ആലപ്പുഴ: മുഖ്യമന്ത്രി പിണറായി വിജയന് രണ്ടാം മുഹമ്മദ് അലി ജിന്നയായി മാറിയെന്ന് ബിജെപി ദേശീയ നിര്വാഹക സമിതിയംഗം പി.കെ. കൃഷ്ണദാസ്. ഭാരതത്തെ മതത്തിന്റെ അടിസ്ഥാനത്തില് രണ്ടായി വെട്ടിമുറിക്കാന് ജിന്ന അവതരിപ്പിച്ച വിഭജന പ്രമേയത്തിന്റെ പുതിയ പതിപ്പാണ് സംസ്ഥാന നിയമസഭയില് പൗരത്വ നിയമ ഭേദഗതിക്കെതിരെ അവതരിപ്പിച്ചതെന്നും അദ്ദേഹം വാര്ത്താസമ്മേളനത്തില് ആരോപിച്ചു.
ഭരണപക്ഷത്തിന്റെ ബി ടീമായി യുഡിഎഫ് മാറി. ഈ സാഹചര്യത്തില് മന്ത്രിസഭാ വികസനത്തിന് പിണറായി തയാറാകണം. രമേശ് ചെന്നിത്തലയ്ക്ക് ഉപമുഖ്യമന്ത്രി സ്ഥാനം നല്കണം. പ്രതിപക്ഷ നേതാവായി ഒ. രാജഗോപാലിനെ പ്രഖ്യാപിക്കണം. പൗരത്വ നിയമ ഭേദഗതിയെ അനുകൂലിക്കുന്നവരും, എതിര്ക്കുന്നവരുമെന്ന നിലയില് കേരള രാഷ്ട്രീയം രണ്ടായി മാറി. ലോക്സഭയും രാജ്യസഭയും അംഗീകരിച്ച നിയമം അംഗീകരിക്കില്ലെന്ന് പ്രഖ്യാപിച്ചതിലൂടെ ഭാരതത്തെയും ഇവര് തള്ളിപ്പറയുന്നു. കേരളം ഒരു പ്രത്യേക രാജ്യമാണെന്നാണ് പിണറായിയും ചെന്നിത്തലയും കരുതുന്നത്. മുസ്ലിം വിഭാഗത്തിനിടയില് അസത്യങ്ങള് പ്രചരിപ്പിച്ച് ഭയാശങ്കകള് വളര്ത്തി ഇടതു, വലതു മുന്നണികള് കലാപത്തിനാണ് ശ്രമിക്കുന്നത്. ബിജെപി ഇതിനെതിരെ ബോധവത്ക്കരണം നടത്തും. എല്ലാവരെയും സത്യാവസ്ഥ ബോധ്യപ്പെടുത്തും. ഇവിടത്തെ ഒരു പൗരനെയും ബാധിക്കാത്ത വിഷയത്തിലാണ് അസത്യപ്രചാരണം നടക്കുന്നത്.
ഒരിക്കല് തള്ളിപ്പറഞ്ഞതിനെയെല്ലാം സ്വാഗതം ചെയ്യുകയും നടപ്പാക്കുകയും ചെയ്ത പാരമ്പര്യമാണ് ഇടതുപക്ഷത്തിനുള്ളത്. യുഎപിഎ നടപ്പാക്കിയതുപോലെ ഈ നിയമവും കേരളത്തില് പിണറായി വിജയന് തന്നെ നടപ്പാക്കുമെന്നും അദ്ദേഹം പറഞ്ഞു. ഗവര്ണര്ക്കെതിരായ അക്രമം മുഖ്യമന്ത്രിയുടെ ഒത്താശയോടെയാണെന്ന് കരുതേണ്ടിവരും. പാക്കിസ്ഥാന്റെ ഒത്താശയോടെ ഭാരതത്തെ തകര്ക്കാന് ശ്രമിക്കുന്ന പോപ്പുലര് ഫ്രണ്ടിനെ നിരോധിക്കാന് പിണറായി വിജയന് ആവശ്യപ്പെടാത്തത് എന്തു കൊണ്ടാണെന്ന് ജനങ്ങളോട് പറയാന് തയാറാകണം. ചെന്നൈയിലെ കലാപങ്ങള്ക്ക് പിന്നില് പാക് ബന്ധം തിരിച്ചറിഞ്ഞ സാഹചര്യത്തില് കേരളത്തില് നടക്കുന്ന പ്രക്ഷോഭങ്ങളെ ക്കുറിച്ച് അന്വേഷണം ആവശ്യമാണെന്നും അദ്ദേഹം പറഞ്ഞു. ജില്ലാ പ്രസിഡന്റ് കെ. സോമനും പങ്കെടുത്തു.
