ഇടുക്കി: വരയാടുകളുടെ പറുദീസയായ ഇരവികുളം ദേശീയോദ്യാനം അടച്ചിടും. വരയാടുകളുടെ പ്രജനനവുമായി ബന്ധപ്പെട്ട് ജനുവരി 21 മുതല്‍ മാര്‍ച്ച് 20 വരെയാണ് അടച്ചിടുന്നത്. ഈ കാലയളവില്‍ സഞ്ചാരികള്‍ക്ക് പ്രവേശനം അനുവദിക്കില്ല.
വരയാടുകള്‍ക്ക് സുരക്ഷിതമായ പ്രജനനകാലം ഉറപ്പുവരുത്തുന്നതിനും വരയാടിന്‍ കുഞ്ഞുങ്ങള്‍ക്ക് സന്ദര്‍ശക സാന്നിധ്യം കൊണ്ട് ഉണ്ടാകുന്ന ബുദ്ധിമുട്ടുകള്‍ ഒഴിവാക്കുന്നതിനുമാണ് നടപടിയെന്ന് പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ആന്‍ഡ് ചീഫ് വൈഡ് ലൈഫ് വാര്‍ഡന്റെ ഉത്തരവില്‍ പറയുന്നു.
സാധാരണയായി എല്ലാ വര്‍ഷവും വരയാടുകളുടെ പ്രജനന കാലത്ത് 60 ദിവസത്തേക്ക് ഉദ്യാനം അടച്ചിടാറുണ്ട്. ചില സമയങ്ങളില്‍ അടച്ചിടല്‍ കാലവധി നീട്ടും. കുഞ്ഞുങ്ങള്‍ ജനിച്ച് രണ്ട് മാസത്തേക്ക് യാതൊരു തരത്തിലുള്ള ബുദ്ധിമുട്ടുകളും ഉണ്ടാകാന്‍ പാടില്ല.
കഴിഞ്ഞ വര്‍ഷം മെയ് മാസത്തില്‍ നടത്തിയ സെന്‍സസില്‍ ആയിരത്തില്‍ താഴെ വരയാടുകളെ മാത്രമാണ് കണ്ടെത്തിയത്. ഇവയില്‍ 100നും 120നും ഇടയില്‍ ആടുകള്‍ പ്രജനനവുമായി ബന്ധപ്പെട്ട് നിരീക്ഷണത്തിലായിരുന്നു. പൊങ്കല്‍ അവധി പ്രമാണിച്ച് ഇപ്പോള്‍ രാജമലയില്‍ നല്ല തിരക്കാണ് അനുഭവപ്പെടുന്നത്. ദിവസം മൂവായിരത്തിനടുത്ത് സന്ദര്‍ശകരെത്തുന്നു.
