ന്യൂദല്‍ഹി: അന്തരീക്ഷ മലിനീകരണം കുറയ്‌ക്കുന്നതിലും കാര്‍ബണ്‍ മലിനീകരണം നിയന്ത്രിക്കുന്നതിലും വിജയിച്ച വിമാനത്താവളങ്ങളുടെ പട്ടികയില്‍ ഇടംനേടി തിരുവനന്തപുരം അന്താരാഷ്ട്ര വിമാനത്താവളം. രാജ്യത്തെ നാല് വിമാനത്താളങ്ങളാണ് അന്താരാഷ്ട്ര മാനദണ്ഡങ്ങള്‍ക്കനുസരിച്ച് ലെവല്‍ 1 ല്‍ നിന്ന് ലെവല്‍ 2 ലേക്ക് സ്ഥാനക്കയറ്റം കിട്ടിയിരിക്കുന്നത്. എയര്‍പോര്‍ട്ട് കൗണ്‍സില്‍ ഇന്റര്‍നാഷണല്‍ നിശ്കര്‍ഷിക്കുന്ന മാനദണ്ഡങ്ങളുടെ അടിസ്ഥാനത്തില്‍ വിമാനത്താവളങ്ങളെ എയര്‍പോര്‍ട്ട് അതോറിറ്റി ഓഫ് ഇന്ത്യയാണ് തിരഞ്ഞെടുത്തത്.
കൊല്‍ക്കത്ത നേതാജി സുഭാഷ് ചന്ദ്രബോസ് വിമാനത്താവളം, ഭുവനേശ്വറിലെ ബിജു പട്നായിക് വിമാനത്താവളം, വാരാണസിയിലെ ലാല്‍ ബഹാദൂര്‍ ശാസ്ത്രി വിമാനത്താവളം എന്നീ വിമാനത്താവളങ്ങളാണ് എയര്‍പോര്‍ട്ട് അതോറിറ്റി ഓഫ് ഇന്ത്യ പുറത്തുവിട്ട പട്ടികയിലെ മറ്റു മൂന്ന് വിമാനത്താവളങ്ങള്‍. കാര്‍ബണ്‍ പുറംതള്ളുന്നത് നിയന്ത്രിച്ച് അന്തരീക്ഷം ശുദ്ധീകരിക്കുന്നതില്‍ വിജയം കണ്ടതിനാലാണ് അംഗീകാരം നല്‍കിയത്. 2015 മുതല്‍ 2018 വരെയുള്ള വര്‍ങ്ങളിലെ കാര്‍ബണ്‍ മാപ്പിംഗ് ഫലങ്ങള്‍ ശേഖരിച്ച് വിലയിരുത്തിയതിന്റെ അടിസ്ഥാനത്തിലാണ് വിമാനത്താളങ്ങളുടെ ലിസ്റ്റ് തയ്യാറാക്കിയത് എന്ന് എയര്‍പോര്‍ട്ട് അതോറിറ്റി അറിയിച്ചു. കേരളത്തിലെ മറ്റ് വിമാനത്താവളങ്ങള്‍ക്ക് പട്ടികയില്‍ ഇടംനേടാനായില്ല.
2016ലെ എയര്‍പോര്‍ട്ട് കൗണ്‍സിലിന്‌റെ കണക്ക് അനുസരിച്ച് യാത്രക്കാരുടെ സേവനത്തിന്റെ ഗുണനിലവാരവുമായി ബന്ധപ്പെട്ട് അന്താരാഷ്ട്ര വിമാനത്താവളങ്ങളുടെ റാങ്കിംഗില്‍ തിരുവനന്തപുരം അന്താരാഷ്ട്ര വിമാനത്താവളം അഞ്ചാം സ്ഥാനത്തായിരുന്നു.
