ന്യൂദല്ഹി: മകളെ കൂട്ടബലാത്സംഗം ചെയ്ത് കൊന്ന കേസില് വധശിക്ഷക്ക് വിധിക്കപ്പെട്ട പ്രതികള്ക്ക് മാപ്പ് കൊടുക്കണമെന്ന നിര്ദേശം തന്റെ മുന്നില് വെയ്ക്കാന് ഇന്ദിരാ ജെയ്സിങ് ആരാണെന്ന് ആശാ ദേവി. പ്രതികളെ തൂക്കിലേറ്റണമെന്ന് രാജ്യം മുഴുവന് ആഗ്രഹിച്ചുകൊണ്ടിരിക്കുന്നു. ഇന്ദിരാ ജെയ്സിങിനെ പോലുള്ള ആളുകള് കാരണം ബലാത്സംഗത്തിന് ഇരയായവര്ക്ക് നീതി ലഭ്യമാകുന്നില്ലെന്നും ആശാ ദേവി പറഞ്ഞു.
ഇന്ദിരാ ജെയ്സിങിനെ പോലുള്ള ആളുകള്ക്ക് എങ്ങനെയാണ് കുറ്റവാളികള്ക്ക് മാപ്പ് നല്കണമെന്ന് നിര്ദേശിക്കാന് സാധിക്കുന്നത്. സുപ്രീംകോടതിയില് വെച്ച് നിരവധി തവണ ഞാന് അവരെ കണ്ടുമുട്ടിയിട്ടുണ്ട്. ഒരിക്കല് പോലും അവര് എനിക്ക് ക്ഷേമം നേരുകയോ അന്വേഷിക്കുകയോ ചെയ്തിട്ടില്ല. ഇന്നവര് കുറ്റവാളികള്ക്ക് വേണ്ടി സംസാരിക്കുന്നു. ബലാത്സംഗികളെ പിന്തുണച്ച് ഇത്തരം ആളുകള് ഉപജീവനം നടത്തുന്നതുകൊണ്ട് തന്നെ ഇവിടെ ബലാത്സംഗങ്ങള് അവസാനിക്കില്ലെന്നും ഒരു ദേശീയ മാധ്യമത്തിന് നല്കിയ അഭിമുഖത്തില് ആശാ ദേവി വ്യക്തമാക്കി.
നിര്ഭയയുടെ അമ്മ വധശിക്ഷയ്ക്ക് കാത്തുകിടക്കുന്ന പ്രതികള്ക്ക് മാപ്പ് നല്കണമെന്ന് അഭിഭാഷക ഇന്ദിര ജെയ്സിങ് നേരത്തെ ആവശ്യപ്പെട്ടിരുന്നു. ആശാദേവി സോണിയ ഗാന്ധിയുടെ മാതൃകയാണ് പിന്തുടരേണ്ടത്. അവരുടെ വേദന മനസിലാക്കുന്നു. നിര്ഭയ കേസ് പ്രതികളുടെ വധശിക്ഷ വൈകുന്നതില് പ്രതിഷേധവുമായി നിര്ഭയയുടെ അമ്മ ആശാദേവി കഴിഞ്ഞ ദിവസം രംഗത്തെത്തിയിരുന്നു. വധശിക്ഷ ഉടന് നടപ്പിലാക്കണമെന്നും അവര് ആവശ്യപ്പെട്ടിരുന്നു. ഇതേ തുടര്ന്നാണ് ട്വിറ്ററില് പ്രതികരണവുമായി ഇന്ദിര ജെയസിങ്ങ് എത്തിയത്. ക്രൂരകൃത്യം ചെയ്ത പ്രതികള്ക്ക് മാപ്പ് കൊടുക്കണമെന്ന ഇവരുടെ ആവശ്യത്തിനെതിരെ രൂക്ഷ പ്രതിഷേധമാണ് സാമൂഹമാധ്യമങ്ങളില് ഉയരുന്നത്.
രാജീവ ഗാന്ധി വധക്കേസ് പ്രതിയായ നളിനിയോട സോണിയ ക്ഷമിച്ചു. അവരെ തൂക്കികൊല്ലണമെന്ന ആഗ്രഹം? സോണിയക്കില്ലായിരുന്നു. ഞങ്ങള് നിങ്ങളോടൊപ്പമുണ്ട് പക്ഷേ വധശിക്ഷക്ക് എതിരാണെന്നും ഇന്ദിര ജെയസിങ് പിന്നീട് ട്വീറ്റ് ചെയ്തു. ശബരിമല യുവതി പ്രവേശനത്തിന് വേണ്ടി സുപ്രീം കോടതിയില് ബിന്ദു അമ്മിണിക്കും കനകദുര്ഗയ്ക്കും വേണ്ടി വാദിച്ച അഭിഭാഷകയാണ് ഇന്ദിര ജെയ്സിങ്ങ്. സ്ത്രീയുടെ അവകാശങ്ങള്ക്ക് വേണ്ടി വാദിച്ച ഇന്ദിര ജെയ്സിങ്ങിന്റെ യഥാര്ത്ഥമുഖം പുറത്തായെന്ന് സോഷ്യല് മീഡിയ ഒന്നടങ്കം പറയുന്നു.
