മുംബൈ: മഹാരാഷ്ട്ര ഉദ്ധവ് താക്കറെ സര്ക്കാര് മന്ത്രിസഭാ വികസനം നടത്തിയതിനു പിന്നാലെ തമ്മിത്തല്ലിന് തുടക്കമിട്ട് എന്സിപി കോണ്ഗ്രസ് നേതൃത്വം. ത്രികക്ഷി സര്ക്കാര് രൂപീകരണത്തില് കോണ്ഗ്രസ് നേരത്തെ എതിര്പ്പ് പ്രകടിപ്പിച്ചതാണ്. ഇതിനെ തുടര്ന്ന് സര്ക്കാര് രൂപീകരണത്തിനുശേഷവും മന്ത്രിമാരുടെ വകുപ്പ് വിതരണം സംബന്ധിച്ച് തീരുമാനത്തില് എത്തിയിരുന്നില്ല.
മന്ത്രിസഭാ വികസനത്തില് ഉദ്ധവ് താക്കറെയുടെ മകന് ആദിത്യ താക്കറെയ്ക്കും, അജിത് പവാറിനും മന്ത്രി സ്ഥാനം നല്കിയതോടെയാണ് മറ്റ് കോണ്ഗ്രസ് എന്സിപി അംഗങ്ങള് പ്രതിഷേധവുമായി എത്തിയത്. തുടര്ന്ന് അര്ഹതയുള്ളവര്ക്ക് മന്ത്രി സ്ഥാവം നല്കിയില്ലെന്ന് ആരോപിച്ച് കോണ്ഗ്രസ് പ്രവര്ത്തകര് പാര്ട്ടി ഓഫീസ് അടിച്ചു തകര്ത്തു. എംഎല്എ സംഗറാം തോംപ്തെയുടെ അനുയായികള് പൂനെ ശിവജി നഗറിലുള്ള കോണ്ഗ്രസ് ഭവന് അടിച്ചു തര്ക്കുകയായിരുന്നു.
ഓഫീസിലെ കമ്പ്യൂട്ടറും, ടിവിയും, ഫര്ണീച്ചറും ഉള്പ്പടെയുണ്ടായിരുന്ന സാധനങ്ങളെല്ലാം വിദ്യാര്ത്ഥി, യൂത്ത് കോണ്ഗ്രസ് പ്രവര്ത്തകര് തരിപ്പണമാക്കി. തീവ്രമനോഭാവമുള്ള ശിവസേനയുമായി സഖ്യ സര്ക്കാര് രൂപീകരിക്കുന്നതില് നേരത്തെ തന്നെ പ്രവര്ത്തകര്ക്കിടയില് ഉണ്ടായിരുന്ന അമര്ഷമാണ് ഇപ്പോള് പുറത്തുവന്നിരിക്കുന്നത്.
ഉദ്ദവ് താക്കറെ മന്ത്രിസഭ പുനഃസംഘടനക്ക് ശേഷം മുതിര്ന്ന എന്സിപി നേതാവും മജല്ഗാവ് എംഎല്എയുമായ പ്രകാശ് സോളങ്കിയും രാഷ്ട്രീയത്തില് നിന്നും വിട്ടുനില്ക്കുന്നതായി അറിയിച്ചിരുന്നു. വര്ഷങ്ങളോളം എംഎല്എ ആയിരുന്നവരേയും കഴിവുള്ളവരേയും മന്ത്രി സ്ഥാനത്തേയ്ക്ക് പരിഗണിക്കുന്നില്ലെന്നും ആരോപണം ഉന്നയിക്കുകയും ചെയ്തിരുന്നു.
അതേസമയം എന്സിപിയുമായി സഖ്യമുണ്ടാക്കുന്നതിന് മുന് കൈയെടുത്ത ശിവസേനാ നേതാവ് സഞ്ജയ് റാവത്ത് മന്ത്രിമാരുടെ സത്യപ്രതിജ്ഞാ ചടങ്ങില് പങ്കെടുക്കാതെ ഒഴിവായി. ഇതുസംബന്ധിച്ച് പ്രത്യേക പ്രതികരണങ്ങളൊന്നും പുറത്തുവിട്ടിട്ടില്ല. മന്ത്രിസഭാ വികസനത്തില് പ്രതിഷേധിച്ച് സോലാപൂരിലെ യൂത്ത് കോണ്ഗ്രസ് സെക്രട്ടറി രാജിവെച്ചു. അതിനു പിന്നാലെ നിരവധി പ്രവര്ത്തകരും പാര്ട്ടി അംഗത്വത്തില് നിന്നും രാജിവെച്ചിട്ടുണ്ട്.
