തിരുവനന്തപുരം: ആന്ധ്രാപ്രദേശില് പുതിയ രാഷ്ട്രീയ സഖ്യം രൂപപ്പെട്ടതോടെ കേരളത്തില് പണി വാങ്ങിയത് സിപിഎമ്മിന്റെ സൈബര് സഖാവ് പോരാളി ഷാജിക്കാണ്. പോരാളി ഷാജി എന്ന പേജ് പ്രൊഫൈല് ഫോട്ടോ ആയി ഉപയോഗിച്ചിരുന്നത് പവന് കല്യാണിന്റെ ഫോട്ടോ ആയിരുന്നു. പവന് കല്യാണും അദ്ദേഹത്തിന്റെ ജനസേന പാര്ട്ടിയും ഇന്നലെ ബിജെപി സഖ്യത്തിനൊപ്പം ചേര്ന്നതാണ് പോരാളി ഷാജിക്ക് പണിയായത്. ഇനി ബിജെപി വേദികളില് പവന് കല്യാണാകും താരപ്രചാരകന്. ഇതോടെ സിപിഎമ്മിന്റെ സൈബര് പോരാളിക്ക് പ്രൊഫൈല് ചിത്രം മാറ്റേണ്ടി വരുമെന്നും അല്ലെങ്കില് പോരാളി ഷാജിക്കും ബിജെപിയില് ചേരാമെന്നുമാണ് സോഷ്യല് മീഡിയ കളിയാക്കുന്നത്.
മീശ പിരിച്ച് നില്ക്കുന്ന പവന് കല്ല്യാണിന്റെ ഫോട്ടോ പോരാളി ഷാജിയുടെ മുഖമായിരുന്നു. എന്നാല് പവന് കല്യാണിന്റെ ഫോട്ടോ മാറ്റേണ്ട ഗതികേടിലാണ് പോരാളി ഷാജി എന്നാണ് ഇപ്പോള് സോഷ്യല് മീഡിയ പരിഹസിക്കുന്നത്. ആന്ധ്രാപ്രദേശിന് പ്രത്യേക പദവി ആവശ്യപ്പെട്ടുള്ള ഇടതു പ്രക്ഷോഭത്തില് പവന് കല്യാണിന്റെ ജനസേനാ പാര്ട്ടി പങ്കാളികളായായിരുന്നു. ആന്ധ്രാപ്രദേശില് വ്യാപകമായി സിപിഎം- സിപിഐ പ്രവര്ത്തകര്ക്കൊപ്പം പദയാത്രകള് സംഘടിപ്പിക്കുകയും ചെയ്തു പവന് കല്യാണ്. ഇതോടെ പവന് കല്യാണിനെ സിപിഎം സൈബര് പോരാളികള് ഏറ്റെടുക്കുകയായിരുന്നു. എന്നാല്, ഇടതു സഖ്യം അവസാനിപ്പിച്ച് ബിജെപി പാളയത്തില് പവന് കല്യാണ് എത്തിയതോടെ പോരാളി ഷാജി ഇനി എന്തുചെയ്യുമെന്നാണ് സോഷ്യല് മീഡിയ കാത്തിരിക്കുന്നത്.
കഴിഞ്ഞ ദിവസമാണ് നടനും രാഷ്ട്രീയ നേതാവുമായ പവന് കല്യാണിന്റെ ജനസേനാ പാര്ട്ടി എന്ഡിഎയില് ചേര്ന്നു. ബിജെപിക്കൊപ്പം ചേര്ന്നതായി പവന് കല്യാണ് വാര്ത്താ സമ്മേളനത്തില് അറിയിക്കുകയും ചെയ്തു. 2024ലെ പൊതുതെരഞ്ഞെടുപ്പില് ബിജെപിയും ജെഎസ്പിയും ഒത്തുചേര്ന്ന് പ്രവര്ത്തിക്കുമെന്ന് പാര്ട്ടികളുടെ നേതൃയോഗത്തിന് ശേഷം പവന് പറഞ്ഞു. പുതിയ സഖ്യം ചന്ദ്രബാബു നായിഡുവിന്റെ ടിഡിപിക്കും ജഗന്മോഹന് റെഡ്ഡിയുടെ വൈഎസ്ആര് കോണ്ഗ്രസിനുംകനത്ത വെല്ലുവിളിയാകും. ജനുവരി 13ന് ബിജെപി വര്ക്കിങ് പ്രസിഡന്റ് ജെ.പി. നദ്ദ പവന് കല്യാണിനെ സന്ദര്ശിച്ച് അവസാന വട്ട ചര്ച്ചകള് നടത്തിയിരുന്നു.
അമരാവതിയില് നിന്ന് തലസ്ഥാനം മാറ്റാനുള്ള ജഗന് സര്ക്കാരിന്റെ നീക്കത്തിനെതിരെയാകും സഖ്യത്തിന്റെ ആദ്യ പ്രക്ഷോഭമെന്നാണ് സൂചന. അമരാവതി തലസ്ഥാനമായി തുടരണമെന്നാണ് രണ്ടു പാര്ട്ടികളുടെയും നിലപാട്. അടുത്തിടെ നടന്ന ലോക്സഭാ, നിയമസഭാ തെരഞ്ഞെടുപ്പുകളില് ജനസേനാ പാര്ട്ടിക്ക് വോട്ടുകള് പിടിക്കാനായെങ്കിലും കാര്യമായ നേട്ടം ഉണ്ടാക്കാന് സാധിച്ചിരുന്നില്ല. ബിജെപിക്കും വലിയ നേട്ടം ലഭിച്ചില്ല. രണ്ടു പാര്ട്ടികളും ഒന്നിച്ച് നിന്നിരുന്നെങ്കില് മികച്ച നേട്ടം കൈവരിക്കാന് കഴിയുമായിരുന്നുവെന്നാണ് വിലയിരുത്തല്. ഈ സാഹചര്യത്തിലാണ് പുതിയ സഖ്യം രൂപപ്പെട്ടത്.:
