ദുബായ്: കഴിഞ്ഞ വര്ഷത്തെ ഏറ്റവും മികച്ച ഏകദിന ക്രിക്കറ്റര്ക്കുള്ള ഐസിസി പുരസ്കാരം ഇന്ത്യന് ഓപ്പണര് രോഹിത് ശര്മയ്ക്ക്. അതേസമയം പോയ വര്ഷത്തെ ഏറ്റവും മികച്ച ഐസിസി ക്രിക്കറ്റര്ക്കുള്ള സര് ഗാരി സോബേഴ്സ് ട്രോഫി ഇംഗ്ലീഷ് ഓള് റൗണ്ടര് ബെന് സ്റ്റോക്സിനാണ്. 2019-ലെ സ്പിരിറ്റ് ഓഫ് ക്രിക്കറ്റ് പുരസ്കാരം ഇന്ത്യന് ക്യാപ്റ്റന് വിരാട് കോഹ്ലിയും നേടി. ടെസ്റ്റ് ക്രിക്കറ്റില് കഴിഞ്ഞ വര്ഷം 59 വിക്കറ്റുകള് വീഴ്ത്തിയ ഓസീസിന്റെ പാറ്റ് കമ്മിന്സാണ് 2019-ലെ മികച്ച ടെസ്റ്റ് ക്രിക്കറ്റര്.
ബംഗ്ലാദേശിനെതിരെ നാഗ്പൂരില് ഏഴു റണ്സ് മാത്രം വഴങ്ങി ഹാട്രിക് ഉള്പ്പെടെ ആറു വിക്കറ്റെടുത്ത ദീപക് ചാഹറിന്റെ പ്രകടനം പോയ വര്ഷത്തെ മികച്ച ട്വന്റി20 പ്രകടനമായി തെരഞ്ഞെടുക്കപ്പെട്ടു. ടെസ്റ്റ് ക്രിക്കറ്റില് ഓസീസിനായി അവിസ്മരണീയ പ്രകടനം നടത്തിയ മാര്നസ് ലബുഷെയ്നാണ് ഐസിസി എമര്ജിങ് ക്രിക്കറ്റര് ബഹുമതി.
കഴിഞ്ഞ വര്ഷം ഏകദിന ക്രിക്കറ്റില് നടത്തിയ ഉജ്ജ്വല പ്രകനമാണ് രോഹിതിനെ മികച്ച ഏകദിന ക്രിക്കറ്റര്ക്കുള്ള അവാര്ഡിനര്ഹനാക്കിയത്. രോഹിത്തിന്റെ കരിയറിലെ ഏറ്റവും മികച്ച വര്ഷങ്ങളില് ഒന്നായിരുന്നു 2019. ലോകകപ്പ് ടൂര്ണമെന്റില് അഞ്ചു സെഞ്ചുറികള് നേടുന്ന ആദ്യ താരമെന്ന റെക്കോഡ് രോഹിത് സ്വന്തമാക്കിയിരുന്നു. കഴിഞ്ഞ വര്ഷം ഏഴു സെഞ്ചുറികളാണ് രോഹിത് ഏകദിനത്തില് മാത്രം സ്വന്തമാക്കിയത്.
കഴിഞ്ഞ വര്ഷത്തെ ഏകദിന ലോകകപ്പിലും ആഷസ് പരമ്പരയിലും പുറത്തെടുത്ത തകര്പ്പന് പ്രകടനമാണ് സ്റ്റോക്സിന് പുരസ്കാരം നേടിക്കൊടുത്തത്. ലോകകപ്പില് ഇംഗ്ലണ്ടിന് കിരീടം നേടിക്കൊടുക്കുന്നതിലും സ്റ്റോക്സിന്റെ സംഭാവന ഏറെ വലുതായിരുന്നു. ലോകകപ്പിന് പിന്നാലെയായിരുന്നു ആഷസ് പരമ്പരയിലെ മിന്നുന്ന പ്രകടനം. മൂന്നാം ടെസ്റ്റില് ഓസീസ് പോരാട്ടവീര്യത്തെ ഒറ്റയ്ക്ക് ചെറുത്ത് തോല്പ്പിച്ചാണ് സ്റ്റോക്ക്സ് ഇംഗ്ലണ്ടിന് വിജയം നേടിക്കൊടുത്തത്. 142 വര്ഷത്തെ ടെസ്റ്റ് ക്രിക്കറ്റിനെറ ചരിത്രത്തിലെ തന്നെ ഏക്കാലത്തെയും മികച്ച ഇന്നിങ്സുകളിലൊന്ന് എന്ന് വിശേഷിപ്പിക്കപ്പെടുന്ന പ്രകടനമായിരുന്നു ഇൗ ടെസ്റ്റില് സ്റ്റോക്സ് നടത്തിയത്. എല്ലാവരും തോല്വി ഉറപ്പിച്ച ഘട്ടത്തില് നിന്ന് സ്റ്റോക്ക്സ് ടീമിനെ ഒറ്റയ്ക്ക് കരകയറ്റുകയായിരുന്നു . 219 പന്തുകള് നേരിട്ട താരം 11 ബൗണ്ടറിയും എട്ടു സിക്സും സഹിതം 135 റണ്സോടെ പുറത്താകാതെ നിന്നു.
സ്കോട്ട്ലന്ഡ് താരം കൈല് കോയെറ്റ്സറാണ് അസോസിയേറ്റ് രാജ്യങ്ങളില്നിന്നുള്ള മികച്ച താരം. ഇംഗ്ലിഷ് അമ്പയര് റിച്ചാര്ഡ് ഇല്ലിങ്വര്ത്താണ് മികച്ച അമ്പയര്ക്കുള്ള ഡേവിഡ് ഷെപ്പേര്ഡ് പുര്സ്കാരത്തിന് അര്ഹനായത്.
