കൊച്ചി: മരടില് തീരപരിപാലന നിയമം ലംഘിച്ച് ഫ്ളാറ്റുകള് നിര്മിക്കാന് വഴിവിട്ട് അനുമതി നല്കിയ മരട് പഞ്ചായത്ത് മുന് പ്രസിഡന്റും സിപിഎം തൃപ്പൂണിത്തുറ ഏരിയ കമ്മിറ്റി അംഗവുമായ കെ.എ. ദേവസിയെ ക്രൈംബ്രാഞ്ച് അറസ്റ്റ് ചെയ്തേക്കും. ദേവസിയുടെ സ്വത്ത് കണ്ടുകെട്ടാനും നീക്കം.
ദേവസിയെ പ്രതിചേര്ക്കുന്നതില് സര്ക്കാര്, ഡയറക്ടര് ജനറല് ഓഫ് പ്രോസിക്യൂഷന്റെ നിയമോപദേശം തേടി. ദേവസിയെ പ്രതിചേര്ക്കാന് അനുമതി തേടി ക്രൈംബ്രാഞ്ച് സര്ക്കാരിനെ സമീപിച്ചിരുന്നു. ചട്ടങ്ങളും നിയമങ്ങളും ലംഘിച്ചാണ് ഫ്ളാറ്റുകള് നിര്മിക്കാന് പഞ്ചായത്ത് പ്രസിഡന്റ്് എന്ന നിലയില് ദേവസി അനുമതി നല്കിയതെന്നും ഇതുവഴി സാമ്പത്തിക നേട്ടമുണ്ടാക്കിയെന്നുമാണ് ക്രൈംബ്രാഞ്ചിന്റെ കണ്ടെത്തല്.
അഴിമതി നിരോധന നിയമ പ്രകാരവും പോലീസ് ആക്ട് പ്രകാരവും ദേവസിക്കെതിരെ കുറ്റങ്ങള് ചുമത്തണമെന്ന് ക്രൈംബ്രാഞ്ച് റിപ്പോര്ട്ടില് പറയുന്നു. അനധികൃത ഫ്ളാറ്റ് പൊളിക്കാന് ഉത്തരവിട്ട സുപ്രീംകോടതി, കുറ്റക്കാര്ക്കെതിരെ കേസെടുത്ത് അന്വേഷണം നടത്തണമെന്ന് ആവശ്യപ്പെട്ടിരുന്നു. ഇതിന്റെ അടിസ്ഥാനത്തിലാണ് ക്രൈംബ്രാഞ്ച് അന്വേഷണം ആരംഭിച്ചത്. മുന് പഞ്ചായത്ത് സെക്രട്ടറി, ജൂനിയര് സൂപ്രണ്ട്, ഫ്ളാറ്റ് നിര്മാതാക്കള് എന്നിവരെ അറസ്റ്റ് ചെയ്തിരുന്നു. 2006ലാണ് മരടിലെ ഫ്ളാറ്റ് നിര്മാണത്തിന് പഞ്ചായത്ത് അനുമതി നല്കിയത്. അന്ന് പ്രസിഡന്റായിരുന്ന ദേവസിയുടെ നേതൃത്വത്തിലുള്ള ഭരണസമിതിയാണ് അനുമതി നല്കിയതെന്നും അദ്ദേഹത്തിന്റെ നിര്ദേശം നടപ്പാക്കുക മാത്രമായിരുന്നു താന് ചെയ്തതെന്നും മുന് പഞ്ചായത്ത് സെക്രട്ടറി മുഹമ്മദ് അഷറഫ് ക്രൈംബ്രാഞ്ചിന് മൊഴി നല്കിയിരുന്നു.
മിനിറ്റ്സ് കൃത്രിമമായി ഉണ്ടാക്കിയതാണെന്ന് 2006ലെ ഭരണസമിതിയിലെ തന്നെ ചിലര് മൊഴി നല്കി. അഴിമതി നിരോധന നിയമ പ്രകാരം ഒരു പൊതുപ്രവര്ത്തകനെ പ്രതിയാക്കാന് സര്ക്കാരില് നിന്ന് അനുമതി വേണമെന്നതിനാലാണ് ക്രൈംബ്രാഞ്ച് അനുമതി തേടിയത്. എന്നാല്, ഒരു മാസമായിട്ടും സര്ക്കാര് ഇക്കാര്യം പരിഗണിച്ചില്ല. തുടക്കത്തില് ദേവസിയെ രക്ഷിക്കാനാണ് സര്ക്കാര് ശ്രമിച്ചത്. കൃത്യമായ തെളിവുണ്ടായിട്ടും അഴിമതിയില് പങ്കുണ്ടെന്ന് വ്യക്തമായിട്ടും സര്ക്കാര് ദേവസിക്കെതിരെ നടപടിയെടുക്കാന് മടിക്കുകയും വൈകിപ്പിക്കാന് ശ്രമിക്കുകയുമായിരുന്നു.
