തലശ്ശേരി: തലശ്ശേരിയിലും അനധികൃത കെട്ടിടങ്ങള് നിരവധി. തലശ്ശേരി സഹകരണ ആശുപത്രി, പേള്വ്യു റീജന്സി, തലശ്ശേരി സിറ്റി സെന്റര്, കുയാലി എംസി എന്ക്ലേവ്, കണ്ടിക്കല് പ്രദേശത്ത് നിര്മ്മിക്കാന് പോവുന്ന കെട്ടിടങ്ങള് എല്ലാം കണ്ടല്കാട് വെട്ടി തെളിച്ചാണ് കയ്യേറിയിരിക്കുന്നത്. തീരദേശ നിയമത്തെ വെല്ലുവിളിച്ചു കൊണ്ടാണ് കടലോരങ്ങളില് കൂറ്റന് ഫ്ളാറ്റുകളുടെ നിര്മ്മാണം പുരോഗമിക്കുന്നത്.
തലശ്ശേരി ബിഷപ്പ് ഹൗസിന് പിന്നിലും ധര്മ്മടത്തും കടല്തീരം കയ്യേറിയാണ് നിര്മ്മാണം നടക്കുന്നത്. ഈ അനധികൃത കെട്ടിടങ്ങള്ക്കെതിരെ വ്യാപകമായ പരാതികള് നേരത്തെ പലപ്പോഴായി ഉയര്ന്നിരുന്നുവെങ്കിലും രാഷ്ട്രീയ പാര്ട്ടികളുടേയും ഉദ്യോഗസ്ഥരുടേയും പണത്തോടുള്ള ആര്ത്തി കാരണം നടപടികളൊന്നും ഇതുവരെ ഉണ്ടായിട്ടില്ല. എന്നാല് മരടിലെ വന് കെട്ടിടങ്ങള് പൊളിക്കപ്പെട്ടതോടെ ഇത്തരം കെട്ടിടങ്ങള്ക്കെതിരെ വീണ്ടും പരാതികള് ഉയര്ന്നു വരികയാണ്. ഇതിന്റെ ഭാഗമായി തലശ്ശേരി കുയ്യാലിയിലെ എംസി റിവര് സൈഡ് എന്ക്ളേവിന്റെ മാനേജിംഗ് ഡയരക്ടര്ക്ക് അഡ്വ. സി. സത്യന് മുഖേന നോട്ടീസ് അയച്ചിരിക്കയാണ്.
കണ്ണൂര് ശിവഗംഗയില് സതീഷ് കുമാറാണ് പരാതിക്കാരന്. പരിസ്ഥിതി ലോലമായ പ്രദേശത്ത് നിയമവിരുദ്ധമായി തണ്ണീര്തടം മണ്ണിട്ട് നികത്തിയാണ് പാര്പ്പിട സമുച്ചയം നിര്മ്മിച്ചിട്ടുള്ളതെന്നാണ് ആരോപണം. കണ്ടല്കാടുകള് നിറഞ്ഞുനിന്ന സ്ഥലത്ത് വനംവകുപ്പിന്റെ അനുമതി തേടിയിട്ടില്ലെന്നും വേലിയേറ്റവും വേലിയിറക്കവും അനുഭവപ്പെടുന്ന എരഞ്ഞോളി പുഴയുടെ അഞ്ച് മീറ്റര് പോലും അകലം പാലിക്കാതെ പുഴയുടെ പേര് പോലും മാറ്റി കാണിച്ചാണ് നിര്മ്മാണം നടത്തിയതെന്നും വെള്ളം നിറഞ്ഞ ചെമ്മീന്പാടങ്ങള് നികത്തുകവഴി പരിസ്ഥിതി ദുര്ബലമായ പ്രദേശം കൂടുതല് ദുര്ബലമായി തീര്ന്നുവെന്നും നഗരസഭയില് നിന്നും അണ് ഓതറൈസ്ഡ് കണ്സ്ട്രക്ഷന് എന്ന നിലയിലാണ് കെട്ടിട നമ്പര് സമ്പാദിച്ചതെന്നും നോട്ടീസില് ആരോപിച്ചിട്ടുണ്ട്. അതിനാല് ഈ കെട്ടിടങ്ങള് ഉടനെ പൊളിച്ചു നീക്കണമെന്നാണ് നോട്ടീസില് ആവശ്യപ്പെടുന്നത്.
ഇതിന് പിന്നാലെ മറ്റ് അനധിക്യത കെട്ടിടങ്ങള്ക്കെതിരെയും പരാതി നല്കാനാണ് പരിസ്ഥിതി പ്രവര്ത്തകരും മറ്റും തയ്യാറെടുക്കുന്നത്. ഇത്തരം കെട്ടിടങ്ങള്ക്കെതിരേയും മരട് മോഡല് നടപടി വന്നാല് തലശ്ശേരിയിലെ രാഷ്ട്രീയ-ഉദ്യോഗസ്ഥ-ഭൂമാഫിയാ കൂട്ടുകെട്ടിനെ പിടിച്ചു കെട്ടാനാവുമെന്നാണ് നാട്ടുകാര് കരുതുന്നത്.
