ന്യൂദല്ഹി : പൊതുജനങ്ങളുടെ പണം രാഷ്ട്രീയ താല്പര്യങ്ങള്ക്കുപയോഗിക്കുന്നത് തെറ്റെന്ന് ഗവര്ണര് ആരിഫ് മുഹമ്മദ് ഖാന്. പരോക്ഷമായി പൗരത്വ നിയമം നടപ്പിലാക്കില്ലെന്ന് കേരള സര്ക്കാര് ഇന്നു മാധ്യമങ്ങളില് നല്കിയ പരസ്യത്തിനെതിരെ ഗവര്ണര് രൂക്ഷവിമര്ശനം നടത്തി. സര്ക്കാര് വിനിയോഗിക്കുന്നത് കേരളത്തിലെ ജനങ്ങളുടെ പണമാണ്.
കേരളത്തില് ജനങ്ങള് ഇന്ത്യയിലെ പൗരന്മാര് തന്നെയാണ് . വിഭിന്നാഭിപ്രായം പ്രകടിപ്പിക്കാന് എല്ലാവര്ക്കും അവകാശമുണ്ട്. അതില് പ്രശ്നമില്ല. എന്നാല് പാര്ലമെന്റ് പാസ്സാക്കിയ നിയമത്തിനെതിരെ പ്രചാരണം നടത്തുന്നതിനായി പൊതുപണം വിനിയോഗിക്കുന്നത് തെറ്റാണ്.പൊതുപണം ഉചിതമായി വിനിയോഗിക്കണമെന്ന് മാത്രമാണ് തന്റെ അഭിപ്രായം. അത് ജനങ്ങളുടെ ക്ഷേമത്തിന് വേണ്ടിയാണ് ഉപയോഗിക്കേണ്ടതെന്നും ഗവര്ണര് പറഞ്ഞു. കൂടാതെ നൊബേല് സമ്മാനജേതാവ് മൈക്കിള് ലെവിറ്റിനെ തടഞ്ഞ സംഭവം സംസ്ഥാനത്തിന് നാണക്കേടെന്നും അദ്ദേഹം ദല്ഹിയില് പറഞ്ഞു.
