തിരുവനന്തപുരം: സംസ്ഥാന സര്ക്കാരിനെ രൂക്ഷമായി വിമര്ശിച്ച് ഗവര്ണര് ആരിഫ് മുഹമ്മദ് ഖാന്. പൗരത്വ നിയമ ഭേദഗതിയെ ചോദ്യം ചെയ്ത് സംസ്ഥാനം സുപ്രീം കോടതിയെ സമീപിച്ചതില് ചീഫ് സെക്രട്ടറി ടോം ജോസ് രാജ്ഭവനില് എത്തി നേരിട്ട് വിശദീകരണം നല്കി മണിക്കൂറുകള്ക്കകമാണ് ഗവര്ണര് സര്ക്കാര് നടപടിയെ വീണ്ടും വിമര്ശിച്ചത്. ചീഫ് സെക്രട്ടറി എത്തി നല്കിയ വിശദീകരണം എന്തെന്ന് തനിക്ക് പറയാനാകില്ല, പക്ഷേ സുപ്രീം കോടതിയെ സമീപിക്കും മുന്പ് ഗവര്ണറെ അറിയിക്കണം എന്നതാണ് ഭരണഘടനപരമായ ചട്ടം. അതു ലംഘിച്ച ശേഷം എന്തു വിശദീകരണം നല്കിയാലും അതു തന്നെ തൃപ്തനാക്കില്ല. സര്ക്കാരുമായി വ്യക്തിപരമായി ഒരു പ്രശ്നവുമില്ല. ഗവര്ണര് എന്ന സ്ഥാനത്ത് ഇരുന്നുകൊണ്ടു കേരളത്തില് ഒരു ഭരണഘടന ലംഘനത്തിനും താന് അനുവദിക്കില്ല. സുപ്രീം കോടതിയെ സമീപിച്ചതു തന്നെ നിയമപരമായി തെറ്റാണ്. സംസ്ഥാനത്തെ ഒരു രീതിയിലും ബാധിക്കാത്ത വിഷയമാണ് പൗരത്വ പ്രശ്നം. നിയമപരമായി തെറ്റായ കാര്യം സര്ക്കാര് പിന്വലിക്കണോ വേണ്ടയോ എന്നു സര്ക്കാരിനു തീരുമാനിക്കാം. പക്ഷേ,താന് ഭരണഘടനപരമായ ചട്ടലംഘനം മാത്രമേ ചൂണ്ടിക്കാട്ടൂ. നിയമസഭയുടെ പ്രവര്ത്തനങ്ങള് സംബന്ധിച്ച ചട്ടങ്ങളിലും സംസ്ഥാനത്തെ ബാാധിക്കാത്ത വിഷയങ്ങള് ചര്ച്ച ചെയ്യേണ്ടെന്നു വ്യക്തമാക്കുന്നുണ്ട്. പ്രമേയം പാസാക്കിയതിലൂടെ അതും ലംഘിച്ചെന്നും ഗവര്ണര്.
നേരത്തേ, പൗരത്വ നിയമ ഭേദഗതിയെ ചോദ്യം ചെയ്ത് സംസ്ഥാനം സുപ്രീം കോടതിയെ സമീപിക്കുന്ന കാര്യം ഗവര്ണറെ അറിയിക്കാതിരുന്നത് മനപ്പൂര്വമല്ലെന്ന് ചീഫ് സെക്രട്ടറി വിശദീകരണം നല്കിയിരുന്നു. മുന്പും കേന്ദ്ര നിയമങ്ങളെ ചോദ്യം ചെയ്ത് സുപ്രീം കോടതിയെ സമീപിച്ചിട്ടുണ്ടെന്നും അതേ രീതി തുടരുക മാത്രമാണ് ചെയ്തതെന്നും ചീഫ് സെക്രട്ടറി ടോം ജോസ് രാജ്ഭവനിലെത്തി ഗവര്ണറെ അറിയിച്ചത്.
പൗരത്വ നിയമ ഭേദഗതി ചോദ്യം ചെയ്ത് സംസ്ഥാനം സുപ്രീം കോടതിയെ സമീപിച്ചത് തന്നെ അറിയിക്കാതിരുന്നതിന് ഗവര്ണര് വിശദീകരണം തേടിയിരുന്നു. സര്ക്കാര് നടപടി റൂള്സ് ഒഫ് ബിസിനസിന്റെ ലംഘനമെന്നു ചൂണ്ടിക്കാട്ടിയായിരുന്നു ഗവര്ണര് വിശദീകരണം ആരാഞ്ഞത്. ഗവര്ണറെ അവഗണിച്ചു മുന്നോട്ടുപോവുകയല്ല സര്ക്കാര് ചെയ്തതെന്ന് ചീഫ് സെക്രട്ടറി അറിയിച്ചു. പൗരത്വ നിയമ ഭേദഗതിയില് സംസ്ഥാനത്ത് കടുത്ത ആശങ്ക നിലനില്ക്കുന്നുണ്ട്. ഇതു പ്രതിഫലിപ്പിക്കുന്നതാണ് സര്ക്കാര് നടപടി. നിയമത്തിന്റെ കാര്യത്തില് സര്ക്കാരിനും വ്യക്തതക്കുറവുണ്ട്. ഇതു നീക്കുന്നതിനായാണ് സുപ്രീം കോടതിയെ സമീപിച്ചത് ചീഫ് സെക്രട്ടറി അറിയിച്ചിരുന്നു. എന്നാല്, ഈ വിശദീകരണത്തിലും ഗവര്ണര് തൃപ്തനല്ലെന്ന സൂചനയാണ് ഇപ്പോള് പുറത്തുവരുന്നത്.
