കൊച്ചി: തുടര്‍ സമനിലകള്‍… തോല്‍വികള്‍… എല്ലാ പ്രതീക്ഷകളും നഷ്ടപ്പെട്ട് തലതാഴ്‌ത്തി നിന്നിരുന്നവരുടെ തിരിച്ചുവരവ് ആഘോഷമായി. ഐഎസ്എല്‍ ഫുട്‌ബോളില്‍ സ്വന്തം കാണികള്‍ക്കു മുന്നില്‍ കേരള ബ്ലാസ്റ്റേഴ്‌സിന്റെ തകര്‍പ്പന്‍ പ്രകടനം. ഹൈദരാബാദ് എഫ്‌സിയെ ഒന്നിനെതിരെ അഞ്ചു ഗോളിന് തകര്‍ത്ത് സീസണ്‍ രണ്ടാം പകുതിയില്‍ ബ്ലാസ്റ്റേഴ്‌സിന്റെ മിന്നും തിരിച്ചുവരവ്. രണ്ടു ഗോളുമായി കളം നിറഞ്ഞ ഒഗ്ബച്ചെയാണ് മത്സരത്തിലെ ഹീറോ.
ആദ്യ പകുതിയില്‍ തന്നെ ഒരു ഗോള്‍ വീണതോടെ ഇത്തവണയും പഴയ വിധി വിശ്വസിച്ച ആരാധകരെയും കളിക്കാരെയും ഒന്നുപോലെ പ്രചോദിപ്പിക്കുന്നതായിരുന്നു പിന്നീടുള്ള പ്രകടനം. 14-ാം മിനിറ്റില്‍ ബോബോയിലൂടെയാണ് ഹൈദരാബാദ് മുന്നിലെത്തിയത്. പിന്നീട് ബാര്‍തലോമ്യൂ ഒഗ്ബച്ചയ്‌ക്കൊപ്പം റാഫേല്‍ മെസി ബൗളിയും സത്യസെന്‍ സിങ്ങും ദ്രോബരോവും മത്സരിച്ച് പന്ത് വലയിലെത്തിച്ചതോടെ ബ്ലാസ്റ്റേഴ്സ് ആരാധകര്‍ക്കൊപ്പം പരിശീലകന്‍ എല്‍ക്കൊ ഷാറ്റോരിയും ഞെട്ടി. 33, 75 മിനിറ്റുകളിലായിരുന്നു ഒഗ്ബച്ചയുടെ ഗോളുകള്‍.
ഒരു ഗോളിന് പിന്നിലായതോടെ മറുതന്ത്രം ബ്ലാസ്റ്റേഴ്സ് കരുതിവച്ചിരുന്നു. 33-ാം മിനിറ്റില്‍ ഒഗ്ബച്ചെ ആദ്യം വലകുലുക്കി സമനില പിടിച്ചു. ഹൈദരാബാദ് ഗോളി ലക്ഷ്മീകാന്ത് കട്ടിമണിയുടെ പിഴവില്‍ നിന്നായിരുന്നു ആദ്യ ഗോള്‍. പിന്നെ ഇതുവരെ കാണാത്ത ബ്ലാസ്റ്റേഴ്‌സിനെയാണ് കളത്തില്‍ കണ്ടത്. തുടര്‍ച്ചയായ ആക്രമണങ്ങള്‍. ആറു മിനിറ്റിന് അപ്പുറം ദ്രോബരോവ് വീണ്ടും വലകുലുക്കിയതോടെ കേരളം 2-1ന് മുന്നില്‍. ഹൈദരാബാദ് പ്രതിരോധം തീര്‍ത്തും നിഷ്പ്രഭമായ നിമിഷം. ആദ്യ പകുതി തീരാന്‍ നിമിഷങ്ങള്‍ ബാക്കിനില്‍ക്കെ ബ്ലാസ്റ്റേഴ്‌സിന്റെ സ്വന്തം മെസിയും ഗോളടിച്ചതോടെ 3-1ന്റെ ലീഡുമായി ഇടവേള. ഹോളിച്ചരന്‍ നര്‍സരിയുടെ മികച്ച ക്രോസില്‍ കൃത്യമായ കാലുവച്ചായിരുന്നു മെസിയുടെ ഗോള്‍.
ടൂര്‍ണമെന്റില്‍ ഇതുവരെ ലഭിക്കാത്ത ആവേശത്തോടെയാണ് രണ്ടാം പകുതിക്ക് ബ്ലാസ്റ്റേഴ്സ് ഇറങ്ങിയത്. അതിന്റെ ഫലം 59-ാം മിനിറ്റില്‍ സത്യസെന്‍ സിങ്ങിലൂടെ ലഭിച്ചു. ജയിക്കുമെന്ന വിശ്വാസം ബ്ലാസ്റ്റേഴ്സ് താരങ്ങളില്‍ പോലും ഉയര്‍ന്നുവന്നതിനു തെളിവായിരുന്നു നാലാം ഗോള്‍. അഞ്ചാം ഗോള്‍ കൃത്യമായ ഗെയിം പ്ലാനിന്റേത്. മെസി ബൗളിയും ഒഗ്ബച്ചയും തമ്മില്‍ നടത്തിയ മാജിക്കല്‍ മൂവ്. പ്രതിരോധത്തെ കീറിമുറിച്ച് മെസി നല്‍കിയ പന്ത് ഒഗ്ബച്ചെ അനായാസം വലയിലെത്തിച്ചതോടെ സ്റ്റേഡിയം ആഘോഷരാവില്‍.
