കണ്ണൂര്: പൗരത്വ നിയമ ഭേദഗതി ഭാരതത്തിന്റെ ധാര്മിക ഉത്തരവാദിത്വമാണെന്ന് ഭാരതീയ വിചാരകേന്ദ്രം. കണ്ണൂരില് ഇന്നലെ നടന്ന മുപ്പത്തിയേഴാം വാര്ഷിക പ്രതിനിധിസഭയില് അവതരിപ്പിച്ച പ്രമേയത്തിലാണ് ഇക്കാര്യം ചൂണ്ടിക്കാട്ടിയത്. പതിറ്റാണ്ടുകളായി ദുരിതമനുഭവിക്കുന്ന അഭയാര്ത്ഥികളോട് ഭാരതത്തിനുള്ള ചരിത്രപരവും ധാര്മികവും സാംസ്കാരികവുമായ കടമ നിര്വഹിക്കുന്നതിനു വേണ്ടി പൗരത്വനിയമം ഭേദഗതി ചെയ്ത പാര്ലമെന്റിനെ പ്രതിനിധി സഭ അഭിനന്ദിച്ചു.
ക്രൂരമായ പീഡനങ്ങള്ക്കിരയായി സര്വതും ഉപേക്ഷിച്ച് പാക്കിസ്ഥാന്, അഫ്ഗാനിസ്ഥാന്, ബംഗ്ലാദേശ് എന്നീ രാജ്യങ്ങളില്നിന്ന് പ്രാണരക്ഷാര്ത്ഥം ഭാരതത്തില് അഭയം പ്രാപിച്ചവര് ഇക്കാലമത്രയും അനുഭവിച്ചു വന്ന ദുരിതങ്ങള്ക്ക് അറുതി വരുത്തുന്ന ഭേദഗതി നിയമം ഹതാശരായ അഭയാര്ത്ഥികളോട് ഭാരതം മനുഷ്യത്വപരമായ സമീപനം സ്വീകരിക്കുന്നത്തിന്റെ പ്രതീകമാണ്. ഇതുവഴി ശരണാര്ത്ഥികളോടുള്ള നമ്മുടെ പൂര്വകാല കരുണ്യപാരമ്പര്യത്തെ പിന്പറ്റുകയാണ് നമ്മുടെ ഭരണകൂടം ചെയ്തത്.
മഹാത്മാഗാന്ധി, അംബേദ്കര് തുടങ്ങിയ രാഷ്ട്രനേതാക്കള് ഉന്നയിച്ചിരുന്ന ആവശ്യമായിരുന്നു ഇത്തരം അഭയാര്ത്ഥികള്ക്ക് സംരക്ഷണം കൊടുക്കുക എന്നത്. തീവ്രവാദപ്രസ്ഥാനങ്ങളുടെ സമ്മര്ദ്ദത്തിന് വഴങ്ങി കോണ്ഗ്രസ്സും സിപിഎമ്മും ഉള്പ്പെടെ പ്രതിപക്ഷ രാഷ്ട്രീയ പാര്ട്ടികള് വര്ഗീയത ഇളക്കിവിടുകയും കലാപത്തിന് നേതൃത്വം കൊടുക്കുകയുമാണ്. ഇത് ഗുരുതരമായ പ്രത്യാഘാതങ്ങള് സൃഷ്ടിക്കും.
പൗരത്വഭേദഗതി നിയമത്തോടൊപ്പം പൗരത്വ രജിസ്ട്രേഷനെതിരേയും അനാവശ്യ പ്രചാരണം നടത്തുകയാണ്. പൗരത്വ രജിസ്ട്രേഷന് സംബന്ധിച്ച് മാര്ഗ്ഗനിര്ദ്ദേശം പുറപ്പെടുവിക്കുകയോ ചട്ടങ്ങള് രൂപീകരിക്കുകയോ ഔദേ്യാഗികമായി തീരുമാനം എടുക്കുകയോ ഉണ്ടായിട്ടില്ല. സര്ക്കാര് തീരുമാനം പുറത്തുവന്ന ശേഷം അത് സംബന്ധിച്ച് എന്തെങ്കിലും പരാതിയുണ്ടെങ്കില് ചര്ച്ച ചെയ്യുന്നതില് അപാകതയില്ല. പരമാധികാര ജനാധിപത്യ ഭാരതത്തില് എല്ലാവരുടേയും സ്വത്വത്തിന്റെ ആധാരം പൗരത്വം തന്നെയാവണം.
പൗരത്വ നിയമത്തെ ഏതെങ്കിലും ജനവിഭാഗത്തിന്റെ നിലനില്പ്പിനെതിരേയുള്ള ഭീഷണിയായി വ്യാഖ്യാനിക്കുന്നവരുടെ ഉദ്ദേശ്യം സംശയകരമാണ്. അക്കൂട്ടരാണ് ജനങ്ങളില് ആശങ്കയും തെറ്റിദ്ധാരണയും പരത്തുന്നത്. പൗരത്വത്തെ അധികാരമായും അഭിമാനമായും ഉയര്ത്തിപ്പിടിക്കുമ്പോള് സാഹോദര്യത്തിന്റെ നവോന്മേഷം രാജ്യത്ത് പരക്കും. സംശയത്തിന്റെയും വിദ്വേഷത്തിന്റെയും സ്ഥാനത്ത് പരസ്പര വിശ്വാസം വളരും. എല്ലാ രാജ്യസ്നേഹികളും ആ വഴിക്ക് ചിന്തിക്കണമെന്ന് ഭാരതീയ വിചാരകേന്ദ്രം പ്രതിനിധി സമ്മേളനം അഭ്യര്ത്ഥിച്ചു.
