കണ്ണൂര്‍: പൗരത്വ നിയമ ഭേദഗതിക്കെതിരായ സിപിഎം പ്രതിഷേധ സമരങ്ങളിലടക്കം പാര്‍ട്ടിവേദികളില്‍ സിപിഎം സംസ്ഥാന സമിതിയംഗവും കണ്ണൂര്‍ ജില്ലാ മുന്‍ സെക്രട്ടറിയുമായ പി. ജയരാജന്റെ അസാന്നിധ്യം ചര്‍ച്ചയാകുന്നു. പൗരത്വ നിയമ ഭേദഗതിക്കെതിരെ നടന്ന ന്യൂനപക്ഷ സെല്‍ മാര്‍ച്ചിലും ജയരാജനുണ്ടായിരുന്നില്ല. മുഖ്യധാരാ രാഷ്‌ട്രീയത്തില്‍ നിന്ന് മാറി നില്‍ക്കുന്ന ജയരാജന്റെ നടപടി പാര്‍ട്ടിക്കുള്ളില്‍ ചര്‍ച്ചയായിട്ടുണ്ട്. പൗരത്വനിയമത്തിനെതിരെ ഫേസ്ബുക്ക് കുറിപ്പ് മാത്രമാണ് പി. ജയരാജന്റെ ഇതുവരെയുള്ള പ്രതികരണം. കേന്ദ്രവും സംസ്ഥാനവും നേരിട്ട് ഏറ്റുമുട്ടുന്ന വിഷയത്തില്‍ പിണറായി വിജയനെ പിന്തുണച്ച് പരസ്യമായ പ്രസ്താവനകള്‍ ഒന്നും ജയരാജന്റെ ഭാഗത്ത് നിന്ന് ഉണ്ടായിട്ടില്ല. ലോക്‌സഭാ തെരഞ്ഞെടുപ്പില്‍ തോല്‍ക്കുകയും ജില്ലാ സെക്രട്ടറി സ്ഥാനം നഷ്ടപ്പെടുകയും ചെയ്ത ശേഷം പാര്‍ട്ടിയില്‍ ഇടപെട്ട ആന്തൂര്‍, സി.ഒ.ടി നസീര്‍ വിഷയങ്ങളില്‍ ജയരാജന് തിരിച്ചടി നേരിട്ടിരുന്നു. നിലവില്‍ മറ്റു പാര്‍ട്ടി ചുമതലകളില്ലാത്തതിനാല്‍ വീട്ടില്‍ ഒതുങ്ങി കൂടുകയാണ്.
സാന്ത്വന പരിചരണത്തിനായി ജയരാജന്റെ തന്നെ നേതൃത്വത്തില്‍ ആരംഭിച്ച ഐആര്‍പിസിയുടെ പ്രവര്‍ത്തനങ്ങളിലും ജയരാജന് ഇപ്പോള്‍ സജീവമല്ല. ജയരാജന്റെ ഈ രംഗത്തെ പ്രവര്‍ത്തനത്തിന് കൂടി തടയിടുക എന്ന ലക്ഷ്യത്തോടെ പാര്‍ട്ടി ജില്ലാ കമ്മിറ്റി തന്നെ നേരിട്ട് സ്‌കൂളുകളിലും മറ്റും ലഹരി വിരുദ്ധപ്രവര്‍ത്തനങ്ങളും സാന്ത്വന പ്രവര്‍ത്തനങ്ങളും ഏറ്റെടുക്കുന്നതായി പ്രഖ്യാപിച്ചിരുന്നു. ഇതിലുള്ള നീരസമാണ് ജയരാജന് പാര്‍ട്ടി പ്രവര്‍ത്തനങ്ങളില്‍ നിന്ന് പൂര്‍ണ്ണമായും പിന്നോട്ട് പോകാന്‍ കാരണമെന്ന് സൂചനയുണ്ട്. മുമ്പ് രാഷ്‌ട്രീയ വിഷയങ്ങളില്‍ സമൂഹമാധ്യമങ്ങളിലൂടെ പെട്ടെന്ന് പ്രതികരണങ്ങള്‍ നടത്തിയിരുന്ന പി. ജയരാജന്റെ ഫേസ്ബുക്ക് അക്കൗണ്ടില്‍ സമീപകാലത്ത് ഇത്തരം പ്രതികരണങ്ങള്‍ കുറവാണ്. പാര്‍ട്ടി നിരീക്ഷണം നേരിടുന്ന പിജെ, ആര്‍മി തുടങ്ങിയ ഫാന്‍സ് സൈബര്‍ ഗ്രൂപ്പുകളും നിര്‍ജ്ജീവമാണ്.
