ന്യൂസിലന്‍ഡിന് പ്രശ്‌നമാണ്. പരിക്കേറ്റ പേസര്‍മാരായ ട്രെന്റ് ബോള്‍ട്ട്, ഫെര്‍ഗ്യൂസന്‍, മാറ്റ് ഹെന്റി എന്നിവര്‍ ഇന്ത്യക്കെതിരെ മത്സരിക്കില്ല. ഈഡന്‍ പാര്‍ക്കിലെ ഔട്ട് ഫീല്‍ഡ് ചെറുതായതിനാല്‍ ന്യൂസിലഡന്‍. രണ്ട് സ്പിന്നര്‍മാരെ കളിപ്പിക്കുന്ന കാര്യം സംശയമാണ്. ഇഷ് സോധിയും മിച്ചല്‍ സാന്ററുമാണ് കിവീസിന്റെ സ്പിന്നര്‍മാര്‍. ആദ്യ രണ്ട് ടി 20 മത്സരങ്ങളും ഈ വേദിയിലാണ് നടക്കുക.
