ഗുവാഹത്തി: ചെറിയൊരു ഇടവേളയ്‌ക്ക് ശേഷം വിരാട് കോഹ്ലിയുടെ ഇന്ത്യ കളിക്കളത്തിലിറങ്ങുകയാണ്. പുതുവര്‍ഷത്തെ ആദ്യ ട്വന്റി 20 പരമ്പരയിലെ ആദ്യ മത്സരത്തില്‍ ഇന്ത്യ അയല്‍ക്കാരായ ശ്രീലങ്കയുമായി മാറ്റുരയക്കും. രാത്രി ഏഴിന് ബര്‍സപ്ര സ്‌റ്റേഡിയത്തില്‍ കളി തുടങ്ങും.
പോയ വര്‍ഷത്തിന്റെ അവസാന നാളുകളില്‍ ബംഗ്ലാദേശ്, വിന്‍ഡീസ് ടീമുകള്‍ക്കെതിരെ നേടിയ പരമ്പര വിജയം ആവര്‍ത്തിക്കാനുള്ള തയ്യാറെടുപ്പിലാണ് ടീം ഇന്ത്യ. തികഞ്ഞ ആത്മവിശ്വാസത്തിലാണ് കോഹ്‌ലിപ്പട ഇറങ്ങുന്നത്. ലക്ഷ്യം ജയം തന്നെ. പുതുവര്‍ഷം വിജയത്തോടെ തുടങ്ങാമെന്ന പ്രതീക്ഷയിലാണവര്‍.
പരിക്കില്‍ നിന്ന് മോചിതനായി പേസര്‍ ജസ്പ്രീത്ബുംറ തിരിച്ചെത്തിയത് ഇന്ത്യന്‍ പേസ് ആക്രമണത്തിന്റെ മൂര്‍ച്ച കൂട്ടും. ശിഖര്‍ ധവാനും പരിക്ക് ഭേദമായി ടീമിലെത്തിയിട്ടുണ്ട്. അതേസമയം ഓപ്പണര്‍ രോഹിത് ശര്‍മ ടീമിലില്ല. വിശ്രമത്തിലാണ് ഈ ഓപ്പണര്‍. പകരം ശിഖര്‍ ധവാനും കെ.പി. രാഹുലും ഇന്ത്യന്‍ ഇന്നിങ്‌സ് ഓപ്പണ്‍ ചെയ്യും. ബംഗ്ലാദേശ് , വിന്‍ഡീസ് ടീമുകള്‍ക്കെതിരായ പരമ്പരയില്‍ ഇന്ത്യന്‍ ടീമില്‍ സ്ഥാനം ലഭിച്ചിട്ടും കളിക്കാന്‍ അവസരം ലഭിക്കാതിരുന്ന മലയാളി താരം സഞ്ജു സാംസണ്‍ ഇന്ന് കളിക്കുമോയെന്ന് കണ്ടറിയണം.
പരിചയസമ്പന്നനായ പേസര്‍ ലസിത് മലിംഗയാണ് ശ്രീലങ്കയെ നയിക്കുന്നത്. മുന്‍ നായകന്‍ ഏയ്ഞ്ചലോ മാത്യൂസും ടീമിലുണ്ട്. ഇന്ത്യക്കെതിരെ മികച്ച പ്രകടനത്തിനൊരുങ്ങുകയാണ് ലങ്ക.പക്ഷെ ശ്രീലങ്കക്കെതിരെ ഇന്ത്യയുടെ ഗ്രാഫ് വളരെ ഉയര്‍ന്നതാണ്. ശ്രീലങ്കക്കെതിരായ ഒറ്റ ട്വന്റി 20 പരമ്പര ഇന്ത്യക്ക് നഷട്‌പ്പെട്ടിട്ടില്ല. ഇതുവരെ ശ്രീലങ്കയുമായി ആറു പരമ്പരകള്‍ കളിച്ചു. ഇതില്‍ അഞ്ചിലും ഇന്ത്യയാണ് ജയിച്ചത്. മറ്റൊരെണ്ണം സമനിലയായി. ശ്രീലങ്കക്കെതിരെ ഇന്ത്യ കളിച്ച അവസാന അഞ്ചു ട്വന്റി 20 മത്സരങ്ങളിലും ഇന്ത്യ വിജയിച്ചു. 2016 ല്‍ പൂനെയില്‍ നടന്ന മത്സരത്തിലാണ് ഇന്ത്യ അവസാനമായി ശ്രീലങ്കയോട് തോറ്റത്.
വിരാട് കോഹ് ലി ഇന്ന് ഒരു റണ്‍സ് കൂടി നേടിയാല്‍ ട്വന്റി 20 ഏറ്റവും കൂടുതല്‍ റണ്‍സ് നേടുന്ന താരമാകും. രോഹിത് ശര്‍മയെയാണ് കോഹ് ലി പിന്തളളുക. 24 റണ്‍സ് കൂടി നേടിയാല്‍ ക്യാപ്റ്റനെന്ന നിലയില്‍ ടി ട്വന്റിയില്‍ ആയിരം റണ്‍സ് കുറിക്കുന്ന ബാറ്റ്‌സ്മാനാകും. ട്വന്റി 20 യില്‍ ആയിരം റണ്‍സ് നേടുന്ന ലോകത്തെ ആറാമത്തെ ക്യാപ്റ്റനും രണ്ടാമത്തെ ഇന്ത്യന്‍ ക്യാപ്റ്റനുമാകും കോഹ്‌ലി. 31 റണ്‍സ് കൂടി നേടിയാല്‍ കോഹ് ലിക്ക് രാജ്യാന്തര ക്രിക്കറ്റില്‍ പതിനൊന്നായിരം റണ്‍സാകും.
