ബെംഗളൂരു: കേന്ദ്ര ആഭ്യന്തരമന്ത്രി അമിത് ഷായുടെ പരിപാടിക്കിടെ പ്രതിഷേധിക്കാന് പദ്ധതിയിട്ട മലയാളി അടക്കമുള്ള പത്ത് എസ്ഡിപിഐക്കാര് പിടിയില്. പൗരത്വ നിയമ ഭേദഗതിയെ അനുകൂലിച്ച് ഇന്നലെ ഹുബ്ബള്ളിയില് നടന്ന റാലിയില് പങ്കെടുക്കാന് അമിത് ഷാ എത്തുമ്പോള് പ്രതിഷേധിക്കാനായിരുന്നു സംഘത്തിന്റെ പദ്ധതി. ഇതു സംബന്ധിച്ച് രഹസ്യാന്വേഷണ വിഭാഗത്തിന് ലഭിച്ച വിവരത്തെ തുടര്ന്നാണ് എല്ലാവരെയും കസ്റ്റഡിയില് എടുത്തത്.
നേരത്തെ ബിജെപി എംപി തേജസ്വി സൂര്യയെ വധിക്കാന് പോപ്പുലര് ഫ്രണ്ട് ഗൂഢാലോചന നടത്തിയതായി കണ്ടെത്തിയിരുന്നു. പൗരത്വ ഭേദഗതി നിയമവുമായി ബന്ധപ്പെട്ട് കഴിഞ്ഞ മാസം 22ന് നടന്ന റാലിക്കിടെ കൊലപ്പെടുത്താനാണ് ഇവര് പദ്ധതിയിട്ടത്. ഇതുമായി ബന്ധപ്പെട്ട് ആറ് പേര് ബെംഗളൂരു പോലീസിന്റെ പിടിയിലായിരുന്നു.
ബിജെപി അനുകൂലിയും നടനുമായ ചക്രവര്ത്തി സുലിബെലേയും വധിക്കാന് അക്രമികള് പദ്ധതി തയ്യാറാക്കിയിരുന്നു. അറസ്റ്റിലായതില് എസ്ഡിപിഐ പ്രവര്ത്തകരായ സാദ്ഖി, അക്ബര് എന്നിവര് ഉള്പ്പെടും. സെയ്ദ്, ഇര്ഫാന്, സനൗള്ള, അമീന് എന്നിവരാണ് അറസ്റ്റിലായ ബാക്കിയുള്ളവര് കര്ണ്ണാടക ടൂറിസം മന്ത്രിയാണ് ഇതുസംബന്ധിച്ചുള്ള വാര്ത്ത പുറത്തുവിട്ടത്. അതേസമയം അതുമായി ബന്ധപ്പെട്ട് സംസ്ഥാന ആഭ്യന്തര വകുപ്പും ബെംഗളൂരു പോലീസും കൃത്യസമയത്ത് തക്ക നടപടി സ്വീകരിച്ചെന്നും മന്ത്രി രവി അറിയിച്ചു. അതേസമയം എസ്ഡിപിഐ പോലെ തീവ്ര മനോഭാവമുള്ള സംഘടനയ്ക്ക് നിരോധനം കൊണ്ടുവരണമെന്നും അദ്ദേഹം ആവശ്യപ്പെട്ടു.
പൗരത്വ ഭേദഗതി നിയമത്തെ അനുകൂലിച്ച് ബിജെപിയുടേയും ആര്എസ്എസിന്റേയും നേതൃത്വത്തില് റാലി നടത്തുന്നതിനിടെ ഇവര് മോട്ടോര്ബെക്കുകളില് എത്തിയിരുന്നു. സംശയാസ്പദമായ സാഹചര്യത്തില് ഇവരെ കണ്ടതോടെ പോലീസ് അറസ്റ്റ് ചെയ്യുകയായിരുന്നു. തുടര്ന്ന് വിശദമായി നടത്തിയ ചോദ്യം ചെയ്യലിലാണ് തേജസ്വി സൂര്യയേയും സിലിബെലേയും കൊലപ്പെടുത്താനെത്തിയ അക്രമികളാണെന്ന് വെളിപ്പെടുത്തിയത്.
