ലഖ്‌നൗ: പൗരത്വ ഭേദഗതി നിയമം നടപ്പാക്കുന്ന രാജ്യത്തെ ആദ്യ സംസ്ഥാനമായി ഉത്തര്‍പ്രദേശ്. നിയമം നടപ്പാക്കുന്നതിന്റെ ഭാഗമായുള്ള നടപടി ക്രമങ്ങള്‍ ആരംഭിച്ചു. ആദ്യപടിയായി പാക്കിസ്ഥാന്‍, ബംഗ്ലദേശ്, അഫ്ഗാനിസ്ഥാന്‍ എന്നിവിടങ്ങളില്‍ നിന്നുള്ള കുടിയേറ്റക്കാരായ ഹിന്ദു, സിഖ്, ജൈന, പാഴ്‌സി വിഭാഗങ്ങളുടെ കണക്കെടുക്കാന്‍ യുപി സര്‍ക്കാര്‍ നിര്‍ദേശിച്ചു. പട്ടിക തയാറാകുന്ന മുറയ്‌ക്ക് ഇവര്‍ക്ക് ഇന്ത്യന്‍ പൗരത്വം നല്‍കും.
അയല്‍രാജ്യങ്ങളില്‍ നിന്നും നിരവധി പേര്‍ ഉത്തര്‍പ്രദേശിലെ വിവിധ ജില്ലകളില്‍ വര്‍ഷങ്ങളായി സ്ഥിര താമസക്കാരായുണ്ടെന്ന് ആഭ്യന്തര അഡീഷനല്‍ ചീഫ് സെക്രട്ടറി അവനിഷ് അവാസ്തി പറഞ്ഞു. ‘പാക്കിസ്ഥാന്‍, ബംഗ്ലദേശ് എന്നീ രാജ്യങ്ങളില്‍ നിന്നും എത്തിയവരുടെ കണക്കുകളേക്കാള്‍ കുറവാണ് അഫ്ഗാനിസ്ഥാനില്‍ നിന്നും കുടിയേറിയവര്‍. ആദ്യമായാണു രാജ്യത്ത് ഇത്തരത്തില്‍ പട്ടിക തയാറാക്കുന്നത്. അര്‍ഹരായവര്‍ക്കു പൗരത്വം നല്‍കും.’ അദ്ദേഹം വ്യക്തമാക്കി.
ലക്‌നൗ, ഹാപുര്‍, റാംപുര്‍, ഷാഹ്ജഹാന്‍പുര്‍, നോയിഡ, ഘാസിയാബാദ് എന്നിവിടങ്ങളിലാണു കൂടുതല്‍ കുടിയേറ്റക്കാരുള്ളത്. പട്ടിക തയാറാക്കി യഥാര്‍ഥ കുടിയേറ്റക്കാരെ കണ്ടെത്തുമെന്നു സര്‍ക്കാര്‍ പറഞ്ഞു.
പ്രതികരിക്കാൻ ഇവിടെ എഴുതുക: