ശ്രീനഗര് : പ്രത്യേക പദവി എടുത്തുകളഞ്ഞ് ജമ്മു കശ്മീര് കേന്ദ്ര ഭരണ പ്രദേശമാക്കിയതോടെ സംസ്ഥാനത്ത് ഒട്ടേറെ വികസന പ്രവര്ത്തനങ്ങള്ക്കാണ് കേന്ദ്ര സര്ക്കാര് ആസൂത്രണം ചെയ്യുന്നത്. പുതിയതായി സംസ്ഥാനത്തെ ഗതാഗത സൗകര്യം ഒന്നുകൂടി മെച്ചപ്പെടുത്തിക്കൊണ്ട് റെയില്വേ പാത അതിവേഗ നിര്മാണത്തിനാണ് ഇപ്പോള് തീരുമാനിച്ചിരിക്കുന്നത്. അടുത്ത വര്ഷം ഡിസംബറിനുള്ളില് പാലത്തിന്റെ നിര്മാണം പൂര്ത്തിയാക്കാന് കേന്ദ്രം നിര്മാതാക്കള്ക്ക് നിര്ദ്ദേശം നല്കിക്കഴിഞ്ഞു.
ഇതിന്റെ നിര്മാണം പൂര്ത്തിയാകുന്നതോടെ ലോകത്തിലെ ഏറ്റവും ഉയരത്തിലുള്ള റെയില്വേ പാതയുള്ള സംസ്ഥാനം എന്ന ബഹുമതി ജമ്മു കശ്മീരിന് ലഭിക്കും. ഈഫേല് ടവറിനേക്കാള് 35 മീറ്റര് ഉയരത്തിലാകും ഈ റെയില് പാത.
150 വര്ഷത്തെ ഇന്ത്യന് റെയില്വേയുടെ ചരിത്രത്തില് തന്നെ ഒട്ടേറെ വെല്ലുവിളി നിറഞ്ഞതാണ് ഈ പദ്ധതിയെന്ന് കൊങ്കണ് റെയില്വേ ചെയര്മാന് സഞ്ജയ് ഗുപ്ത അറിയിച്ചു. പാലത്തിന്റെ നിര്മാണമാണ് ഇതില് ഏറ്റവും ദുര്ഘടം പിടിച്ചത്. ഇതിനായി വലിയ ആര്ച്ചിന്റെ നിര്മാണം പൂര്ത്തിയാക്കി കഴിഞ്ഞു. 359 മീറ്റര് നീളത്തില് 5462 ടണ് സ്റ്റീല് ഉപയോഗിച്ചാണ് ഇത് നിര്മിച്ചത്.
കത്ര- ബനിഹാല്, ഉധംപൂര്- ശ്രീനഗര്- ബാരമുള്ള തുടങ്ങിയ സ്ഥലങ്ങളെ തമ്മില് ബന്ധിപ്പിച്ചുകൊണ്ടാണ് ഈ പദ്ധതിയുള്ളത്. നിലവില് ചൈനയിലെ ഷുയ്ബയ് പാലത്തിനാണ് ഏറ്റവും കുടുതുല് ഉയരമുള്ള റെയില്വേ പാലം ഇതിന്റെ റെക്കോര്ഡ് ജമ്മു കശ്മീര് പാലം തകര്ക്കുമെന്നാണ് പ്രതീക്ഷിക്കുന്നത്. കശ്മീര് താഴ്വരയിലെ ഗതാഗതം സുഗമമാക്കാന് ഇതിലൂടെ സാധിക്കുമെന്നാണ് പ്രതീക്ഷിക്കുന്നത്. 2002ലാണ് ഈ പദ്ധതിക്ക് പ്രഖ്യാപനം നടത്തിയതെങ്കിലും ഇപ്പോഴാണ് നിര്മാണം വേഗതയിലായത്.
