അഞ്ചല്: കൊല്ലം അഞ്ചലില് കിടപ്പ് രോഗികളുടെ ക്ഷേമപെന്ഷനില് നിന്ന് കൈയിട്ടുവാരിയ സിപിഐ നേതാക്കളുടെ നടപടി വിവാദത്തിലേക്കും അന്വേഷണത്തിലേക്കും. ഇരുപത്തിയഞ്ചോളം കിടപ്പ് രോഗികളില് നിന്നാണ് 100 രൂപ വീതം സിപിഐ പാര്ട്ടി ഫണ്ടിലേക്ക് പിരിച്ചത്. സംഭവത്തില് നാട്ടുകാരില് നിന്നു വന് പ്രതിഷേധമുയര്ന്നിട്ടുണ്ട്. മന്ത്രി കെ.രാജുവിന്റെ മണ്ഡലത്തിലാണ് സിപിഐ നേതാക്കളുടെ മനസാക്ഷിയില്ലാത്ത കൊള്ള.
കിടപ്പുരോഗികള്ക്ക് വീടുകളില് ക്ഷേമപെന്ഷന് എത്തിക്കണമെന്നാണ് സര്ക്കാര് നിര്ദേശം. എന്നാല്, അഞ്ചലിലെ പത്താംവാര്ഡിലെ കിടപ്പുരോഗികളോ, ബന്ധുക്കളോ അടുത്തുള്ള അംഗന്വാടിയില് എത്തി പണം കൈപ്പറ്റാനാണ് സിപിഐയുടെ പഞ്ചായത്ത് അംഗം നിര്ദേശിച്ചത്. ഇത്തരത്തില് പണം വാങ്ങാന് എത്തിയവര്ക്കാണ്, പെന്ഷനില് നിന്നും 100 രൂപ എടുത്തശേഷം ബാക്കി തുക കൊടുത്തത്. പാര്ട്ടി പ്രവര്ത്തന ഫണ്ടിലേക്ക് 100 രൂപ എടുത്തതിന്റെ രസീതും ഇവര്ക്ക് നല്കിയിട്ടുണ്ട്.
അഞ്ചല് പഞ്ചായത്തിലെ പത്താം വാര്ഡിലെ 25 ഓളം കിടപ്പുരോഗികളില് നിന്നാണ് സിപിഐ നിര്ബന്ധിത പണപ്പിരിവ് നടത്തിയത്. പാര്ട്ടി പ്രവര്ത്തന ഫണ്ടിലേക്ക് എന്ന് പറഞ്ഞാണ് 100 രൂപ പിടിച്ചതെന്ന് നാട്ടുകാര് പറഞ്ഞു. പക്ഷാഘാതം വന്ന് അഞ്ച് വര്ഷമായി കിടപ്പിലായ അഞ്ചല് സ്വദേശിനിയുടെ ബന്ധുവാണ് ആദ്യം പരാതി ഉന്നയിച്ചത്. സിപിഐ പ്രവര്ത്തന ഫണ്ടിന്റെ രസീതും ഇവര്ക്ക് നല്കിയിട്ടുണ്ട്. സംഭവം വിവാദമായതോടെ അന്വേഷണം നടത്തുമെന്നാണ് പാര്ട്ടി നേതാക്കളുടെ വാദം.
