ശബരിമല: നിലയ്ക്കലിലെയും പമ്പയിലെയും പോലീസിന്റെ കണ്ണുവെട്ടിച്ച് സന്നിധാനത്തെ വലിയ നടപ്പന്തല്‍ വരെയെത്തിയ യുവതിയെ ശബരിമല കര്‍മസമിതി പ്രവര്‍ത്തകരും തീര്‍ത്ഥാടകരും ചേര്‍ന്ന് തടഞ്ഞു. ഇന്നലെ രാവിലെ 11 മണിയോടെയാണ് സംഭവം. ആന്ധ്ര വിജയവാഡ സ്വദേശി സുധാറാണി (42) ആണ് സന്നിധാനത്തെത്തിയത്. ഇവരെ തടഞ്ഞ തീര്‍ത്ഥാടകര്‍ക്ക് നേരേ യുവതി ആക്രോശിച്ച് ചെറുത്തുനിന്നു.
ദര്‍ശനം നടത്താതെ മടങ്ങില്ലെന്നയുവതിയുടെ വാശിയെത്തുടര്‍ന്ന് സന്നിധാനത്ത് സംഘര്‍ഷാവസ്ഥയുണ്ടായി. പ്രശ്‌നം രൂക്ഷമായതോടെ ഉന്നത പോലീസ് ഉദ്യോഗസ്ഥരെത്തി യുവതിയെ നിര്‍ബന്ധപൂര്‍വം പമ്പയിലേക്ക് മടക്കി അയച്ചു. ഇതോടെയാണ് അര മണിക്കൂറിലേറെ നീണ്ട സംഘര്‍ഷാവസ്ഥയ്‌ക്ക് അവസാനമായത്.
വലിയ നടപ്പന്തലിനു സമീപമെത്തിയ സുധാറാണി തീര്‍ത്ഥാടകരുടെയും ശബരിമല കര്‍മസമിതി പ്രവര്‍ത്തകരുടെയും ശ്രദ്ധയില്‍പ്പെട്ടു. തുടര്‍ന്ന് ഇവരോട് പമ്പയിലേക്ക് മടങ്ങാന്‍ തീര്‍ത്ഥാടകര്‍ ആവശ്യപ്പെട്ടു. ഇവര്‍ തീര്‍ത്ഥാടകര്‍ക്ക് നേരെ തട്ടിക്കയറി. ഇതോടെയാണ് സംഘര്‍ഷാവസ്ഥ ഉടലെടുത്തത്. യുവതിയെ മടക്കി അയയ്‌ക്കാന്‍ പോലീസ് നടത്തിയ ആദ്യ ശ്രമങ്ങള്‍ പരാജയപ്പട്ടു. ദര്‍ശനം കഴിഞ്ഞ് തിരികെയിറങ്ങിയ തീര്‍ത്ഥാടകര്‍ സംഭവമറിഞ്ഞ് തടിച്ചു കൂടിയതോടെ യുവതി പോലീസിന്റെ നിര്‍ദേശം അനുസരിക്കാന്‍ നിര്‍ബന്ധിതയായി.
